ក្រុងអាល់ប៊ុសេហ្វៈ កម្លាំងអ៊ីរ៉ាក់ដណ្តើមបានភូមិចំនួន ១០ ពីក្រុមរដ្ឋអ៊ិស្លាម IS ពីថ្ងៃអាទិត្យ ដោយបានចាប់ផ្តើមកិច្ចប្រតិបត្តិការដោយឥតរួញរាដើម្បីដណ្តើមយកក្រុងម៉ូស៊ូលភាគខាងលិចមកកាន់កាប់វិញ ដែលក្រុមអ្នកធ្វើការផ្នែកជំនួយព្រមានថា នឹងដាក់ក្រុមជនស៊ីវិលក្នុងគ្រោះថ្នាក់យ៉ាងធ្ងន់ធ្ងរ។
ដោយរុលចូលពីទិសដៅខុសៗគ្នាជាច្រើន កម្លាំងទាំងនោះ បានរំកិលឆ្ពោះទៅព្រលានយន្តហោះក្រុងម៉ូស៊ូលដែលស្ថិតនៅភាគខាងត្បូងក្រុងនេះ ដោយបង្ហាញពីជំហានថ្មីមួយនៅក្នុងកិច្ចប្រតិបត្តិការយោធាធំបំផុតនៅអ៊ីរ៉ាក់ជាច្រើនឆ្នាំមកនេះ។
ក្រុមរដ្ឋអ៊ិស្លាម បានតស៊ូដើម្បីការពារក្រុងម៉ូស៊ូលជាក្រុង ដែលមេដឹកនាំរបស់ខ្លួនលោក Abu Bakr al-Baghdadi បានប្រកាសរដ្ឋអ៊ិស្លាម ដោយទន្ទ្រានយកទឹកដីអ៊ីរ៉ាក់ និងស៊ីរីនៅក្នុងឆ្នាំ ២០១៤។
នាយករដ្ឋមន្ត្រីលោក Haider alAbadi បាននិយាយក្នុងសុន្ទរកថាដែលត្រូវបានគេចាក់ផ្សាយតាមទូរទស្សន៍ថា៖ «កម្លាំងរបស់យើងកំពុងចាប់ផ្តើមរំដោះប្រជាជនចេញពីអំពើភេរវកម្មរបស់ក្រុមរដ្ឋអ៊ិស្លាម»។
នៅពេលនោះ មេបញ្ជាការកងទ័ពកំពូលបានប្រកាសថា កម្លាំងដឹកនាំដោយកងប៉ូលិសសហព័ន្ធ បានដណ្តើមបានភូមិជាច្រើននៅភាគខាងត្បូងក្រុងម៉ូស៊ូលក្នុងនោះមានភូមិ Athbah ដែលបានទុកឲ្យពួកគេវាយប្រហារនៅឆ្ងាយពីព្រលានយន្តហោះនោះ។
លោក Abbas al-Juburi នៃកងកម្លាំងប្រតិកម្មរហ័ស បាននិយាយថា៖ «យើងបានចាប់ផ្តើមកិច្ចប្រតិបត្តិការរបស់យើងនៅម៉ោង ៧ ព្រឹក។ យើងកំពុងទៅកាន់ព្រលានយន្តហោះនោះ»។
ផ្ទៃមេឃនៅភាគខាងត្បូងក្រុងម៉ូស៊ូល ខ្មៅងងឹតដោយផ្សែងចេញពីការវាយប្រហារផ្លូវអាកាស និងកាំភ្លើងធំខណៈកម្លាំងរាប់ពាន់នាក់ និងក្បួនរថពាសដែកបានធ្វើការរួមគ្នានៅព្រលានយន្តហោះក្រុងម៉ូស៊ូលនោះ។
លោក Ali ជាមន្ត្រីប្រតិកម្មរហ័សម្នាក់ បាននិយាយនៅក្នុងភូមិអាល់ប៊ុសេហ្វខណៈឧទ្ធម្ភាគចក្រជាច្រើនគ្រឿងបានហោះលើក្បាលដើម្បីតាមដានក្រុមយុទ្ធជន IS ចុងក្រោយដែលកំពុងព្យាយាមរត់គេចខ្លួន។
សហសេវិករបស់លោកគឺលោក Alaa បាននិយាយថា៖ «ពួកគេនឹងព្យាយាមគេចចេញពីបុព្វហេតុនោះ តាមដែលអាចធ្វើទៅបានដោយសារពួកគេដឹងថា ពួកគេនឹងស្លាប់»។
ក្រុមជីហាដនិយម បានកាន់កាប់ក្រុងម៉ូស៊ូល និងទឹកដីរបស់អ៊ីរ៉ាក់ជាច្រើននៅភាគខាងលិច និងខាងជើងក្រុងបាកដាដនៅក្នុងឆ្នាំ ២០១៤៕
No comments:
Post a Comment