នៅក្នុងវេទិកាអ្នកស្តាប់វិទ្យុអាស៊ីសេរីកាលពីយប់ថ្ងៃសៅរ៍ លោក គឹម សុខ បានថ្លែងថា៖ «គណបក្សប្រជាជនកម្ពុជាបច្ចុប្បន្នខ្ញុំមើលមិនឃើញថាគាត់ធ្វើដើម្បីចង់បានបង្កើនប្រជាប្រិយភាពអ្វីទេ មែនទែនគាត់មិនបានត្រៀមខ្លួនទៅកាន់ការបោះឆ្នោតទេនិយាយឲ្យចំទៅគាត់ត្រៀមខ្លួនទៅបន្តប្លន់អំណាច គាត់មិនត្រៀមខ្លួនទៅកាន់ការបោះឆ្នោតទេ…អាច្បាប់ដែលគេធ្វើវិសោធនកម្មច្បាប់ស្តីពីគណបក្សនយោបាយគឺជាកំពូលស្នាដៃផ្តាច់ការ សាហាវជាងគេក្នុងអាណត្តិហ្នឹងណាបានន័យថាគេប្រើគ្រប់រូបភាពអស់ហើយក្រោយពីការបោះឆ្នោត ២០១៣ មានការតវ៉ារបស់ប្រជាពលរដ្ឋមានការបង្ក្រាប បាញ់សម្លាប់តទៅទៀតតែក្រោយមកប្រជាពលរដ្ឋនៅតែតវ៉ា តវ៉ាហើយគេប្រើរូបភាពផ្តាច់ការដូចជាយន្តហោះ ហោះពីលើអគារគណបក្សសង្គ្រោះជាតិចេញមកពីរូបភាពហ្នឹងមានរឿងផ្សេងៗ ការចាប់ដៃលោក សម រង្ស៊ី លោក កឹម សុខា អីហ្នឹង រូបភាពអស់ហ្នឹងដើម្បីជារូបភាពមួយក្នុងល្បិចកលផ្តាច់ការដើម្បីកម្ទេចគណបក្សសង្គ្រោះជាតិ ប៉ុន្តែធ្វើបែបអស់ហ្នឹងហើយសម្លាប់ហើយអីហើយហ្នឹងទាំងចុងក្រោយសម្លាប់លោក កែម ឡី ទៀតហ្នឹងប្រជាពលរដ្ឋនៅតែងើប អ៊ីចឹងហើយមានតែវិធីចុងក្រោយទេគឺវិធីច្បាប់…គោលដៅរបស់គេមិនមែនតែលោក សម រង្ស៊ី ទេ គោលដៅរបស់គេគឺកម្ទេចគណបក្សសង្គ្រោះជាតិ»។
មេធាវីការពារក្តីឲ្យលោក ហ៊ុន សែន គឺលោក គី តិច បានប្រាប់ភ្នំពេញប៉ុស្តិ៍កាលពីម្សិលមិញថាលោកបានទទួលសិទ្ធិពីលោកនាយករដ្ឋមន្ត្រីក្នុងការដាក់ពាក្យបណ្តឹងនេះកាលពីយប់ថ្ងៃទី ១១ ខែកុម្ភៈ ឆ្នាំ ២០១៧។ លោកឲ្យដឹងថានៅថ្ងៃចន្ទនេះលោកនឹងយកពាក្យបណ្តឹងទៅដាក់នៅសាលាដំបូងរាជធានីភ្នំពេញ។ លោកឲ្យដឹងទៀតថាអង្គហេតុនៃបណ្តឹងនេះគឺទាក់ទងនឹងការលើកឡើងរបស់លោក គឹម សុខ ទៅលើពាក្យមួយចំនួនដែលមានចេតនាចោទប្រកាន់គណបក្សកាន់អំណាចថាបានសម្លាប់លោក កែម ឡី។ លោកបន្ថែមថា៖ «ពាក់ព័ន្ធនឹងលោក គឹម សុខ ហ្នឹងនិយាយក្នុងវេទិកាមួយក្នុងវិទ្យុអាស៊ីសេរី យប់ថ្ងៃទី ១១ (ខែកុម្ភៈ) បាននិយាយប៉ះពាល់គណបក្សកាន់អំណាចគឺគណបក្សប្រជាជនដែលគាត់មានចេតនាចោទទម្លាក់កំហុសមកលើគណបក្សប្រជាជនដោយបានប្រើពាក្យថាបានសម្លាប់លោក កែម ឡី…តែគាត់បាននិយាយច្រើន តែគ្រាន់តែខ្លឹមសារអង្គហេតុដែលនាំឲ្យកើតបណ្តឹងហ្នឹងគឺពាក្យហ្នឹង»។
ទោះយ៉ាងណាលោក គី តិច មិនទាន់អាចបញ្ជាក់ពីបទចោទនៅឡើយទេដោយលោកថាអាស្រ័យលើព្រះរាជអាជ្ញា។ លោកបន្តថា៖ «បទចោទខ្ញុំមិនអាចកំណត់ទេ មេធាវីមិនអាចកំណត់បទចោទទេជាសមត្ថកិច្ចរបស់ព្រះរាជអាជ្ញា»។
ទាក់ទងនឹងពាក្យបណ្តឹងរបស់លោកនាយករដ្ឋមន្ត្រី ហ៊ុន សែន នេះអ្នកឃ្លាំមើលបញ្ហាសង្គម និងនយោបាយលោក គឹម សុខ ថ្លែងថាលោកនឹងរកមេធាវីសម្រាប់តតាំងចំពោះបណ្តឹងនេះ និងថាលោកនឹងមិនរត់ចេញទៅក្រៅប្រទេសនោះទេ។ ទោះយ៉ាងណាលោកថាការលើកឡើងរបស់លោកក៏មិនបានចោទប្រកាន់បុគ្គលណាមួយថាជាអ្នកសម្លាប់លោក កែម ឡី នោះដែរ។ លោកបានបន្ថែមថា៖ « មែនទែនទៅបើគេគិតថាអាហ្នឹងថាខ្ញុំនិយាយថាគេសម្លាប់ អាហ្នឹងវាជាការបកស្រាយរបស់គេ ប៉ុន្តែអាហ្នឹងខ្ញុំចង់ភ្ជាប់សាច់រឿងទាំងអស់ហ្នឹងថាមានរឿងអយុត្តិធម៌សង្គមច្រើនទៅហើយនៅតែប្រជារាស្រ្តងើប ប្រជារាស្រ្តមិនបាក់ ចូលរួម អ៊ីចឹងហើយគេធ្វើជាប្រព័ន្ធ…ចង់និយាយថា…ចុងក្រោយមានការសម្លាប់លោក កែម ឡី ម្នាក់ទៀតហើយប្រជារាស្រ្តនៅតែមិនបាក់ស្រុតនយោបាយ…តាមពិតទៅខ្ញុំអត់មានបានសំដៅលើបុគ្គលណាមួយទេ…គឺពាក្យហ្នឹងសំដៅលើប្រព័ន្ធដឹកនាំទាំងមូល…ធម្មតាគណបក្សប្រជាជនកម្ពុជាត្រូវទទួលខុសត្រូវហើយកាលណា (មាន) ស្លាប់ហើយរកមិនឃើញយ៉ាងហោចណាស់ខ្លួនឯងទទួលខុសត្រូវក្នុងនាមជាអ្នកដឹកនាំ»។
ចំណែកសាស្រ្តាចារ្យវិទ្យាសាស្រ្តនយោបាយ លោក សូ ចន្ថា ដែលបានចូលរួមជាវាគ្មិនជាមួយគ្នានោះដែរមានប្រសាសន៍ថាគណបក្សកាន់អំណាចគួរបើកចិត្តទូលាយជាងនេះហើយថា បើសិនជាការវិភាគទៅមានការខុសឆ្គងណាមួយគួរតែផ្តល់ជាការព្រមានមុនសិន មុននឹងសម្រេចដាក់ពាក្យបណ្តឹងណាមួយនោះ។ លោកបន្ថែមថា៖ «ការលើកឡើងបើសិនជាខុស ឬត្រូវបែបណាក៏ដោយ តែវាជាទស្សនៈ ខ្ញុំគិតថា …ក្នុងដំណាក់កាលបច្ចុប្បន្នយើងឃើញថាតុលាការហាក់មិនទាន់មានឯករាជ្យពិតប្រាកដដែលអាចឲ្យភាគីទាំងពីរទទួលបានយុត្តិធម៌ពិតប្រាកដ»។
ទាក់ទងនឹងឃាតកម្មលោក កែម ឡី នេះ សាលាដំបូងរាជធានីភ្នំពេញនឹងបើកសវនាការនៅដើមខែក្រោយដោយគេមិនឃើញមានជនសង្ស័យណាផ្សេងទៀតក្រៅពីជនជាប់ចោទឈ្មោះ ជួប សម្លាប់ ដែលត្រូវបានចាប់ឃាត់ខ្លួនបានភ្លាមៗនៅថ្ងៃកើតហេតុនោះ ខណៈដែលក្រុមគ្រួសារសពបានបដិសេធទទួលស្គាល់ជននេះ។
ចំណែកអតីតមេបក្សប្រឆាំងលោក សម រង្ស៊ី បានសរសេរនៅលើទំព័រហ្វេសប៊ុករបស់លោកកាលពីថ្ងៃទី ១០ ខែកុម្ភៈ ឆ្នាំ ២០១៧ នេះថាកាលពីថ្ងៃទី ៩ ខែកុម្ភៈ តុលាការរដ្ឋកាលីហ្វ័រនីញ៉ា សហរដ្ឋអាមេរិក បានសម្រេចទទួលយកសំណើរបស់លោកដែលបានទាមទារឲ្យក្រុមហ៊ុន Chevron ដែលជាម្ចាស់ស្ថានីយប្រេងឥន្ធនៈកាល់តិចនៅកម្ពុជាបង្ហាញវីដេអូកាមេរ៉ាសុវត្ថិភាពដែលបានថតរូបសកម្មភាពបាញ់សម្លាប់លោក កែម ឡី កាលពីថ្ងៃទី ១០ ខែកក្កដា ឆ្នាំ ២០១៦ នោះហើយ។
បណ្តឹងប្រហាក់ប្រហែលគ្នានេះដែរក៏កើតមានលើអតីតមេបក្សប្រឆាំងលោក សម រង្ស៊ី និងសមាជិកព្រឹទ្ធសភាគណបក្សប្រឆាំងម្នាក់គឺលោកស្រី ឡាក់ ថានី ផងដែរដោយមានការលើកឡើងថាអ្នកទាំងពីរបានធ្វើការចោទប្រកាន់ថាលោកនាយករដ្ឋមន្ត្រីជាអ្នកនៅពីក្រោយការសម្លាប់លោក កែម ឡី៕
No comments:
Post a Comment