លោក សុភ័គ ថ្លែងថា៖ «ធម្មតាបើគាត់បោះបង់ អាហ្នឹងគឺចប់ បើមិនបោះបង់ចោលទេអាហ្នឹងវាអាចមានជាប់ពាក់ព័ន្ធទៀតអាស្រ័យលើស្ថានភាពជាក់ស្ដែងរបស់បុគ្គល ឬក៏អង្គការទាំងនោះ។ រហូតមកដល់ពេលនេះមិនមានវិធានការអីទៀតទេ លើកលែងតែពួកគាត់មានសកម្មភាពអ្វីដែលធ្វើបន្ទាប់ពីថ្ងៃហ្នឹងទៅគ្រាន់តែយើងធ្វើការកត់សម្គាល់ប៉ុណ្ណឹងទេ។ កាលណាសាមីខ្លួនបោះបង់ចោលនូវគោលជំហរ ឬក៏ផែនការ អ៊ីចឹងទេអាហ្នឹងអត់អីទេ»។
ទោះជាយ៉ាងណាក៏ដោយ ក៏លោក សុភ័គ នៅតែគំរាមថា សមត្ថកិច្ចអាចចាត់វិធានការឡើងវិញចំពោះសកម្មភាពជាក់ស្ដែងប៉ុណ្ណោះ ដោយបានលើកយកឧទាហរណ៍អំពីករណីលោក វ៉ន ពៅ ដែលបានកែខ្លួនរួចហើយ។
លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ដែលមានឈ្មោះក្នុងបញ្ចីក្រុមមេធាវីក្រសួងមហាផ្ទៃដាក់ជូនតុលាការដែលថា រូបលោកបានពាក់ព័ន្ធទៅហ្នឹងការដឹកនាំការតវ៉ានៅខាងមុខទីស្ដីការគណៈរដ្ឋមន្ត្រីទាមទារឲ្យលោក ហ៊ុន សែន ចុះចេញពីតំណែងកាលពីចុងឆ្នាំ ២០១៣។
លោក សុភ័គ ថ្លែងថា៖ «ឲ្យលោក វ៉ន ពៅ ត្រឡប់មកវិញឲ្យគាត់មើលសម្តីគាត់តើកាលឈរលើក្បាលឡានយ៉ាងម៉េច? គាត់មើលគាត់អៀនខ្លួនគាត់ហើយ មិនអីទេឲ្យគាត់អៀនចុះមិនអីទេ ឥឡូវគាត់ឈប់ហើយសង្ឃឹមអ៊ីចឹង។ វាយល់ហើយ វាឈប់ហើយ សកម្មភាពរបស់វាប្រហែលជាវាគ្រាន់តែប្រើប្រាស់ចំពោះជាតិរបស់យើង»។
ការអះអាងរបស់លោក សុភ័គ បានធ្វើឡើងតែមួយថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈថាលោកបានហៅឲ្យលោក វ៉ន ពៅ ដែលមានបំណងគេចខ្លួនឲ្យវិលត្រឡប់មកជួបជុំគ្រួសារ និងបន្តធ្វើការងារធម្មតាវិញ។
លោក ហ៊ុន សែន បានថ្លែងកាលពីថ្ងៃអាទិត្យថា៖ «ឥឡូវមកវិញមកគ្មានពីណាធ្វើស្អីទេ ម្សិលមិញខ្ញុំក៏វ៉ៃ WhatsApp ហៅ វ៉ន ពៅ ឲ្យត្រឡប់មកវិញព្រោះដឹងថា វ៉ន ពៅ កំពុងនៅឯនោះហើយខ្ញុំក៏បានបញ្ជូនបន្តទៅឲ្យ អ៊ិត សំហេង ដែរ ហើយ ឃួង ស្រេង ដែរ។ ប្រពន្ធកំពុងព្យួរសេរ៉ូមនៅឯនេះ ហើយឯងរត់ទៅឯណោះ ខ្ញុំថាក្មួយ វ៉ន ពៅ មកវិញគ្មានអាណាគេធ្វើអីទេ កំពុងតែអនុវត្តអារឿងកម្មករក្រៅប្រព័ន្ធនេះមកចូលរួមចំណែកធ្វើអាហ្នឹងទៅ ហើយបើគេហៅសួរឡើងតុលាការដើម្បីសួរនាំពីរឿងមានបញ្ហាព្រោះពេលហ្នឹងខ្លួន វ៉ន ពៅ ក៏ធ្វើបាតុកម្មនឹងគេដែរ ប៉ុន្តែខ្លួនជាសាក្សីទេ មិនមែនអាណាហៅទៅចោទប្រកាន់ទេ»។
ក្នុងសវនាការរំលាយគណបក្សសង្គ្រោះជាតិនៅតុលាការកំពូលកាលពីសប្ដាហ៍មុនក្រៅពីលើកឈ្មោះលោក វ៉ន ពៅ ក្រុមមេធាវីក្រសួងមហាផ្ទៃក៏បានភ្ជាប់ថ្នាក់ដឹកនាំ និងអង្គការសង្គមស៊ីវិលល្បីឈ្មោះមួយចំនួនដូចជាលោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ថាបានផ្តួចផ្ដើមធ្វើយុទ្ធនាការថ្ងៃចន្ទពណ៌ខ្មៅ (BlackMonday)។
អង្គការឃ្លាំមើលការបោះឆ្នោត Comfrel ថាបានឃុបឃិតជាមួយបក្សប្រឆាំងក្នុងការអះអាងមុនការបោះឆ្នោតថ្នាក់ជាតិ ២០១៣ ថាទឹកថ្នាំជ្រលក់ដៃអាចលុបជ្រះ និងមជ្ឈមណ្ឌលសិទ្ធិមនុស្សកម្ពុជា (CCHR ) ដែលបង្កើតដោយលោក កឹម សុខា ក្នុងឆ្នាំ ២០០២ ថាបានឃុបឃិតជាមួយសហរដ្ឋអាមេរិកដើម្បីបង្កើតបដិវត្តពណ៌ជាដើម។
លោក លី ច័ន្ទតុលា មេធាវីម្នាក់ក្នុងចំណោមមេធាវីផ្សេងទៀតដែលបានការពារក្ដីឲ្យក្រសួងមហាផ្ទៃលើបណ្ដឹងរំលាយគណបក្សសង្គ្រោះជាតិថ្លែងប្រាប់ភ្នំពេញប៉ុស្ដិ៍ថាភ័ស្តុតាងស្ដីពីការឃុបឃិតរបស់អ្នកទាំងនោះត្រូវបានក្រុមមេធាវីដាក់ជូនតុលាការកំពូលក្នុងសំណុំរឿងរំលាយគណបក្សសង្គ្រោះជាតិ។
លោកថ្លែងថា៖ «ជាលក្ខណៈភ័ស្តុតាងដែលយើងប្រមូលបាននៅក្នុងសំណុំរឿងយើងឃើញថាពួកគាត់ហ្នឹងគឺវាមានទំនាក់ទំនងជាមួយខាងគណបក្សសង្គ្រោះជាតិអ៊ីចឹងជាភ័ស្តុតាងដែលយើងចង់បង្ហាញថាពួកគាត់ហ្នឹងក៏គាត់មកចូលរួមក្នុងការរៀបចំនូវការធ្វើបដិវត្តន៍ពណ៌នៅក្នុងប្រទេសកម្ពុជាដែរ»។
លោក មេធាវី បន្ថែមថា៖ «ចង់និយាយថាពេលដែលនៅក្នុងសវនាការហើយភ័ស្ដុតាងដែលយើងដាក់ចូលហ្នឹងគឺយើងបានដាក់ទៅតុលាការកំពូលហើយ ប៉ុន្តែជាភ័ស្តុតាងដែលយើងដាក់ដើម្បីសំអាងក្នុងការប្ដឹងរំលាយគណបក្សសង្គ្រោះជាតិហ្នឹង។
តែបន្ទាប់មកថាក្រសួងមហាផ្ទៃគាត់នឹងមានចំណាត់ការយ៉ាងម៉េចទៀតចំពោះបុគ្គលដែលពាក់ព័ន្ធ យើងអត់ដឹងដែរ»។
ទោះយ៉ាងណាលោកយល់ថាការត្រឡប់មកវិញរបស់លោក វ៉ន ពៅ តាមការអំពាវនាវរបស់លោក ហ៊ុន សែន នឹងមិនធ្វើឲ្យស្ថានការណ៍វាអាក្រក់ទេ។
លោក មេធាវី ថ្លែងថា៖ «អាហ្នឹងជួនកាលគាត់ភ័យខ្លួនគាត់ លោក វ៉ន ពៅ គាត់ភ័យខ្លួនគាត់ប៉ុន្តែខ្ញុំមិនហ៊ានបកស្រាយសម្តីរបស់នាយករដ្ឋមន្ត្រីដែរ ខ្ញុំមិនដឹងពីចិត្តគាត់យ៉ាងម៉េច ប៉ុន្តែអ្វីដែលជាយោបល់របស់គាត់នេះគឺគ្រាន់តែកុំឲ្យមានការព្យាយាមដែលធ្វើឲ្យស្ថានការណ៍វាអាក្រក់ព្រោះយើងមើលទៅគេមានទាន់ធ្វើអ្វីគាត់ឯណា ប៉ុន្តែគាត់ដូចផ្អើលខ្លួនគាត់អ៊ីចឹង»។
លោក វ៉ន ពៅ ថ្លែងកាលពីថ្ងៃអាទិត្យដោយមានភាពកក់ក្ដៅដោយបានថ្លែងថា៖ «ខ្ញុំមានអារម្មណ៍ថាជាការល្អប្រសើរហើយដែលយើងអត់មានធ្វើការខុសអីផងហើយគាត់អំពាវនាវឲ្យមកវិញកុំឲ្យចេះតែចោទអ៊ីចឹងវាធ្វើឲ្យមនុស្សមានការបារម្ភដែរ។ ឥឡូវយើងមានការបារម្ភពេលគាត់និយាយអ៊ីចឹងដូចជា បង្ហាញថាផ្តល់ភាពកក់ក្ដៅដល់អ្នកទាំងឡាយណាដែលតែងតែបារម្ភដូច (ខ្ញុំ) អ៊ីចឹងដែរ»។
លោកក៏បដិសេធចំពោះការចោទប្រកាន់ពីការចូលរួមឬ ប៉ុនប៉ងធ្វើបដិវត្តន៍ពណ៌ណាមួយប្រឆាំងនឹងរដ្ឋាភិបាល ហើយថាទាំងនេះគឺធ្វើតាមវិជ្ជាជីវៈគឺការពារប្រយោជន៍កម្មករក្រៅប្រព័ន្ធតែប៉ុណ្ណឹង។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា (CCHR) ថ្លែងថាអង្គការលោកស្រីមានការព្រួយបារម្ភចំពោះការភា្ជប់អង្គ CCHR នៅក្នុងភ័ស្តុតាងរបស់ក្រសួងមហាផ្ទៃ។ ទោះបីជាយ៉ាងណាលោកស្រីបានអះអាងថា CCHR នៅតែរក្សាភាពឯករាជ្យពីគ្រប់គណបក្សនយោបាយទាំងអស់។
លោកស្រីថ្លែងថា៖ «អតីតបុគ្គលិករបស់ CCHR មួយចំនួនតូចបានចូលក្នុងនយោបាយ ឬបានចូលរួមជាមួយគណបក្សនយោបាយជាច្រើនរួមមានទាំងគណបក្សប្រឆាំង និងគណបក្សកាន់អំណាច»។
លោកស្រីថ្លែងថាទោះបី CCHR គាំទ្រសិទ្ធិរបស់បុគ្គលគ្រប់រូបក្នុងការចូលរួមក្នុងនយោបាយក៏ដោយ CCHR មិនមានឥទ្ធិពលលើអតីតបុគ្គលិកដែលចូលក្នុងឆាកនយោបាយនោះទេ។
លោក យឿង សុធារ៉ា មន្ត្រីច្បាប់ និងអង្កេតនៃអង្គការឃ្លាំមើលការបោះឆ្នោត Comfrel ហៅការភ្ជាប់អង្គការរបស់លោកទៅនឹងសង្គ្រោះជាតិថា “គ្មានមូលដ្ឋាន” និងបដិសេដការជាប់ពាក់ព័ន្ធនៅនឹងគណបក្សសង្គ្រោះជាតិ ឬការប៉ុនប៉ងធ្វើបដិវត្តន៍ពណ៌។
លោក សុធារ៉ា បានការពារបេសកកម្មរបស់ Comfrel ដោយលើកឡើងថា អង្គការនេះបានធ្វើការយ៉ាងជិតស្និទ្ធជាមួយនឹងស្ថាប័នបោះឆ្នោតផ្លូវការរបស់រដ្ឋាភិបាលគឺគណៈកម្មាធិការជាតិរៀបចំការបោះឆ្នោតហើយគ្រាន់តែចង់ឃើញការបោះឆ្នោតមួយប្រព្រឹត្តទៅដោយសេរី និងយុត្តិធម៌ប៉ុណ្ណោះ។
លោក ណុប វី ប្រធានស្ដីទីនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ក៏បានបដិសេធការចោទប្រកាន់ចំពោះការភ្ជាប់លោក ប៉ា ងួនទៀង ទៅនឹងផែនការបដិវត្តន៍ពណ៌។
លោកបានថ្លែងថា៖ «ខ្ញុំចង់ជំរុញថាយើងគ្រាន់តែធ្វើការដើម្បីលើកកម្ពស់សេរីភាពខាងសារព័ត៌មាន និងសេរីភាពបញ្ចេញមតិប៉ុណ្ណោះ»។
លោកបានបន្តទៀតថា៖ «យើងធ្លាប់ត្រូវរងការរិះគន់ដោយរដ្ឋាភិបាលកាលពីអតីតកាលបើទោះបីជាយើងធ្វើការដោយវិជ្ជាជីវៈក៏ដោយ»៕
No comments:
Post a Comment