លោកនាយករដ្ឋមន្ត្រី ហ៊ុន សែន បានរំឭកថា ថ្ងៃទី២៤ ខែកុម្ភៈ ឆ្នាំនេះ គឺជាខួប៣៨ឆ្នាំ ដែលលោកបានជួប ភរិយានិងកូនវិញក្រោយពេលរបបខ្មែរក្រហមដួលរលំ តែលោកថា ឲ្យតែនឹកឃើញពីហេតុការណ៍នៃការបែកបាក់នោះ តែងស្រក់ទឹកភ្នែករហូតដល់បច្ចុប្បន្ន។
លោកនាយករដ្ឋមន្ត្រី ហ៊ុន សែន សរសេរនៅលើហ្វេសប៊ុករបស់លោកថា ទឹកភ្នែករាប់លានដំណក់បានស្រក់ នៅពេលលោកបែកពីគ្រួសារនៅថ្ងៃទី២០ ខែកុម្ភៈ ឆ្នាំ១៩៧៧។ លោកបន្តថា ក្រោយថ្ងៃផ្តូលរំលំរបបខ្មែរក្រហមនៅថ្ងៃទី៧ ខែមករា ឆ្នាំ១៩៧៩ លោកនៅតែស្រក់ទឹកភ្នែកដោយសារមិនដឹងដំណឹងប្រពន្ធនៅទីណា ស្លាប់ ឬរស់។
លោកសរសេរថា៖ «ទោះពេលវេលាបានកន្លងហួសរាប់សិបឆ្នាំហើយក្តី តែនៅពេលដែលខ្ញុំនឹកឃើញដល់រឿងកូនទី១ស្លាប់ និងការបែកគ្នារហូតកូនមិនស្គាល់ឪពុក ទឹកភ្នែកខ្ញុំនៅតែបន្តហូរមកដោយមិនដឹងខ្លួន។ ដោយតម្លៃណាក៏ដោយត្រូវការពារសន្តិភាពឱ្យបាន និងមិនត្រូវអត់ឱនឲ្យអ្នកណាក៏ដោយដែលបំផ្លាញសន្តិភាពនិងបង្កឱ្យមានចលាចល»។
ទាក់ទងសន្តិភាព លោកនាយករដ្ឋមន្ត្រី ហ៊ុន សែន ថ្លែងថាពេលដែលបាត់បង់វត្តមានរូបលោកនិងនៅពេលគណបក្សប្រជាជនកម្ពុជារបស់លោកចាញ់ឆ្នោតនោះ នឹងធ្វើឲ្យសង្គមមានចលាចលឬផ្ទុះសង្គ្រាម។
ទោះជាយ៉ាងណាអ្នកឃ្លាំមើលការអភិវឌ្ឍសង្គមធ្លាប់លើកឡើងថា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន ជិត៤០ឆ្នាំមកនេះ ក៏បានបណ្តាលឲ្យពលរដ្ឋខ្មែរមិនតិចទេ ស្រក់ទឹកភ្នែកដោយភាពអយុត្តិធម៌នៅក្នុងសង្គម ដូចជាជម្លោះដីធ្លី ការបំផ្លាញធនធានធម្មជាតិជាដើម។ ចំណែកឃាតកម្មជាច្រើនដែលរកឃាតកមិនឃើញក៏កំពុងធ្វើឲ្យក្រុមគ្រួសាររងទុក្ខដែរដូចជា ឃាតកម្មសម្លាប់តារាសម្តែង អ្នកស្រី ពិសិដ្ឋ ពីលីកា សម្លាប់លោក ជា វិជ្ជា មេដឹកនាំសហជីព សម្លាប់លោក ឈុត វុទ្ធី អ្នកការពារព្រៃឈើ និងចុងក្រោយការសម្លាប់លោក កែម ឡី អ្នកវិភាគបញ្ហាសង្គមជាដើម៕
No comments:
Post a Comment