មេធាវីរបស់លោក អ៊ូ ច័ន្ទរ័ត្ន គឺលោក ផែង ហេង បានយកបណ្ដឹងសើរើថ្មីនេះទៅដាក់នៅតុលាការកំពូល កាលពីថ្ងៃទី២៨ ខែធ្នូ ដើម្បីប្ដឹងតវ៉ាលើដីកាសម្រេចរបស់តុលាការនេះ កាលពីថ្ងៃទី១៣ ខែធ្នូ ដែលច្រានចោលបណ្ដឹងលោក អ៊ូ ច័ន្ទរ័ត្ន សុំឱ្យជំនុំជម្រះសាជាថ្មីលើសំណុំរឿងពាក់ព័ន្ធនឹងការរំលាយគណបក្សសង្គ្រោះជាតិ ការសុំឱ្យចេញរក្សាការពារតំណែងសមាជិកក្រុមប្រឹក្សា រាជធានី-ខេត្ត ក្រុង-ស្រុក-ខណ្ឌ និងឃុំ-សង្កាត់ និងបណ្ដឹងទាមទារសិទ្ធិធ្វើនយោបាយរបស់មន្ត្រីគណបក្សប្រឆាំងចំនួន ១១៨នាក់ឡើងវិញ។
តុលាការកំពូលបញ្ជាក់ថា មូលហេតុដែលតុលាការមិនចាត់ការលើបណ្ដឹងសើរើករណីរំលាយគណបក្សសង្គ្រោះជាតិ ដោយសារសាលដីកាតុលាការជាន់ខ្ពស់មួយនេះ ជាសាលដីកាបិទផ្លូវតវ៉ា។
សហគមន៍អន្តរជាតិបានធ្វើការថ្កោលទោសជាខ្លាំង និងគំរាមដាក់ទណ្ឌកម្មមកលើរដ្ឋាភិបាលកម្ពុជា ថែមទៀត ដោយសារតែរដ្ឋាភិបាលបានសម្លាប់លទ្ធិប្រជាធិបតេយ្យនៅកម្ពុជា។ រហូតមកទល់ពេលនេះ សភាអឺរ៉ុបបានសម្រេចបិទប្រព័ន្ធអនុគ្រោះពន្ធនាំចេញផលិតផលកាត់ដេរ និងទំនិញគ្រប់ប្រភេទរបស់កម្ពុជា មកលក់នៅទីផ្សារអឺរ៉ុប ហើយសហរដ្ឋអាមេរិកឯណេះវិញ ក៏បានសម្រេចបិទទិដ្ឋាការដល់មន្ត្រីរដ្ឋាភិបាលកម្ពុជា ជាន់ខ្ពស់មិនអោយជាន់ទឹកដីសហរដ្ឋអាមេរិក។
ជាងនេះទៅទៀត ក្រុមសមាជិកសភាតំណាងរាស្ត្រអាមេរិក ក៏កំពុងពិចារណាបង្កកទ្រព្យសម្បត្តិរបស់បុគ្គលទាំងឡាយដែលចូលរួមរំលាយគណបក្សសង្គ្រោះជាតិ ថែមទៀត តាមរយៈការពិនិត្យលើបញ្ជីឈ្មោះ និងបញ្ជីរាយនាមក្រុមហ៊ុនសាជីវកម្មទាំងឡាយនៅកម្ពុជា។
ឧបការីរងរដ្ឋមន្ត្រីក្រសួងការបរទេសអាមេរិក លោក ផាតទ្រិក មើហ្វី (Patrick Murphy) កាលពីដើមខែធ្នូ បានជំរុញអោយលោក ហ៊ុន សែន ប្រញាប់បង្វែរស្ថានការណ៍របស់ប្រទេសវិលមករកភាពប្រក្រតីវិញដោយអាមេរិក ទុកពេលមួយរយៈអោយរដ្ឋាភិបាលទីក្រុងភ្នំពេញ ធ្វើការពិចារណាលើបញ្ហានេះ មុនពេលសហរដ្ឋអាមេរិក បោះជំហានដ៏ធំរបស់ខ្លួនក្នុងការដាក់ទណ្ឌកម្មបន្ថែមដល់រដ្ឋាភិបាលកម្ពុជា នោះ៕
No comments:
Post a Comment