ដីកាកោះចុះហត្ថលេខាដោយព្រះរាជអាជ្ញាររង សៀង សុខ កាលពីថ្ងៃទី២៧ តុលា តាមបណ្ដឹង របស់លោក គី តិច ជាមេធាវីរបស់លោកនាយករដ្ឋមន្ត្រី ហ៊ុន សែន។ លោក គី តិច ទាមទារឲ្យលោក លឺ ឡាយស្រេង សងសំណងជំងឺចិត្តចំនួន ៥០០លានរៀល ដល់ដើមបណ្តឹងរដ្ឋប្បវេណី។ សុំឲ្យតុលាការប្រកាសផ្ដន្ទាទោសបន្ថែម ផ្អែកតាមមាត្រា៣១០ នៃក្រមព្រហ្មទណ្ឌ សុំឲ្យអយ្យការ និងសាលាដំបូងរាជធានីភ្នំពេញ ធ្វើការចោទប្រកាន់ និងផ្ដន្ទាទោស ឈ្មោះ លឺ ឡាយស្រេង តាមច្បាប់។
លោក ហ៊ុន សែន ប្ដឹងទៅសាលាដំបូងរាជធានីភ្នំពេញនេះ នៅក្រោយពេលហ្វេសប៊ុកឈ្មោះ សីហា បានលួចថតសំឡេង លោក លឺ ឡាយស្រេង សន្ទនាជាមួយអ្នកស្រី គី លំអង ដែលជាអតីតមន្ត្រី គណបក្សហ៊្វុនស៊ិនប៉ិចដូចគ្នាកាលពីថ្ងៃទី២១ តុលា។ នៅក្នុងសំឡេងសន្ទនាតាមទូរស័ព្ទជាសម្ងាត់នោះ លោក ហ៊ុន សែន ចោទថា លោក លឺ ឡាយស្រេង ប្រមាថព្រះមហាក្សត្រ និងបរិហារកេរ្តិ៍ រូបលោក ទាក់ទងនឹងការផ្ដល់លុយជូនមន្ត្រីគណបក្សហ៊្វុនស៊ិនប៉ិច។
លោក លឺ ឡាយស្រេង ធ្លាប់បានបញ្ជាក់ថា លោកមិនរកមេធាវី ដើម្បីតតាំងក្នុងសំណុំរឿងក្ដីនេះទេ។ លោកបញ្ជាក់ថា តុលាការកម្ពុជាមិនមែន ជាតុលាការដែលផ្ដល់ភាពយុត្តិធម៌ជូនលោក និងមនុស្សទូទៅទេ ដោយលោកហៅតុលាការថា ជាតុលាការតេឡេបញ្ជារបស់លោក ហ៊ុន សែន។
អ្នកច្បាប់លើកឡើងថា សំណុំរឿងនេះ អ្នកដែលខុសច្បាប់ធ្ងន់ធ្ងរនោះ គឺអ្នកលួចថតសំឡេងសន្ទនារបស់លោក លឺ ឡាយស្រេង ដែលសន្ទនាឯកជនជាសម្ងាត់ ដែលបានធានានៅក្នុងរដ្ឋធម្មនុញ្ញ និងច្បាប់មួយចំនួនទៀត តែបែរជាត្រូវបានហ្វេសប៊ុក ឈ្មោះសីហា យកមកទម្លាយជាសាធារណៈ ហើយរដ្ឋាភិបាលមិនបានចាប់ខ្លួន និងមកប្ដឹងលោក លឺ ឡាយស្រេង ដែលគេហៅថាជាអ្នករងគ្រោះទៅវិញ៕
No comments:
Post a Comment