ការតវ៉ានេះបានផ្ទុះឡើងនៅថ្ងៃទី ២ ធ្នូ នៅក្នុងបរិវេណវិទ្យាល័យកំពង់ធំក្នុងសង្កាត់អាចារ្យលាក់ ក្រុងស្ទឹងសែន ខេត្តកំពង់ធំដោយមានលោកគ្រូ អ្នកគ្រូ ១៣៣ នាក់ និងសិស្សានុសិស្សជាង ២០០០ នាក់កាន់បដានៅទីកន្លែងគោរពទង់ជាតិចាប់ពីម៉ោង ៧ ព្រឹករហូតដល់ម៉ោង ១១ ទើបរំសាយក្រោយពីលោក ហួន វ៉ានិត អភិបាលរងខេត្តកំពង់ធំបានមកចូលរួមសម្រុះសម្រួល និងពន្យារពេលដោះស្រាយទំនាស់រវាងមន្ត្រីកងរាជអាវុធហត្ថខេត្តកំពង់ធំ។
លោក ហួន វ៉ានិត បានឲ្យដឹងពីម្សិលមិញថាករណីនេះកើតចេញពីការយល់ច្រឡំគ្នា និងការកាន់ជើងកូនទើបបណ្ដាលឲ្យមានការស្ដីបន្ទោសគ្នាតិចតួច ប៉ុន្ដែក្រោយពីយើងបានសម្របសម្រួសភាគីទាំងពីរក៏បានស្រុះស្រួសគ្នា អង្គុយតុ ជជែកគ្នាម្ដងទៀតនៅថ្ងៃនេះ។
លោកបញ្ជាក់ថា៖ «វាជារឿងតូចតាចដោយសារតែរឿងយល់ច្រឡំគ្នាព្រោះការស្រឡាញ់កូនពេក ហើយខ្ញុំក៏បានទៅសម្រុះសម្រួលឲ្យរំសាយខ្ញុំក៏បានកោះហៅភាគីទាំង ២ មកជជែកគ្នារកដំណោះស្រាយ ហើយមន្ត្រីកងរាជអាវុធហត្ថក៏គាត់យល់ព្រមសុំទោសដែរ។ ខ្ញុំថាលោកគ្រូ អ្នកគ្រូមិនបញ្ជូនលិខិតអ្វីទៅថ្នាក់លើទៀតទេព្រោះយើងអាចដោះស្រាយបាន។ អត់អីទេថ្ងៃនេះយើងជជែកគ្នាហើយ»។
លោកស្រី កូយ គឹមហេង នាយិកាវិទ្យាល័យកំពង់ធំបានឲ្យដឹងថាកាលពីថ្ងៃទី ១៦ ខែវិច្ឆិកាឆ្នាំនេះសិស្សស្រីម្នាក់ឈ្មោះ ជា ភុំភួង រៀនថ្នាក់ទី ១០B បានមករៀនយឺតម៉ោង ២០ នាទីស្របពេលដែលសាលាកំពុងបង្រៀនពីច្បាប់ចរាចរណ៍ដល់សិស្សជាង ២០០០ នាក់ក្នុងបរិវេណដងទង់ជាតិ ស្របពេលនោះក្មេងស្រីឈ្មោះ ជា ភុំភួង ដើរចូលមកហើយពាក់អាវខូវប៊យពីក្រៅ។
ពេលនោះលោកស្រីបានប្រាប់ឲ្យដោះអាវក្រៅចេញ និងឲ្យឈរនៅក្រៅជួរដើម្បីបង្ហាញកំហុសចំពោះមុខសិស្ស និងលោកគ្រូអស់រយៈពេល ៣០ នាទី។
លោកស្រីបញ្ជាក់ថា៖ «យើងជាលោកគ្រូ អ្នកគ្រូមានបំណងទាមទារឲ្យឪពុកសិស្សឈ្មោះ ជា ភុំភួង ដែលជាមន្ត្រីអាវុធហត្ថខេត្តកំពង់ធំ និងប្រពន្ធឈ្មោះ គង់ សំណាង ព្រមទាំងសាច់ញាតិម្នាក់ទៀតឈ្មោះ គង់ សណ្តាន ជានាយកសាលាបឋមសិក្សាត្រពាំងវែងសុំទោសដល់គ្រូបង្រៀននៅវិទ្យាល័យកំពង់ធំជាសាធារណៈ»។
លោក សួស សុវណ្ណា មេបញ្ជាការរងកងរាជអាវុធហត្ថខេត្តកំពង់ធំមិនអាចទាក់ទងសុំការបញ្ជាក់បានទេ ដោយលោកថាកំពុងជាប់រវល់មិនអាចនិយាយទូរស័ព្ទបានទេកាលពីម្សិលមិញ។
ប៉ុន្ដែលោក សួស សុវណ្ណា បានសួរទៅលោកស្រី កូយ គឹមហេង នាយិកាវិទ្យាល័យកំពង់ធំពីការដាក់ទណ្ឌកម្មឲ្យកូនស្រីខ្លួនឲ្យឈរមុខទង់ជាតិដោយលោកថាការធ្វើបែបនេះប៉ះពាល់កិត្តិយសគ្រួសារលោក ឬខូចសតិអារម្មណ៍សិស្ស។ ម្យ៉ាងវិញទៀតការឲ្យឈរនៅសួនច្បារគោរពទង់ជាតិនេះវាបានប៉ះពាល់ដល់អារម្មណ៍យ៉ាងខ្លាំងរហូតមកដល់ពេលនេះ នាងខ្មាសគេហើយភ្លេចភ្លាំង។
អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជាយល់ឃើញថា ជាធម្មតាសាលារៀន ឬស្ថាប័នណាមួយតែងមានបទបញ្ជាផ្ទៃក្នុង ឬវិន័យរបស់គេ។ ដូច្នេះតាងនាមយើងជាអ្នកគោរពវិន័យ យើងត្រូវតែគោរពហើយវិន័យទាំងនេះមិនមែនគេបង្កើតមកសម្រាប់បង្រៀនឲ្យមនុស្សប្រព្រឹត្តអាក្រក់ទេ ហើយបើយើងអាងអំណាច ឬបុណ្យស័ក្ដិរបស់ឪពុកមិនធ្វើតាមបទបញ្ជាផ្ទៃក្នុងនោះទេយើងមិនបាច់ឲ្យកូនទៅរៀននៅទីនោះទេ។
អ្នកស្រីបានបញ្ជាក់ថា៖ «ការដាក់ពិន័យសិស្សនេះមិនមែនជាការធ្វើឲ្យបាត់បង់កិត្តិយស ឬជាការខ្មាសអៀនអ្វីទេផ្ទុយទៅវិញវាបង្រៀនមនុស្សឲ្យចេះគោរពច្បាប់ បង្រៀនមនុស្សឲ្យល្អ ហើយបើយើងមិនពេញចិត្តនឹងវិន័យហ្នឹងទេ កុំយកកូនមកឲ្យរៀននៅសាលា ហើយបង្រៀនខ្លួនឯងវិញទៅ។ ធម្មតាទេ កន្លែងគេ គេមានវិន័យរបស់គេអ៊ីចឹងហើយ»។
បើតាមញត្តិដែលដាក់ទៅលោកនាយករដ្ឋមន្ត្រី ហ៊ុន សែន កាលពីថ្ងៃទី ២ ខែធ្នូ បានបង្ហាញថាលោកគ្រូ អ្នកគ្រូសរុបចំនួន ១៣៣ នាក់ និងស្នាមមេដៃស្នើសុំដល់ប្រមុខរាជរដ្ឋាភិបាលលោក ហ៊ុន សែន ជួយអន្តរាគមន៍ឲ្យលោក សួស សុវណ្ណា និងប្រពន្ធ ឈ្មោះ គង់ សំណាង ព្រមទាំងសាច់ញាតិម្នាក់ទៀតឈ្មោះ គង់ សណ្តាន ជានាយកសាលាបឋមសិក្សាត្រពាំងវែងធ្វើការសុំទោសដល់គ្រូបង្រៀននៅវិទ្យាល័យកំពង់ធំជាសាធារណៈចំពោះទង្វើដែលបុគ្គលទាំង ៣ រូបនេះបាននាំគ្នាធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់គ្រូបង្រៀនទាំងអស់នៅក្នុងវិទ្យាល័យ។
ញត្តិបន្តថាលោក សួស សុវណ្ណា និងគ្រួសារមកបង្ករឿងជាហេតុនាំឲ្យខូចសណ្ដាប់ធ្នាប់ ការសិក្សារបស់សិស្ស និងកិត្តិយសរបស់គ្រូក្នុងវិទ្យាល័យកំពង់ធំដោយកើតឡើងពីរឿងកាន់ជើងកូនតែបន្ដិចបន្តួច មិនស្ដាប់ហេតុផល មកច្រឡោតរករឿងគ្រូទាំងអស់គ្នានៅក្នុងវិទ្យាល័យកំពង់ធំ៕
No comments:
Post a Comment