ក្រសួងការបរទេសកម្ពុជា ប្រតិកម្មតបនឹងស្ថានទូតសហរដ្ឋអាមេរិកប្រចាំនៅកម្ពុជា ដែលបានព្រួយបារម្ភពីស្ថានភាពនយោបាយនៅកម្ពុជា នៅក្រោយសមាជិកសភាគណបក្សកាន់អំណាចអនុម័តសេចក្តីស្នើវិសោធនកម្មច្បាប់ស្ដីពីគណបក្សនយោបាយ។
ស្ថានទូតសហរដ្ឋអាមេរិក កាលពីថ្ងៃទី២០ ខែកុម្ភៈ បានសរសេរនៅលើទំព័រហ្វេសប៊ុក (Facebook) របស់ខ្លួនថា វិសោធនកម្មច្បាប់ស្ដីពីគណបក្សនយោបាយនេះ បានផ្ដល់អំណាចយ៉ាងធំដល់រដ្ឋាភិបាលកម្ពុជា ក្នុងការដាក់កំហិតដល់សេរីភាពក្នុងការបញ្ចេញមតិ និងសកម្មភាពស្របច្បាប់នានារបស់គណបក្សនយោបាយ និងការឈានទៅរំលាយគណបក្សនយោបាយ។
ក្រសួងការបរទេស និងសហប្រតិបត្តិការអន្តរជាតិ ខកចិត្តចំពោះសហរដ្ឋអាមេរិក និងបានអំពាវនាវដល់រដ្ឋាភិបាលសហរដ្ឋអាមេរិក ឲ្យគោរពគោលការណ៍មិនជ្រៀតជ្រែក និងគោរពអធិបតេយ្យជាតិ និងចៀសវាងជ្រៀតជ្រែកចូលកិច្ចការផ្ទៃក្នុងរបស់កម្ពុជា។
ក្នុងសេចក្ដីថ្លែងការណ៍ផ្សព្វផ្សាយនៅថ្ងៃទី២២ កុម្ភៈ ក្រសួងការបរទេស ថាវិសោធនកម្មច្បាប់ស្ដីពីគណបក្សនយោបាយនេះ គឺឈរលើគោលការណ៍នានាដែលមានចែងនៅក្នុងរដ្ឋធម្មនុញ្ញ ហើយច្បាប់នេះត្រូវអនុវត្តជាទូទៅមិនបែងចែក។ លើសពីនេះ ច្បាប់នេះជាតម្រូវការចាំបាច់ជាមូលដ្ឋានដែលប្រទេសប្រកាន់លទ្ធិប្រជាធិបតេយ្យត្រូវគោរពតាម។
រដ្ឋសភាដែលមានតែតំណាងរាស្ត្រមកពីបក្សកាន់អំណាចចំនួន ៦៦រូប កាលពីព្រឹកថ្ងៃទី២០ ខែកុម្ភៈ បានអនុម័តជាឯកច្ឆន្ទសេចក្តីស្នើវិសោធនកម្មច្បាប់ស្ដីពីគណបក្សនយោបាយ តាមសំណើរបស់អ្នកតំណាងរាស្ត្រនៃគណបក្សដដែលនេះ។
ភ្លាមៗក្រោយការអនុម័ត សហរដ្ឋអាមេរិកសម្ដែងការបារម្ភជាខ្លាំង និងថាច្បាប់ថ្មី ផ្តល់អំណាចយ៉ាងធំដល់រដ្ឋាភិបាលកម្ពុជា ក្នុងការដាក់កំហិតដល់សេរីភាពក្នុងការបញ្ចេញមតិ និងសកម្មភាពស្របច្បាប់នានារបស់គណបក្សនយោបាយ ហើយនៅក្រោមកាលៈទេសៈកំណត់មិនច្បាស់លាស់ណាមួយ គឺរំលាយគណបក្សនយោបាយតែម្តង។
សហរដ្ឋអាមេរិក យល់ថា សកម្មភាពណាមួយដែលបានហាមឃាត់ដល់គណបក្សនយោបាយនៅក្រោមវិសោធនកម្មច្បាប់ថ្មីនេះ គឺជាការដើរថយក្រោយមួយដ៏សំខាន់ សម្រាប់ការអភិវឌ្ឍនយោបាយនៅក្នុងប្រទេសកម្ពុជា ហើយនឹងនាំឲ្យមានសំណួរចោទឡើងពីភាពស្របច្បាប់ក្នុងការបោះឆ្នោតនៅកម្ពុជា ក្នុងពេលខាងមុខ។
សហរដ្ឋអាមេរិក អំពាវនាវដល់រដ្ឋាភិបាលកម្ពុជា ប្រកាន់យកនូវជំហរចាំបាច់នានាដើម្បីធានាថា យុទ្ធនាការឃោសនាបោះឆ្នោត និងការបោះឆ្នោតក្នុងឆ្នាំ២០១៧ និងឆ្នាំ២០១៨ ខាងមុខ មានលក្ខណៈសេរី បើកចំហ និងមានតម្លាភាព ហើយគ្រប់គណបក្សនយោបាយទាំងអស់មានឱកាសក្នុងការចូលរួមប្រកួតប្រជែងដោយស្មើភាពគ្នា។
ឆ្លើយតបនឹងបញ្ហាដដែលនេះ ក្រសួងការបរទេស បញ្ជាក់ថា ច្បាប់នេះមិនបានគំរាមកំហែងដល់គ្រឹះនៃប្រព័ន្ធពហុបក្សទេ តែជាការទប់ស្កាត់ការរំលោភបំពានមិនស្របតាមគោលការណ៍ប្រជាធិបតេយ្យ ដូចជាការញុះញង់ឲ្យមានសំអប់ខាងជាតិសាសន៍ ការបង្ខូចកេរ្តិ៍ឈ្មោះ ការបំផ្លិចបំផ្លាញគ្រឹះសង្គមជាតិ។
បើទោះជាបែបនេះក្ដី ក្រុមអង្គការសង្គមស៊ីវិលធ្វើការងារទាក់ទងនឹងការបោះឆ្នោត ក៏បានរិះគន់ច្បាប់គណបក្សនយោបាយថ្មីនេះថា ប្រៀបបាននឹងដំណើរសម្លាប់ប្រជាធិបតេយ្យនៅកម្ពុជា។
នាយកប្រតិបត្តិអង្គការខុមហ្វ្រែល (COMFREL) លោក គល់ បញ្ញា បានលើកឡើងថា លោកមិនដឹងច្បាស់អំពីគោលបំណងនៃការធ្វើវិសោធនកម្មច្បាប់ស្ដីពីគណបក្សនយោបាយនេះឡើយ ក្រៅតែពីមានមាត្រាបានចែងដោយផ្ដល់អំណាចពេញលេញទៅក្រសួងមហាផ្ទៃ មានសិទ្ធិសម្រេចហាមឃាត់ ផ្អាក ឬរំលាយគណបក្សនយោបាយណាមួយឲ្យឈប់ធ្វើសកម្មភាពតទៅទៀត ប្រសិនគណបក្សនយោបាយទាំងនោះត្រូវបានតុលាការរកឃើញថា ធ្វើឲ្យប៉ះពាល់សន្តិសុខជាតិ ឬញុះញង់ឲ្យបែកបាក់ជាតិ។ លោក គល់ បញ្ញា ព្រួយបារម្ភពីការបកស្រាយនានាទៅលើមាត្រាច្បាប់នេះ៖ «ជួនកាលការញុះញង់នេះគ្រាន់តែជាការបញ្ចេញមតិនៃតួនាទីរបស់អ្នកតំណាងរាស្ត្ររបស់ព្រឹទ្ធសភា របស់អ្នកនយោបាយដែលមានការរិះគន់គ្នាទៅវិញទៅមក អាចមានការចោទប្រកាន់ទៅជាការញុះញង់ រហូតដល់យកពួកគេទៅដាក់ពន្ធនាគារ។ ត្រង់អស់នេះហើយដែលយើងគិតថា ចុះបើគេយកទៅបកស្រាយទៅរហូតដល់រំលាយគណបក្ស ឬក៏ទៅហាមឃាត់មិនឲ្យធ្វើសកម្មភាពនោះ គឺជារឿងធ្ងន់ធ្ងរណាស់»។
នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ឺតសុន (Phil Robertson) បានរិះគន់ធ្ងន់ៗថា ករណីនេះបង្ហាញពីការពង្រឹងអំណាចផ្ដាច់ការដែលស្ថិតក្រោមកណ្ដាប់ដៃលោកនាយករដ្ឋមន្ត្រី ហ៊ុន សែន និងគណបក្សប្រជាជនកម្ពុជា។
ទាក់ទិននឹងករណីនេះ ស្ថានទូតប្រទេសអូស្ត្រាលី ប្រចាំនៅកម្ពុជា បានប្រាប់អាស៊ីសេរីតាមសារអេឡិចត្រូនិកនៅថ្ងៃទី២២ ខែកុម្ភៈ ថា អូស្ត្រាលី នឹងបន្តឃ្លាំមើលការផ្លាស់ប្ដូរច្បាប់គណបក្សនយោបាយនៅកម្ពុជា នេះ។ ស្របគ្នានេះ រដ្ឋាភិបាលអូស្ត្រាលី ជំរុញលើកទឹកចិត្តរដ្ឋាភិបាលកម្ពុជា ឲ្យធានាបាននូវការបោះឆ្នោតដែលមានតម្លាភាព និងជឿទុកចិត្តបាន ដើម្បីរក្សាបរិយាកាសនយោបាយសម្រាប់ការបញ្ចេញសំឡេង និងយោបល់ពីគ្រប់ភាគីទាំងអស់។
ច្បាប់ថ្មីស្ដីពីគណបក្សនយោបាយ ដែលត្រូវអនុម័តរួចរាល់នេះមាន ១១ជំពូក និង ៥០មាត្រា។
អង្គការសង្គមស៊ីវិលនៅតែយល់ថា ការធ្វើវិសោធនកម្មច្បាប់ដើម្បីយកទៅអនុវត្តឲ្យមានប្រសិទ្ធភាពជួយឲ្យប្រជាធិបតេយ្យរឹងមាំ គឺទាល់តែមានការជជែកពិភាក្សាស្រុះស្រួលគ្នា យ៉ាងហោចណាស់ពីខាងគណបក្សនយោបាយមានសំឡេងក្នុងសភាទាំងពីរដែរ៕
No comments:
Post a Comment