kh-cnn: February 2017

Monday, February 27, 2017

លោក ត្រាំ បានចំអកដល់ការបោះឆ្នោតជ្រើសរើសប្រធានថ្មីរបស់គណបក្សប្រជាធិបតេយ្យ

លោក Tom Perez ប្រធានថ្មីរបស់គណបក្សប្រជាធិបតេយ្យថ្លែងក្រោយពេលត្រូវបានបោះឆ្នោតជ្រើសរើសនៅស្នាក់ការគណៈកម្មាធិការគណបក្សប្រជាធិបតេយ្យ ក្នុងរដ្ឋធានីវ៉ាស៊ីនតោន កាលពីថ្ងៃទី២៥ ខែកុម្ភៈ។

ប្រធានាធិបតីអាមេរិក លោក ដូណាល់ ត្រាំ កំពុងតែចំអកដល់ការបោះឆ្នោតរបស់គណបក្សប្រជាធិបតេយ្យ ដែលបានជ្រើសរើសយកលោក Tom Perez អតីតរដ្ឋមន្ត្រីក្រសួងការងារឲ្យធ្វើជាប្រធានគណៈកម្មាធិការជាតិរបស់ពួកគេ ខណៈដែលគណបក្សនេះព្យាយាមបង្រួបបង្រួមគ្នាឡើងវិញ ក្រោយពីខកចិត្តយ៉ាងខ្លាំងបន្ទាប់ពីចាញ់ឆ្នោតទៅលោក ត្រាំ កាលពីខែវិច្ឆិកា។
នៅក្នុងប្រអប់បញ្ចេញមតិលើគណនី Twitter របស់ខ្លួន លោក ត្រាំ ខាងគណបក្សសាធារណរដ្ឋបានមានប្រសាសន៍ថា លោក«មិនមានអ្វីសប្បាយចិត្តជាងនេះទៀតទេ»សម្រាប់លោក Perez ឬ «សម្រាប់គណបក្សសាធារណរដ្ឋនោះ»។
លោក ត្រាំ បានប្រៀបធៀបការប្រកួតប្រជែងកាលពីថ្ងៃសៅរ៍ទៅនឹងការប្រកួតប្រជែងកាលពីឆ្នាំមុន ដើម្បីធ្វើជាបេក្ខជនប្រធានាធិបតីខាងគណបក្សប្រជាធិបតេយ្យ ដែលនៅទីបំផុតលោកស្រី Hillary Clinton អតីតរដ្ឋមន្ត្រីក្រសួងការបរទេសអាមេរិកអាចយកឈ្នះលើលោក Bernie Sanders សមាជិកព្រឹទ្ធសភារដ្ឋ Vermont ដែលជាការពេញចិត្តរបស់គណបក្សប្រជាធិបតេយ្យដែលនិយមទៅលើការធ្វើកំណែទម្រង់ ប៉ុន្តែនៅទីបំផុតនៅតែចាញ់លោក ត្រាំ ដដែល។
លោក ត្រាំ បាននិយាយកាលពីថ្ងៃអាទិត្យថា៖ «លោកស្រី Clinton ចង់បានលោក Perez» ខណៈដែលបេក្ខជនដែលគាំទ្រលោក Bernie ក៏ដូចជាលោក Bernie ខ្លួនឯង មិនដែលមានឱកាសម្តងណាឡើយ»។
លោក Perez ដែលទទួលបានការគាំទ្រពីអតីតប្រធានាធិបតី លោក បារ៉ាក់ អូបាម៉ា ដែលធ្លាប់បម្រើការក្នុងរដ្ឋបាលរបស់លោក បានឈ្នះនៅក្នុងការប្រជែងក្នុងគណបក្សប្រជាធិបតេយ្យលើលោក Keith Ellison សមាជិកសភារដ្ឋ Minnesota ដោយទទួលបានសំឡេងគាំទ្រ ២៣៥ទល់នឹង ២០០៕

អភិបាលរដ្ឋនានានៅអាមេរិកនឹងផ្តោតទៅលើកិច្ចខិតប្រឹងប្រែងជួយកុមារអត់ឃ្លាននិងស្តារហេដ្ឋារចនាសម្ព័ន្ធ

អភិបាលរដ្ឋ Mississippi លោក Phil Bryant កំពុងមើលឯកសារក្នុងពេលបើកអង្គប្រជុំនៃសមាគមអភិបាលរដ្ឋថ្នាក់ជាតិប្រចាំឆ្នាំ (NGA) នៅរដ្ឋធានីវ៉ាស៊ីនតោន កាលពីថ្ងៃទី២៥ ខែកុម្ភៈ។

កិច្ចប្រជុំថ្នាក់ជាតិរបស់មេដឹកនាំប្រចាំរដ្ឋនីមួយៗនៅអាមេរិកបានបន្តរហូតដល់ថ្ងៃអាទិត្យក្នុងរដ្ឋធានីវ៉ាស៊ីនតោន ជាមួយនឹងការផ្តោតទៅលើកិច្ចខិតប្រឹងប្រែងជួយដល់កុមារអត់ឃ្លាននិងស្តារហេដ្ឋារចនាសម្ព័ន្ធ។
កិច្ចប្រជុំសមាគមអភិបាលរដ្ឋថ្នាក់ជាតិប្រចាំឆ្នាំហៅកាត់ថា NGA ត្រូវបានធ្វើឡើង ក្រោយពីលោកប្រធានាធិបតី ដូណាល់ ត្រាំ បានចេញបទបញ្ជាប្រធានាធិបតីកាលពីពេលថ្មីៗនេះឲ្យរឹតបន្តឹងជាងមុនទៅលើជនអន្តោប្រវេសន៍ខុសច្បាប់ប្រមាណ១១លាននាក់នៅក្នុងសហរដ្ឋអាមេរិក ដែលក្នុងនោះកាត់បន្ថយថវិកាសហព័ន្ធរាប់ពាន់លានដុល្លារដល់ទីក្រុងដែលស្ថិតនៅជិតច្រកព្រំដែន ដែលមិនសូវសហការជាមួយនឹងអាជ្ញាធរអន្តោប្រវេសន៍សហព័ន្ធ។
ផែនការរបស់លោក ត្រាំ រួមមានទាំងការផ្តល់អំណាចដល់ភ្នាក់ងារអនុវត្តច្បាប់នៅក្នុងតំបន់ឲ្យដើរតួជាភ្នាក់ងារអន្តោប្រវេសន៍ថែមទៀតផង។
នៅក្នុងបទសម្ភាសន៍ជាមួយនឹង VOA មេដឹកនាំប្រចាំរដ្ឋជាច្រើនបាននិយាយថា ពួកគេចង់ឃើញជនអន្តោប្រវេសន៍ និងជនភៀសខ្លួនដែលទើបតែមកដល់សហរដ្ឋអាមេរិក ទទួលបានជោគជ័យនៅក្នុងជីវិតថ្មីរបស់ពួកគេ។ មេដឹកនាំទាំងនោះក៏សង្កត់ធ្ងន់ថា គ្រប់គ្នាគួរតែត្រូវបានគេសណ្តោសប្រណីនិងក្នុងឥរិយាបថសមហេតុផល ខណៈដែលរដ្ឋនៅតែអនុវត្តតាមច្បាប់។
លោក Terry McAuliffe ដែលជាប្រធាន NGA និងជាអភិបាលរដ្ឋ Virginia បានមានប្រសាសន៍ថា លោកចាត់ទុកវិធានការថ្មីថាគ្មានក្រមសីលធម៌ និងខុសច្បាប់៕

បងប្រុសឪពុកតែមួយម្តាយទីទៃរបស់មេដឹកនាំកូរ៉េខាងជើងស្លាប់ក្នុងរយៈពេល២០នាទីក្រោយរងការវាយប្រហារ

បុគ្គលិកផ្នែកស្រាវជ្រាវសារធាតុគ្រោះថ្នាក់កំពុងស្កែនតំបន់មានសុវត្ថិភាពនៅឯព្រលានយន្តហោះអន្តរជាតិ នៅទីក្រុងកូឡាឡាំពួរ កាលពីថ្ងៃទី២៦ ខែកុម្ភៈ។

អាជ្ញាធរសុខាភិបាលម៉ាឡេស៊ីនិយាយថា លោក Kim Jong Nam «ទទួលរងការឈឺចាប់យ៉ាងខ្លាំងមុននឹងស្លាប់» ហើយលោកបានស្លាប់ក្នុងរយៈពេល២០នាទីក្រោយពីត្រូវបានគេវាយប្រហារនៅឯអាកាសយានដ្ឋានអន្តរជាតិកូឡាឡាំពួរ។
ប៉ូលិសថ្លែងថា បងប្រុសឪពុកតែមួយម្តាយទីទៃរបស់មេដឹកនាំកូរ៉េខាងជើង Kim Jong Un រូបនេះ ត្រូវបានគេធ្វើឃាតកាលពីថ្ងៃសុក្រ ទី១៣ នៅឯអាកាសយានដ្ឋានកូឡាឡាំពួរ ដោយប្រើប្រាស់សារធាតុគីមី VX។
«លោក Kim Jong Nam បានទទួលមរណភាពនៅក្នុងរថយន្តសង្គ្រោះបន្ទាន់។ លោកបានសន្លប់នៅក្នុងមន្ទីរព្យាបាល។ ក្រោយពីរងការវាយប្រហារ លោកបានស្លាប់ក្នុងរយៈពេល១៥ ទៅ ២០នាទី»។ នេះបើយោងតាមសម្តីរបស់លោក Sathasivam Subramanian រដ្ឋមន្ត្រីក្រសួងសុខាភិបាលម៉ាឡេស៊ី ដែលបានថ្លែងប្រាប់អ្នកយកព័ត៌មាន។
ប៉ូលិសថ្លែងថា លោក Kim Jong Nam មានអារម្មណ៍ថាមានមនុស្សម្នាក់ចាប់ទាញមុខរបស់លោកពីខាងក្រោយ»។
រូបភាពក្នុងវីដេអូ CCTV មួយបង្ហាញឲ្យឃើញស្ត្រី២នាក់បាញ់ទឹកអ្វីមួយដាក់លើមុខរបស់លោក Kim។
ប៉ូលិសបានចាប់ខ្លួនស្ត្រីទាំង២នាក់ឃុំខ្លួន និងបុរសជនជាតិកូរ៉េខាងជើងម្នាក់ដែលជាប់សង្ស័យថាជាអ្នកនៅពីក្រោយការវាយប្រហារនេះ៕

រូបភាពជុំវិញពិភពលោក ២៦ កុម្ភៈ ២០១៧

27 កុម្ភៈ 2017

រូបភាពជុំវិញពិភពលោកថ្ងៃទី២៦ ខែកុម្ភៈ ឆ្នាំ២០១៧ មកពីប្រទេសអ៊ីរ៉ាក់ ស៊ីរី ម៉ាឡេស៊ី រុស្ស៊ី ប្រេស៊ីល ឥណ្ឌា បេឡារុស អ៊ីតាលី អេស្ប៉ាញ ជប៉ុន កៀហ្ស៊ីស៊ីស្ថាន និងហ្វាំងឡាំង។

ផ្សេងទៀត

ជនជាតិអ៊ីរ៉ាក់រត់ភៀសខ្លួនចេញពីផ្ទះសម្បែងនៅពេលដែលកម្លាំងអ៊ីរ៉ាក់ប្រយុទ្ធជាមួយនឹងយុទ្ធជនរដ្ឋឥស្លាម នៅក្នុងក្រុង Mosul។

ប្រុសៗ និងអ្នកស្ម័គ្រនៃទីភា្នក់ងារការពារជនស៊ីវិលរបស់ស៊ីរី ពន្លត់អគ្គិភ័យបន្ទាប់ពីមានការវាយប្រហារតាមអាកាសនៅលើក្រុង Douma ដែលកាន់កាប់ដោយឧទ្ទាមនៅ ជាយក្រុង Damascus។

ទាហានកិត្តិយសរង់ចាំការអញ្ជើញមកដល់របស់ស្តេច Salman របស់អារ៉ាប់សាអូឌីតនៅវិមានប្រធានាធិបតីនៅក្នុងក្រុងគូឡាឡាំពួ ប្រទេសម៉ាឡេស៊ី។

អ្នកជិះស្គី និងអ្នកជិះក្តាររំអិលរាប់រយនាក់ជិះចុះពីជម្រាលមួយនៅពេលកាន់ពន្លឺភ្លើងនៅក្នុងក្រុង Zheleznogorsk ប្រទេសរុស្ស៊ី។

អ្នករបាំរបស់សាលា Imperio de Casa Verde សម្តែងក្នុងរាត្រីទី២នៃពិធីដង្ហែក្បួន នៅទីលាន Sambadrome ក្នុងក្រុង Sao Paulo ប្រទេសប្រេស៊ីល។

អ្នកគោរពសាសនាហិណ្ឌូក្មេងៗ ដែលមានចងផ្លែក្រូច និងផ្លែ Paladai រង់ចាំចូលរួមនៅក្នុងការដង្ហែមួយដើម្បីប្រារព្ធពិធី Shivratri នៅក្នុងក្រុង Chennai។

អ្នកលក់នៅតាមផ្លូវដែលលក់វត្ថុអនុស្សាវរីយ៍រង់ចាំភ្ញៀវក្នុងពេលធ្លាក់ព្រិលនៅក្នុងភូមិ Aziarco ប្រទេសបេឡារុស កាលពីថ្ងៃទី២៥ ខែកុម្ភៈ ឆ្នាំ២០១៧។

សមាជិកក្រុមប្រកួតត្រូវបានក្រុមម្ខាងទៀតគប់ក្រូចដាក់ ក្នុងពិធីគប់ក្រូចប្រចាំឆ្នាំនៅក្នុងក្រុង Ivrea ប្រទេសអ៊ីតាលី។

បុរសម្នាក់ឡើងលើសសរមួយដើម្បីបានរង្វាន់ក្នុងពិធីបុណ្យ Maslenitsa ដើម្បីសាទរការបញ្ចប់នៃរដូវរងា នៅក្បែរក្រុង Rumyantsevo ប្រទេសរុស្ស៊ី។

អ្នកធ្វើដំណើរកម្សាន្តម្នាក់ តុបតែងជា «បិសាច Diablos de Luzon» ហើយអ្នកផ្សេងតុបតែងជាកីឡាករ Mascaritas ចូលរួមនៅក្នុងពិធីបុណ្យនៅក្នុងភូមិ Luzon ប្រទេសអេស្ប៉ាញ កាលពីថ្ងៃទី២៥ ខែកុម្ភៈ ឆ្នាំ២០១៧។

ម្ចាស់មេដាយមាស Choi Da-bin របស់កូរ៉េខាងត្បូង សម្តែងនៅក្នុងពិធីបិទវគ្គនៃការប្រកួត Asian Winter Games នៅទីលាន Makomanai Indoor Skating Rink នៅក្នុងក្រុង Sapporo ប្រទេសជប៉ុន។

អ្នកចូលចិត្តកំប្លែងជាង២.០០០នាក់ដែលគេហៅថា Schuttige ចូលរួមនៅក្នុងការដើរក្បួនSchuttige ប្រពៃណី នៅក្នុងក្រុង Elzach ប្រទេសអាល្លឺម៉ង់។

យុវជនឥណ្ឌាម្នាក់ចូលរួមនៅក្នុងការលោតលេងមួយដែលគេហៅថា «bunjee jumping» នៅពេលថ្ងៃលិច ក្នុងពិធីបុណ្យ Bhoj Adventure Festival ឆ្នាំ២០១៧ នៅក្នុងក្រុង Bhopal ប្រទេសឥណ្ឌា កាលពីថ្ងៃទី២៥ ខែកុម្ភៈ ឆ្នាំ២០១៧។

អ្នកសម្តែងរបស់ប្រទេសកៀហ្ស៊ីស៊ីស្ថាន ដែលស្លៀកពាក់សម្លៀកបំពាក់ប្រពៃណី ច្រៀង និងរាំ ក្នុងពិធីបុណ្យ Maslenitsa នៅក្នុងក្រុងប៊ីស្កេក (Bishkek) ប្រទេសកៀហ្ស៊ីស៊ីស្ថាន។

កីឡាការនី Svenja Wuerth របស់អាល្លឺម៉ង់លោតនៅក្នុងការប្រកួតជើងឯក FIS Nordic World Ski Championships ប្រចាំឆ្នាំ២០១៧ នៅក្នុងក្រុង Lahti ប្រទេសហ្វាំងឡង់។

ព្រះច័ន្ទរះកាត់ព្រះអាទិត្យ បង្កើតបានជាសូរគ្រាសមួយ ដែលរូបនេះថតបានពីក្រុង Sao Paulo ប្រទេសប្រេស៊ីល។

ប្រទេសឥណ្ឌាជាប់កំណត់ត្រាក្នុងការបង្ហោះផ្កាយរណបចំនួន១០៤គ្រឿងក្នុងទីអវកាស

រូបថតដែលបញ្ចេញដោយអង្គការស្រាវជ្រាវអវកាសឥណ្ឌា ISRO បង្ហាញពីបំពង់ផ្កាយរណបដែលត្រូវបានបង្ហោះចេញពីមជ្ឈមណ្ឌលអវកាស Satish Dhawan ក្នុងតំបន់ Sriharikota ប្រទេសឥណ្ឌា កាលពីថ្ងៃទី១៥ ខែកុម្ភៈ ឆ្នាំ២០១៧។

កាំជ្រួចឥណ្ឌាមួយគ្រឿងដែលមានផ្ទុកផ្កាយរណបត្រូវបានបង្ហោះនៅព្រឹកថ្ងៃទី១៥ ខែកុម្ភៈ ចេញពីតំបន់ Sriharikota នៅភាគខាងកើតប្រទេសឥណ្ឌា។ គ្រាប់កាំជ្រួចនេះបានជាប់កំណត់ត្រាដោយបានបង្ហោះផ្កាយរណបចំនួន ១០៤ គ្រឿងក្នុងពេលតែមួយទៅក្នុងទីអវកាស គឺបាននាំមុខប្រទេសរុស្ស៊ីដែលធ្លាប់បានបង្ហោះផ្កាយរណបចំនួន ៣៧ គ្រឿង ក្នុងពេលតែមួយ ដែលធ្វើឡើងកាលពីប្រហែលមួយឆ្នាំកន្លងទៅ នេះបើយោងតាមការអះអាងរបស់ទីភ្នាក់ងារអវកាសឥណ្ឌា។

ញូវដែលី — ការបង្ហោះនេះ ក៏បង្ហាញពីដំណាក់កាលមួយដ៏សំខាន់នៃការខិតខំប្រឹងប្រែងរបស់ប្រទេសមួយនេះ ក្នុងការបង្ហាញថា ខ្លួនជាគូប្រជែងមួយដ៏មុះមុតក្នុងឧស្សាហកម្មអវកាសពាណិជ្ជសាកលក្នុងចំនួនទឹកប្រាក់រាប់ពាន់លានដុល្លារ ដោយកាត់បន្ថយការចំណាយបានយ៉ាងច្រើន។

ក្រៅពីផ្កាយរណបទម្ងន់ ៧១៤ គីឡូក្រាមសម្រាប់សង្កេតមើលមកលើភពផែនដី ផ្កាយរណបដទៃផ្សេងទៀតគឺភាគច្រើនមានសណ្ឋានតូចៗ ដែលមានទម្ងន់ត្រឹម ១០ គីឡូក្រាមប៉ុណ្ណោះ។ ផ្កាយរណបទាំងអស់នេះភាគច្រើនជារបស់អ្នកជំនួញនានាក្នុងសហរដ្ឋអាមេរិក ហើយក្រៅពីនេះជារបស់ប្រទេសកាហ្សាក់ស្ថាន ហូឡង់ ស្វីស និងអេមីរ៉ាតអារ៉ាប់រួម។
ព្រឹត្តិការណ៍នៃការបង្ហោះនេះ ត្រូវបានចាក់ផ្សាយតាមកញ្ចក់ទូរទស្សន៍ទូទាំងប្រទេសឥណ្ឌា និងបានបង្ហាញពីការអបអរសាទររបស់ក្រុមអ្នកវិទ្យាសាស្ត្រក្នុងដំណាក់កាលដ៏ជោគជ័យនៃបន្ទប់គ្រប់គ្រងបេសកកម្មយានអវកាស។
លោក B Jayakumar នាយរងនៃគម្រោងមួយ បានហៅការបង្ហោះនេះថាជា «ព្រឹត្តិការណ៍ដ៏អស្ចារ្យបំផុត» សម្រាប់អង្គការស្រាវជ្រាវអវកាសឥណ្ឌា ដែលហៅកាត់ថា ISRO ហើយលោកបានថ្លែងថា៖ «ការធ្វើអ្វីមួយដែលថ្មី តាមបែបនវានុវត្តន៍ និងប្រកបដោយភាពជោគជ័យ គឺជាមហិច្ឆតារបស់គ្រប់គ្នានៅក្នុងអង្គការ ISRO»។
កម្មវិធីអវកាសរបស់ប្រទេសឥណ្ឌា ផ្ដោតជាសំខាន់ទៅលើការហោះទៅកាន់ទីអវកាសដោយចំណាយប្រាក់តិច។ ក្រុមអ្នកវិភាគបានយល់ឃើញថា សមត្ថភាពក្នុងការបង្ហោះផ្កាយរណបដ៏ច្រើនក្នុងទីអវកាសក្នុងពេលតែមួយ គឺបានកាត់បន្ថយការចំណាយបានយ៉ាងច្រើន ដែលការធ្វើដូច្នេះអាចជួយឲ្យប្រទេសមួយនេះច្បាមយកទីផ្សារបានយ៉ាងធំក្នុងការបង្ហោះថ្នាក់អន្តរជាតិ។
លោកស្រី Rajeswari Pillai Rajagopalan អ្នកវិភាគផ្នែកអវកាសនៃមូលនិធិស្រាវជ្រាវសម្រាប់អ្នកឃ្លាំមើលនៅក្នុងរដ្ឋធានីញូវដែលី (New Delhi's Observer Research Foundation) បាននិយាយថា៖ «ការបង្ហោះដោយបានបំបែកកំណត់ត្រាដោយគ្រាន់តែបង្ហោះតែម្តងនេះ ពិតជាបញ្ជាក់យ៉ាងច្បាស់អំពីភាពរីកចម្រើន និងភាពទាន់សម័យរបស់ឥណ្ឌា និងសមត្ថភាពក្នុងការពង្រីកកម្មវិធីអវកាសរបស់ឥណ្ឌា»។ លោកស្រីបានបន្តថា ភាពជោគជ័យនៃបេសកកម្មថ្ងៃ១៥ ខែកុម្ភៈនេះ នឹងធ្វើឲ្យកេរ្តិ៍ឈ្មោះប្រទេសឥណ្ឌារីកសុះសាយលើកម្មវិធីអវកាសរបស់ខ្លួន។ លោកស្រីបានពន្យល់ថា៖ «ប្រទេសជាច្រើនទៀតនឹងមកទាក់ទងប្រទេសឥណ្ឌាដើម្បីឲ្យជួយក្នុងការងារបង្ហោះផ្កាយរណបរបស់ពួកគេទៅកាន់ទីអវកាស។
ការកើនឡើងនៃតម្រូវការនៃប្រព័ន្ធទំនាក់ទំនងដែលមានបច្ចេកវិទ្យាខ្ពស់របស់ប្រទេសនានា ក៏ដូចជាក្រុមហ៊ុនទូរស័ព្ទ និងអ៊ីនធឺណិតឯកជននានា តម្រូវឲ្យមានការបន្ថែមការបង្ហោះផ្កាយរណបបែបនេះកាន់តែច្រើនថែមទៀត។ កាលពីឆ្នាំមុន ប្រទេសឥណ្ឌាបានបង្ហោះផ្កាយរណបចំនួន ៧៥ សម្រាប់អតិថិជនបរទេស។
លោកនាយករដ្ឋមន្រ្តីឥណ្ឌា Narendra Modi បានបង្ហោះសារនៅលើបណ្តាញសង្គម Twitter ថា៖ «ជោគជ័យដ៏អស្ចារ្យរបស់អង្គការស្រាវជ្រាវ ISRO គឺជាព្រឹត្តិការណ៍ជាទីមោទនមួយទៀតសម្រាប់សហគមន៍វិទ្យាសាស្រ្តអវកាស និងប្រជាជាតិរបស់យើង។ ប្រទេសឥណ្ឌាសូមសម្តែងនូវការគោរពចំពោះក្រុមអ្នកវិទ្យាសាស្រ្តរបស់យើង»។
ប្រទេសឥណ្ឌាបានបង្កើនថវិកាសម្រាប់កម្មវិធីអវកាសរបស់ខ្លួនក្នុងឆ្នាំនេះ និងបានវិភាជធនធានសម្រាប់បេសកកម្មចម្បងទី២ ឆ្ពោះទៅភពអង្គារ និងបេសកកម្មទី១ ទៅភពសុក្រ (Venus) នៅប៉ុន្មានឆ្នាំខាងមុខនេះ។
កម្មវិធីអវកាសដែលមានមហិច្ឆតាខ្ពស់របស់ឥណ្ឌា បានទាក់ទាញការចាប់អារម្មណ៍ពីអន្តរជាតិក្នុងឆ្នាំ២០១៤ បន្ទាប់ពីប្រទេសនេះបានបំពេញបេសកកម្មយ៉ាងជោគជ័យទៅភពអង្គារ។ ថវិកាចំណាយសម្រាប់បេសកកម្មឆ្នាំ២០១៤ គឺមានប្រមាណ ៧៤ លានដុល្លារ គឺមានចំនួនតិចជាងឆ្ងាយបើប្រៀបធៀបទៅនឹងថវិកាដែលអង្គការ NASAរបស់សហរដ្ឋអាមេរិកបានចំណាយ ដែលមាន ទឹកប្រាក់ ៦៧០ដុល្លារសម្រាប់បេសកកម្មទៅភពអង្គារនៅប៉ុន្មានខែបន្ទាប់មក។ បេសកកម្មរបស់ប្រទេសឥណ្ឌាត្រូវបានគេកត់សម្គាល់ថាជាការបញ្ជាក់យ៉ាងច្បាស់ថា កម្មវិធីអវកាសដ៏ត្បិតត្បៀតរបស់ខ្លួនទទួលបានជំនាញផ្នែកបច្ចេកវិទ្យាដ៏ជោគជ័យ។
អង្គការស្រាវជ្រាវ ISRO ក៏គ្រោងនឹងបញ្ជូនបេសកកម្មទី២ ដើម្បីសិក្សាផ្ទៃភពព្រះចន្ទក្នុងឆ្នាំ២០១៨នេះ។ អង្គការនេះក៏កំពុងពិចារណាលើបេសកកម្មទៅភពអង្គារ និងបេសកកម្មទី១ ទៅភពសុក្រ (Venus) នៅប៉ុន្មានឆ្នាំខាងមុខនេះ។
ប្រទេសនានាមើលឃើញថា ការវាយលុកជាបឋមក្នុងបេសកកម្មទៅកាន់អន្តរភពរបស់ប្រទេសឥណ្ឌា គឺជាផ្នែកមួយនៃមហិច្ឆតារបស់ខ្លួនដើម្បីឲ្យគេមើលឃើញថា ឥណ្ឌាក៏ជាប្រទេសឈានមុនមួយក្នុងពិភពលោកដែរ។
លោកស្រី Rajagoplanan បាននិយាយថា៖ «ហេតុផលមួយនៃមហិច្ឆតាបែបនេះ គឺឥណ្ឌាចង់បង្ហាញពីជាតិនិយមអាស៊ី និងការប្រកួតប្រជែង។ មានផែនការផ្សេងៗទៀតជាច្រើនដែលកំពុងត្រូវបានរៀបចំដើម្បីបង្ហាញថា ប្រទេសឥណ្ឌាគឺជាប្រទេសមានអំណាចបច្ចេកវិទ្យាកំពូលមួយផ្នែកអវកាស»។
ក្រុមអ្នកវិទ្យាសាស្ត្របាននិយាយថា ស្របពេលដែលប្រទេសឥណ្ឌាបានអភិវឌ្ឍសមត្ថភាពក្នុងការបង្ហោះផ្កាយរណបមានសណ្ឋានតូចៗក្នុងទីអវកាសដូច្នេះ ប្រទេសនេះត្រូវការការខិតខំប្រឹងប្រែងបន្ថែមទៀតមុនពេលអាចបង្ហោះផ្កាយរណបធុនធ្ងន់បាន៕

លោក ហ៊ុន សែន ៖ ទប់ឲ្យបាន ស្អីៗចាំនិយាយគ្នាក្រោយ ដើម្បីការពារសន្តិភាព

លោក ហ៊ុន សែន (រូបភាពពីហ្វេសប៊ុកនាយករដ្ឋមន្ត្រី)

លោកនាយករដ្ឋមន្ត្រី ហ៊ុន សែន ដាក់បទបញ្ជាឲ្យមន្ត្រីរបស់ខ្លួន ចាត់វិធានការទប់ស្កាត់ឲ្យខាងតែបាន ទោះក្នុងរូបភាពណាក៏ដោយ នូវអ្វីដែលលោកហៅ ដើម្បីរក្សាសន្តិភាព សម្រាប់កម្ពុជា ដោយមិនសំដៅដល់ការលើកស្ទួយពីសិទ្ធិមនុស្ស។
ក្នុងពិធីមួយដែលធ្វើឡើងនៅទីស្តីការគណៈរដ្ឋមន្ត្រី នាថ្ងៃទី២៧ខែកុម្ភៈនេះ លោកនាយករដ្ឋមន្ត្រី ហ៊ុន សែន បានផ្តល់អនុសាសន៍ជាច្រើនដល់មន្ត្រីក្រោមឱវាទ ពីការការពង្រឹងអភិបាលកិច្ច រួមទាំងការពង្រឹងសសន្តិសុខ ការពារពលរដ្ឋនិងភ្ញៀវទេសចរណ៍ ដែលលោកថា ដើម្បីទាក់ទាញការចាប់អារម្មណ៍ ឲ្យបរទេសទេសមកទស្សនាកម្ពុជាម្តងទៀត។
លោក ហ៊ុន សែន បានរំឭកពីឥទ្ធិពលសង្គ្រាម ដែលកើតឡើងនៅកម្ពុជា កន្លងទៅថា អង្គវត្តខ្មែរ មានអាយុកាលជិត១០០០ឆ្នាំហើយ ប៉ុន្តែលោកថា តំបន់ទាក់ទាញទេសចរណ៍មួយនេះ គ្មានភ្ញៀវបរទេសមកកំសាន្តទេ អំឡុងទសវត្សរ៍៧០ដែលកម្ពុជាមានសង្គ្រាម។
លោក ហ៊ុន សែន ដាក់បទបញ្ជាថា ក្នុងរូបភាពណាក៏ដោយ ស្ថាប័នពាក់ព័ន្ធ ត្រូវទប់ស្កាត់ឲ្យបាន នូវអ្វីដែលោកហៅថា ដើម្បីរក្សាសន្តិភាពដូចដែលកម្ពុជា កំពុងរក្សាបានដូចពេលនេះ។
លោក ហ៊ុន សែន បានព្យាយាមការពារ បទបញ្ជារបស់លោក បែបនេះថា៖ «»
បើទោះជាការថ្លែង របស់លោក ហ៊ុន សែន នៅពេលនេះ មិនបានបញ្ចេញឈ្មោះទៅលើស្ថាប័នសិទ្ធិមនុស្ស ឬគណបក្សនយោបាយណាក៏ដោយ ប៉ុន្តែកន្លងទៅ កងកម្លាំង របស់រដ្ឋាភិបាល ធ្លាប់បង្ក្រាបមហាបាតុកម្ម របស់គណបក្សសង្គ្រោះប្រឆាំងលទ្ធផលបោះឆ្នោតក្រោយឆ្នាំ២០១៣ និងចុះកម្ទេច ជំរុំស្នាក់នៅរបស់បាតុករនៅទីលានប្រជាធិបតេយ្យ និងធ្លាប់ចោទថា មានអ្នកខ្លះចង់ផ្តួលរំលំរដ្ឋាភិបាល ជ្រកក្រោមស្លាកអង្គការសង្គមស៊ីវិល។
ការដាក់បញ្ជារបស់ប្រមុខរដ្ឋាភិបាលនេះធ្វើឡើង តែមួយថ្ងៃក្រោយពី លោក កឹម សុខា សរសេរនៅហ្វេសប៊ុក កាលពីម្សិលមិញថា «សន្តិភាពពិត គឺសន្តិភាពទាំងរូបកាយ (ខាងក្រៅ) និងសន្តិភាពទាំងផ្លូវចិត្ត (ខាងក្នុង)។ ការបញ្ចប់សង្គ្រាមប្រដាប់អាវុធ គឺជាផ្នែកមួយនៃសន្តិភាពក៏ពិតមែនហើយ។ផ្ទុយទៅវិញ ការដែលនៅតែធ្វើឲ្យខ្មែរបែកបាក់គ្នា ឈឺចាប់ទាំងផ្លូវកាយ ទាំងផ្លូវចិត្ត យ៉ាងច្រើនសន្ធឹកសន្ធាប់ដោយអយុត្តិធម៌ ពីសំណាក់អ្នកមានបំពានអ្នកក្រ អ្នកខ្លាំងរាំងខ្ទប់អ្នកខ្សោយ អ្នកឈ្នះកៀបសង្កត់អ្នកចាញ់។ នេះហើយគឺ ជាមូលហេតុនាំឲ្យមានការប្រឆាំងកាន់តែច្រើនទៅ ច្រើនទៅ ដូចពាក្យស្លោកមួយបានចែងថា៖ ទីណាមានការជិះជាន់ ទីនោះមានការរើបម្រះ។»
អ្នកឃ្លាំមើលពីការអភិវឌ្ឍសង្គម លោក ប៊ួ បញ្ញា លើកឡើងថា សង្គ្រាមនៅកម្ពុជានឹងមិនអាចកើតឡើងទេ ក្នុងសម័យកាលនេះ ដោយលោកថា សង្គ្រាមអាចផ្ទុះឡើងលុះណាតែភាគីម្ខាងទៀតមានមហាអំណាចគាំទ្រ ហើយមានអាវុធ ដូចពីសម័យអតីតកាល។លោកបន្តថា កម្ពុជាបច្ចុប្បន្នបានផ្តល់អំណាចឲ្យពលរដ្ឋជ្រើសរើសមេដឹកនាំតារយៈការបោះឆ្នោត៥ឆ្នាំម្តង។
បើតាមលោក ប៊ួ បញ្ញា បទបញ្ជារបស់លោក ហ៊ុន សែន ពេលនេះជាបំភិតបំភ័យពលរដ្ឋ ច្រើនជាងបើកឲ្យមានអំហូសេរីភាពបញ្ចេញមតិតាមបែបប្រជាធិបតេយ្យ ស្របពេលការបោះឆ្នោតជិតមកដល់។
លោក ហ៊ុន សែន តែងតែរំលឹកដដែលៗពីសន្តិភាពដែលថាកើតឡើងដោយសារតែការដឹកនាំមករបស់លោកមានការរីកចំរើន។ប៉ុន្តែរបាយការណ៍នៃអង្គការឃ្លាំមើលសិទ្ធិមនុស្សអន្តរជាតិ បានកត់សំគាល់ថា «ក្រោមអំណាចរបស់លោក ហ៊ុន សែន ប្រហែល៣០ឆ្នាំកន្លងមក មានទាំងហិង្សាលើអ្នកនយោបាយប្រឆាំង ការគាបសង្កត់ផ្នែកសិទ្ធិមនុស្ស និងអំពើពុករលួយ»៕

សរសេរមកកាន់ Soneat VOD តាមរយៈ soneat@vodhotnews.com

Sunday, February 26, 2017

លោក កឹម សុខា៖ សន្តិភាពពិតគឺសន្តិភាពទាំងផ្លូវកាយទាំងផ្លូវចិត្ត

ប្រធានស្តីទីគណបក្សសង្គ្រោះជាតិ លោកកឹម សុខា (រូបភាពពីហ្វេសប៊ុកលោក កឹម សុខា)

មេដឹកនាំគណបក្សប្រឆាំង លោក កឹម សុខា បានលើកឡើងថា ការបញ្ចប់សង្គ្រាមដោយប្រដាប់អាវុធ គឺជាផ្នែកមួយនៃសន្តិភាព ប៉ុន្តែ ថា សន្តិភាពពិតប្រាកដ គឺជាសន្តិភាពទាំងផ្លូវកាយ និងសន្តិភាពផ្លូវចិត្ត។
លោក កឹម សុខា បានលើកឡើងដូច្នេះនៅលើទំព័រហ្វេសប៊ុករបស់លោក នៅថ្ងៃនេះ មួយថ្ងៃក្រោយពីលោកនាយករដ្ឋមន្ត្រី ហ៊ុន សែន បានបន្តលើកឡើងពីតម្លៃនៃសន្តិភាពថា ទោះស្ថិតក្នុងតម្លៃណាក៏ដោយ ត្រូវតែថែរក្សាការពារសន្តិភាពឲ្យបាន។
បើទោះបីជាបានទទួលស្គាល់ថា ការបញ្ចប់សង្គ្រាមប្រដាប់អាវុធ គឺជាផ្នែកមួយនៃសន្តិភាពក៏ដោយ ប៉ុន្តែ លោក កឹម សុខា បានរៀបរាប់ថា សន្តិភាពពិត គឺសន្តិភាពទាំងរូបកាយ និងសន្តិភាពទាំងផ្លូវចិត្ត។
លោក កឹម សុខា បានបន្ថែមថា ការដែលនៅតែធ្វើឲ្យខ្មែរបែកបាក់គ្នា ឈឺចាប់ទាំងផ្លូវកាយ ទាំងផ្លូវចិត្តយ៉ាងច្រើនសន្ធឹកសន្ធាប់ដោយអយុត្តិធម៌ពីសំណាក់អ្នកមានបំពានលើអ្នកក្រ អ្នកខ្លាំងរាំងខ្ទប់អ្នកខ្សោយ អ្នកឈ្នះកៀបសង្កត់អ្នកចាញ់នោះ គឺជាមូលហេតុនាំឲ្យមានការប្រឆាំងកាន់តែច្រើនទៅៗ។
លោកនាយករដ្ឋមន្ត្រី ហ៊ុន សែន តែងតែលើកឡើងជាញឹកញាប់ពីតម្លៃនៃសន្តិភាព ហើយលោកថែមទាំងបានព្រមានដោយមិនចំពោះទៅដល់អ្នកចង់បង្កើតបដិវត្តន៍ពណ៌ថា ឲ្យត្រៀមក្ដារមឈូស ប្រសិនបើពួកគេចង់ធ្វើបដិវត្តន៍ពណ៌នៅក្នុងប្រទេសកម្ពុជា៕

សរសេរមកកាន់ លោក សូរ្យ ជ័យឧត្ដម តាមរយៈ oudom@vodhotnews.com

កំណើននៃចំនួនអ្នកសង្កេតការណ៍ នឹងធ្វើឲ្យប្រជាពលរដ្ឋកាន់តែទុកចិត្តលើដំណើការបោះឆ្នោត

បុរសក្នុងក្រុងភ្នំពេញផ្ទៀងឈ្មោះរបស់ខ្លួន នៅក្នុងបញ្ជីអ្នកបោះឆ្នោត។

ចំនួននៃអ្នកសង្កេតការណ៍ មកពីអង្គការសង្គមស៊ីវិល និង គណបក្សនយោបាយ សម្រាប់ការបោះឆ្នោតក្រុមប្រឹក្សាឃុំសង្កាត់ ឆ្នាំ ២០១៧ និង ការបោះឆ្នោតថ្នាក់ជាតិ ឆ្នាំ ២០១៨ ខាងមុខនេះ ត្រូវបាន គណៈកម្មាការធិការជាតិរៀបចំការបោះឆ្នោត (គ.ជ.ប) រំពឹងថានឹងមានចំនួនច្រើនជាងអាណ្ណត្តិមុន។ កំណើននៃចំនួនអ្នកសង្កេតការណ៍នេះ ត្រូវបាន គជប និង អង្គការដែលធ្វើការលើបញ្ហាបោះឆ្នោត ចាត់ទុកថា នឹងធ្វើឲ្យបរិយាកាសនៃដំណើការបោះឆ្នោតកាន់តែប្រសើរ និង ជឿទុកចិត្តបាន។

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា រហូតមកទល់ពេលនេះ បើទោះបីជាមិនទាន់បានបូកសរុបថាតើនឹងមានចំនួនអ្នកសង្កេតការណ៍មកពីសង្គមស៊ីវិល គណបក្សនយោបាយ និង សហគមន៍អន្តរជាតិ ប៉ុន្មាននោះ នៅក្នុងការបោះឆ្នោតខាងមុខ។ ក៏ប៉ុន្តែ លោក ហង្ស ពុទ្ធា បានអះអាងថាចំនួនអ្នកសង្កេតការណ៍ សម្រាប់ការបោះឆ្នោតក្រុមប្រឹក្សាឃុំ-សង្កាត់ ឆ្នាំ ២០១៧ និង ការបោះឆ្នោតថ្នាក់ជាតិ ឆ្នាំ ២០១៨ នឹងមានចំនួនច្រើនជាង អាណ្ណតិមុនៗ។
លោក បញ្ជាក់ទៀតថា សម្រាប់ការបោះឆ្នោតខាងមុខ សហភាពអ៊ឺរ៉ុបបានជួយបណ្តុះបណ្តាលអ្នកសង្កេតការណ៍បានចំនួនជាង ១ ម៉ឺន ៣ ពាន់ នាក់។

ចំណែកឯអង្គការសង្គមស៊ីវិលដែលធ្វើការពាក់ព័ន្ធនឹងការបោះឆ្នោតខាងមុខ កាលពីថ្ងៃទី ២៥កុម្ភៈ ក៏បានប្រកាសដាក់ដំណើការកម្មវិធីមួយឈ្មោះថា« បន្ទប់ស្ថានការណ៍ស្តីពីការបោះឆ្នោត» ដើម្បីឃ្លាំមើល និង សង្កេតការណ៍ការបោះឆ្នោត ឆ្នាំ ២០១៧ និង ឆ្នាំ ២០១៨។

តាមរយៈកម្មវិធីនេះក្រុមអង្គការសង្គមស៊ីវិលនឹងដាក់ពង្រាយអ្នកសង្កេតការណ៍នៅតាមបណ្តាការិយាល័យបោះឆ្នោតទូទាំងប្រទេសដែលមានចំនួន ២ ម៉ឺនការិយាល័យ។ សូមរំឮកឡើងវិញថាកម្មវិធី«បន្ទប់ស្ថានការណ៍ស្តីពីការបោះឆ្នោត» ក៏ត្រូវបានបង្កើតដែរកាលពីអាណត្តិមុន។ ក៏ប៉ុន្តែ ចំនួនអ្នកសង្កេតការណ៍នៅពេលនោះ មានតែ ៥០ ទៅ ៦០ភាគរយប៉ុណ្ណោះ នៃចំនួនការិយាល័យបោះឆ្នោតទូទាំងប្រទេស។

ជុំវិញការរៀបចំបញ្ជីអ្នកសង្កេតការណ៍បោះឆ្នោតនេះ លោក គុល បញ្ញា នាយកប្រតិបត្តិអង្គការឃ្លាំមើលការបោះឆ្នោត ដោយសេរី និងយុត្តិធម៌នៅកម្ពុជា ហៅកាត់ថា (Comfrel) បានឲ្យដឹងដែរថា រហូតមកទល់ពេលនេះ Comfrel បានចុះឈ្មោះ ដាក់អ្នកសង្កេតការណ៍ចំនួន ២៦០ នាក់ ដើម្បីឃ្លាំមើលដំណើការចុះឈ្មោះបោះឆ្នោត។ ហើយនៅពេលនេះ ក្រុមអង្គការសង្គមស៊ីវិល បានស្នើទៅសហភាពអឺរ៉ុប ដើម្បីសុំជំនួយថវិកាសម្រាប់ផ្គត់ផ្គង់លើការចំណាយរបស់អ្នកសង្កេតការណ៍ម្នាក់ៗ នៅថ្ងៃបោះឆ្នោត។

ខណៈដែលចំនួននៃអ្នកសង្កេតការណ៍មកពីក្រុមអង្គការសង្គមស៊ីវិលក្នុងស្រុក និង អន្តរជាតិ ព្រមទាំងតំណាងមកពីគណបក្សនយោបាយ កើនឡើងនេះ ត្រូវបាន លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) បញ្ជាក់ថា នឹងធ្វើឲ្យដំណើការបោះឆ្នោត កាន់តែប្រសើរឡើង និងធ្វើឲ្យប្រជាពលរដ្ឋមានទំនុកចិត្ត នៅក្នុងដំណើការបោះឆ្នោត។

លោក ហង្ស ពុទ្ធា ថា គ.ជ.ប បើកចំហររាល់ស្ថាប័ននានា ដែលមានបំណងចុះឈ្មោះជាអ្នកសង្កេតការណ៍សម្រាប់ការបោះឆ្នោតខាងមុខ។ សូមជម្រាបជូនថាសម្រាប់អ្នកសង្កេតការណ៍ជាតិគ.ជ.ប ទទួលចុះឈ្មោះចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៤ ខែឧសភា។ ចំណែកអ្នកសង្កេតការណ៍អន្តរជាតិចាប់ផ្ដើមទទួលចាប់ពីថ្ងៃទី១៥ ខែកុម្ភៈ រហូតដល់ថ្ងៃទី៣០ ឧសភា៕

គណៈកម្មាធិការជាតិប្រជាធិបតេយ្យបានបោះឆ្នោតជ្រើសរើសលោក Tom Perez ជាប្រធានថ្មី

អតីតរដ្ឋមន្រ្តីក្រសួងការងារលោក Tom Perez ត្រូវបានជ្រើសតាំងជាប្រធានថ្មីរបស់គណកម្មាធិការជាតិប្រជាធិបតេយ្យថ្លែងនៅក្នុង កិច្ចប្រជុំរបស់ DNC រដូវរងានៅរដ្ឋ Atlanta កាលពីថ្ងៃទី២៥ កុម្ភៈ ២០១៧។

គណៈកម្មាធិការជាតិប្រជាធិបតេយ្យបានបោះឆ្នោតជ្រើសរើសលោក Tom Perez ជាប្រធានថ្មីកាលពីថ្ងៃសៅរ៍ ដែលអតីតរដ្ឋមន្ត្រីក្រសួងការងាររូបនេះទទួលបានជ័យជម្នះលើលោក Keith Ellison តំណាងរាស្ត្ររដ្ឋ Minnesota ជាមួយនឹងសំឡេងឆ្នោតគាំទ្រ ២៣៥ទល់នឹង២០០។ បន្តិចក្រោយមក ដោយយោងតាមសំណើរបស់លោក Perez លោក Ellison ត្រូវបានអនុម័តឲ្យធ្វើជាអនុប្រធានរបស់លោក។
លោក Perez ដែលទទួលបានការគាំទ្រពីអ្នកដែលគាំទ្រលោកស្រី Hillary Clinton និងអតីតប្រធានាធិបតី លោក Barack Obama បានអះអាងថា គណបក្សនេះត្រូវផ្តោតទៅលើការចូលទៅដល់អ្នកបោះឆ្នោតនិងសមរភូមិនៃការទទួលបានសន្លឹកឆ្នោតគាំទ្រ។
សម្ព័ន្ធមិត្តរបស់លោក Ellison ដែលគាំទ្រ លោក Bernie Sanders អ្នកធ្វើកំណែទម្រង់ ពណ៌នាលោក ថាជាបេក្ខជនតែម្នាក់គត់ដែលអាចផ្សះផ្សាការបែកបាក់នៅក្នុងគណបក្សនេះបាន។
ជ័យជម្នះរបស់លោក Perez បានកើតឡើង ក្រោយពីបេក្ខជនផ្សេងទៀតបានបោះបង់ចោលការប្រកួតប្រជែងនេះ។ ក្នុងនោះក៏រួមមានលោក Pete Buttigieg អភិបាលក្រុង South Bend ក្នុងរដ្ឋ Indiana លោកស្រី Sally Boynton Brown ប្រធានប្រតិបត្តិគណបក្សប្រជាធិបតេយ្យរដ្ឋ Idaho លោកស្រី Jehmu Greene អ្នកវិភាគតាមទូរទស្សន៍ លោក Sam Ronan អតីតបុគ្គលិក Air Force និងលោកមេធាវី Peter Peckarsky ផងដែរ៕

ទាហានអ៊ីរ៉ាក់ប្រឈមនឹងការប្រយុទ្ធស្វិតស្វាញ ខណៈដែលការប្រយុទ្ធនៅទីក្រុងMosul ចេះតែរំកិលទៅមុខ

កងកម្លាំងពិសេសរបស់អ៊ីរ៉ាក់កំពុងត្រៀមខ្លួននៅភាគខាងលិចទីក្រុង Mosul ប្រទេសអ៊ីរ៉ាក់កាលពីថ្ងៃទី២៤ កុម្ភៈ ២០១៧។

មន្ត្រីយោធាអ៊ីរ៉ាក់និយាយថា កងកម្លាំងដែលគាំទ្រអាមេរិកកំពុងតែប្រឈមនឹងការប្រយុទ្ធស្វិតស្វាញជាងមុន ខណៈដែលទាហានបានវាយសម្រុកកាន់តែជ្រៅទៅដល់ប៉ែកខាងលិចពាក់កណ្តាលទីក្រុង Mosul។ ទីក្រុង Mosul គឺជាជម្រកចុងក្រោយបង្អស់របស់ក្រុមរដ្ឋឥស្លាមនៅក្នុងប្រទេសអ៊ីរ៉ាក់។
លោកវរសេនីយទោ Abdulamir al-Mohammadawi បានថ្លែងប្រាប់ទីភ្នាក់ងារសារព័ត៌មានបារាំងថា ការដណ្តើមយកបានអាកាសយានដ្ឋាននៅ Mosul កាលពីលើកមុនបាននាំឲ្យមានការវាយសម្រុកទៅប៉ែកខាងជើងឆ្ពោះទៅកណ្តាលទីក្រុង ដែលនៅទីនោះពួកគេមានផែនការនឹងដណ្តើមយកស្ថានកុងស៊ុលទួកគីនិងអគាររដ្ឋាភិបាលមកវិញ។
លោកបានមានប្រសាសន៍ថា កងកម្លាំងកំពុងតែប្រឈមនឹងការប្រយុទ្ធគ្នាយ៉ាងស្វិតស្វាញកាន់តែខ្លាំង ខណៈដែលពួកគេវាយសម្រុកកាន់តែជ្រៅចូលទៅទីក្រុងដែលក្រុមរដ្ឋឥស្លាមកាន់កាប់។
លោក al-Mohammadawi បានថ្លែងប្រាប់ទីភ្នាក់ងារសារព័ត៌មាន AFP ថា «ក្រុមរដ្ឋឥស្លាមកំពុងតែប្រើប្រាស់លំនៅដ្ឋានរបស់ប្រជាពលរដ្ឋដែលពោរពេញទៅដោយមនុស្សធ្វើជារបាំងសម្រាប់ការពារខ្លួន»។
ក្រុមរដ្ឋឥស្លាមក៏បានចាប់ផ្តើមបង្កាត់ភ្លើងនៅតាមដងផ្លូវនានា ដើម្បីលាក់ជំហររបស់ខ្លួន និងក្រាលក្រណាត់នៅលើផ្លូវចង្អៀតនានាក្នុងទីក្រុង មូស៊ុល ដើម្បីការពារខ្លួនពីការឈ្លបយកការណ៍លើអាកាសផងដែរ។
ទីភ្នាក់ងារសារព័ត៌មានអ៊ីរ៉ាក់ Kurd បានរាយការណ៍កាលពីថ្ងៃសៅរ៍មកថា អ្នកឆ្លើយឆ្លងសារព័ត៌មាននៅក្នុងសង្គ្រាមរបស់ខ្លួនត្រូវបានសម្លាប់ក្នុងពេលយកព័ត៌មានពីការវាយប្រហារនៅក្នុងទីក្រុង Mosul៕

ប៉ូលិសអាល្លឺម៉ង់បាញ់និងធ្វើឲ្យបុរសម្នាក់រងរបួស ក្រោយពីការវាយប្រហារដោយបើករថយន្តបំបុក

រថយន្តនៅខាងមុខហាង យាមដោយប៉ូលិសក្នុងទីក្រុង Heidelberg ប្រទេសអាល្លឺម៉ង់ កាលពីថ្ងៃទី ២៥ កុម្ភៈ ២០១៧។ បុរសម្នាក់បានបើករថយន្តកណ្តាលទីក្រុង ហើយវាយប្រហារប្រជាជនហើយរត់គេចបន្ទាប់មកត្រូវបានបាញ់។

ប៉ូលិសនៅក្នុងទីក្រុង Heidelberg ប្រទេសអាល្លឺម៉ង់បានបាញ់និងធ្វើឲ្យបុរសម្នាក់រងរបួសធ្ងន់កាលពីថ្ងៃសៅរ៍ បន្ទាប់ពីបុរសម្នាក់នោះបានបើករថយន្តមួយគ្រឿងទៅបុកមនុស្ស៣នាក់។
បុរសម្នាក់នោះបានបើករថយន្តសំដៅចូលទៅក្នុងហ្វូងមនុស្ស ដែលកំពុងតែឈរនៅកន្លែងថ្មើរជើង។ ការប្រឈមមុខគ្នាដ៏តូចមួយបានកើតឡើង មុនពេលដែលប៉ូលិសបាញ់បុរសម្នាក់នោះ។ គេជឿថា បុរសម្នាក់នោះមានកាំបិតមួយជាប់ជាមួយផងដែរ។
ប៉ូលិសនៅមិនទាន់ច្បាស់នៅឡើយទេអំពីមូលហេតុដែលបុរសនោះធ្វើដូច្នេះ ប៉ុន្តែនិយាយថា ពួកគេមិនសង្ស័យថា ករណីនេះជាប់ពាក់ព័ន្ធនឹងអំពើភេរវកម្មនោះទេ។
ប៉ូលិសថ្លែងថា បុរសម្នាក់នោះទំនងជាប្រព្រឹត្តអំពើនេះតែម្នាក់ឯងទេ ហើយប៉ូលិសបានបដិសេធមិនព្រមបញ្ជាក់ទៅលើសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុក ដែលថា បុរសម្នាក់នោះមានបញ្ហាផ្លូវចិត្តនោះទេ។
ការវាយប្រហារស្រដៀងគ្នានេះបានកើតឡើងនៅក្នុងប្រទេសអាល្លឺម៉ង់កាលពីខែធ្នូឆ្នាំមុន នៅពេលដែលភេរវករម្នាក់បានបើករថយន្តដឹកទំនិញមួយគ្រឿងសំដៅចូលទៅបុកហ្វូងមនុស្សនៅក្នុងផ្សារលក់គ្រឿងឧបករណ៍តុបតែងសម្រាប់ថ្ងៃបុណ្យណូអែលមួយនៅក្នុងទីក្រុង ប៊ែរឡាំង ដែលបានបណ្តាលឲ្យមនុស្ស១២នាក់ស្លាប់បាត់បង់ជីវិតនិងរបួស៥០នាក់ផ្សេងទៀត៕

ប៉ាគីស្ថាននិងអាហ្វហ្គានីស្ថាននឹងបើកកិច្ចប្រជុំប្រយុទ្ធប្រឆាំងនឹងអំពើភេរវកម្ម

រូបភាពឯកសារ៖ រដ្ឋមន្រ្តីការបរទេសអាហ្វហ្គានីស្ថានលោក Salahuddin Rabbani (ស្តាំ) និយាយជាមួយទីប្រឹក្សាសន្តីសុខជាតិប៉ាគីស្ថានលោក Sartaj Aziz (ឆ្វេង) ក្នុងកិច្ចប្រជុំនៅ Islamabad ប្រទេសប៉ាគីស្ថានកាលពី ថ្ងៃទី១៣ សីហា ២០១៥ នៅប្រទេសប៉ាគីស្ថាន។

ប្រទេសប៉ាគីស្ថានបានបង្ហាញកាលពីថ្ងៃសៅរ៍ថា ខ្លួនបានចូលរួមនឹងការចរចាជាមួយនឹងប្រទេសអាហ្វហ្គានីស្ថានទៅលើយន្តការរួមគ្នាមួយ ដើម្បីដោះស្រាយកង្វល់ទៅលើបញ្ហាភេរវកម្មឆ្លងព្រំដែន ហើយភាគីទាំងពីរអាចធ្វើឲ្យកិច្ចព្រមព្រៀងនេះទៅជាផ្លូវការនៅសប្តាហ៍ក្រោយនេះ។
លោក Sartaj Aziz ទីប្រឹក្សារបស់នាយករដ្ឋមន្ត្រីទទួលបន្ទុកគោលនយោបាយការបរទេស បានថ្លែងប្រាប់អ្នកកាសែតនៅក្នុងទីក្រុង Islamabad ថា លោកនឹងពិភាក្សាបន្ថែមទៀតទៅលើបញ្ហានេះ នៅពេលដែលលោកជួបជាមួយនឹងលោក Salahuddin Rabbani រដ្ឋមន្ត្រីក្រសួងការបរទេសអាហ្វហ្គានីស្ថាន នៅក្នុងកិច្ចប្រជុំបន្ទាប់បន្សំពីកិច្ចប្រជុំកំពូលថ្នាក់តំបន់នៅក្នុងទីក្រុង Islamabad នៅថ្ងៃអាទិត្យនេះ។
លោកបាននិយាយថា លោក Rabbani បានបញ្ជាក់ថានឹងចូលរួមក្នុងកិច្ចប្រជុំសហប្រតិបត្តិការសេដ្ឋកិច្ចប្រទេសទាំង១០ ឬហៅថា ECO ជាមួយនឹងមន្ត្រីជាន់ខ្ពស់អាហ្វហ្គានីស្ថានដទៃទៀត។
លោក Aziz បានថ្លែងបន្តថា ភាគីទាំង២យល់ឃើញថា អំពើភេរវកម្មគឺជាសត្រូវរួម ហើយបានព្រមព្រៀងគ្នាថា ពិតជាមានតម្រូវការទៅលើកិច្ចសហប្រតិបត្តិការរួមគ្នា។
ទំនាក់ទំនងទ្វេភាគីបានធ្លាក់ចុះក្នុងរយៈពេលប៉ុន្មានខែចុងក្រោយនេះ ដោយសារតែរដ្ឋាភិបាលក្រុង Islamabad និងរដ្ឋាភិបាលក្រុង Kabul បានចោទប្រកាន់គ្នាទៅវិញទៅមក ថាបានផ្តល់ទីជម្រកដល់ក្រុមសកម្មប្រយុទ្ធដែលប្រឆាំងនឹងរដ្ឋនិងឧបត្ថម្ភដល់ការវាយប្រហារភេរវកម្មទៅលើទឹកដីរបស់ពួកគេរៀងខ្លួន៕

ទីប្រឹក្សាសន្តិសុខជាតិថ្មីត្រូវបានរាយការណ៍ថា ឃ្លាតឆ្ងាយពីទស្សនៈរបស់រដ្ឋបាលលោក Trump ចំពោះសាសនាឥស្លាម

ប្រធានាធិបតីសហរដ្ឋអាមេរិកស្តាប់លោកវរសេនីយទោ Lt. Gen. H.R. McMaster ដែលត្រូវបានតែងតាំងជាទីប្រឹក្សាសន្តិសុខជាតិថ្មីនិយាយនៅក្នុងវិមាន Mar-a-Lago របស់លោក Trump នៅទីក្រុង Palm Beach រដ្ឋ Florida កាលពីថ្ងៃទី២០ កុម្ភៈ ២០១៧។

ទីប្រឹក្សាសន្តិសុខជាតិថ្មីត្រូវបានរាយការណ៍ថា បានប្រាប់ដល់បុគ្គលិករបស់ខ្លួនថា អ្នកកាន់សាសនាឥស្លាមដែលបានធ្វើសកម្មភាពភេរវកម្មគឺជាអ្នកបំផ្លាញសាសនាឥស្លាម។ នេះគឺជាជំហរមនោគមវិជ្ជាមួយដែលខុសឆ្ងាយពីទីប្រឹក្សាជាន់ខ្ពស់ដទៃទៀតរបស់លោកប្រធានាធិបតីអាមេរិក Donald Trump។
លោកឧត្ដមសេនីយ៍ឯកH.R. McMaster បានថ្លែងប្រាប់ដល់សមាជិកនៃក្រុមប្រឹក្សាសន្តិសុខជាតិថា ការប្រើប្រាស់ពាក្យ«ភេរវកម្មជ្រុលនិយមឥស្លាម» គឺជាពាក្យដែលខូចប្រយោជន៍ ដោយសារតែសកម្មភាពភេរវកម្មគឺ «មិនមែនជាសាសនាឥស្លាមនោះទេ»។ នេះបើយោងតាមកាសែត the New York Times។
សុន្ទរកថារបស់លោក McMaster ត្រូវបានរាយការណ៍ថា បានធ្វើឡើងកាលពីថ្ងៃព្រហស្បតិ៍ នៅក្នុងកិច្ចប្រជុំបុគ្គលិកទាំងអស់លើកដំបូងរបស់លោក។ នេះបើយោងតាមអ្នកដែលបានចូលរួមក្នុងកិច្ចប្រជុំនេះ។
អត្ថាធិប្បាយរបស់លោកខុសពីភាសាដែលលោកប្រធានាធិបតីនិងលោក Michael Flynn ដែលអ្នកកាន់តំណែងជាទីប្រឹក្សាសន្តិសុខជាតិមុនលោក បានលើកឡើងជារឿយៗ។ លោក Michael Flynn បានលាលែងពីតំណែងបន្ទាប់ពីមានរឿងអាស្រូវទាក់ទងនឹងការនិយាយទូរស័ព្ទជាមួយនឹងមន្ត្រីការទូតរុស្ស៊ី៕

អភិបាលរដ្ឋប្រចាំសហរដ្ឋអាមេរិក ពិភាក្សាបញ្ហាកំណែទម្រង់ច្បាប់អន្តោប្រវេសន៍និងគម្រោងហេដ្ឋារចនាសម្ព័ន្ធនៅក្នុងការប្រជុំប្រចាំឆ្នាំ

លោកប្រធានាធិបតីសហរដ្ឋអាមេរិក Donald Trump លើកមេដៃខណដែលលោកមកថ្លែងនៅក្នុងសន្និសីទសកម្មភាពនយោបាយអភិរក្សកាលពីថ្ងៃទិ២៤ កុម្ភៈ ២០១៧ទីក្រុង Oxon Hill រដ្ឋ Maryland។

គម្រោងមួយលានលានដុល្លាររបស់លោកប្រធានាធិបតី Donald Trump ដើម្បីជួសជុលហេដ្ឋារចនាសម្ព័ន្ធដែលបែកបាក់របស់សហរដ្ឋអាមេរិក គឺជាប្រធានបទ សំខាន់នៅក្នុងកិច្ចប្រជុំអភិបាលរដ្ឋទូទាំងប្រទេសចំនួនបីថ្ងៃ នៅរដ្ឋធានីវ៉ាស៊ីនតោន។
កំណែទម្រង់វិស័យសុខាភិបាល អប់រំ ភាពអត់ឃ្លានរបស់កុមារ និងឧក្រិដ្ឋកម្មតាមប្រព័ន្ធអ៊ីនធឺណិត ក៏ជាគោលនយោបាយសំខាន់ ដែលនឹងត្រូវបានគេពិភាក្សាផងដែរ នៅក្នុងការប្រជុំរបស់សមាគមអភិបាលរដ្ឋថ្នាក់ជាតិ រដូវរងាប្រចាំឆ្នាំរបស់គណៈអភិបាលរដ្ឋ មកពីគណបក្សទាំងពីរ នេះបើយោងតាមសមាគមអភិបាលរដ្ឋថ្នាក់ជាតិ។
កាលពីថ្ងៃសុក្រ អភិបាលរដ្ឋកាលីហ្វ័រញ៉ា លោក Jerry Brown បានប្រកាសពីគម្រោង ៤៣៧ លានដុល្លារ សម្រាប់គ្រប់គ្រងទឹកជំនន់ និងឆ្លើយតបទៅនឹងការសង្គ្រោះបន្ទាន់ បន្ទាប់ពីមានការព្រួយបារម្ភពីការបាក់ទំនប់ ដែលបានបង្ខំឲ្យមានការជម្លៀសប្រជាជនប្រមាណ ២០ម៉ឺននាក់៕

ម៉ាឡេស៊ីព្រមានចាប់ខ្លួនមន្ត្រីកាទូតកូរ៉េខាងជើងមួយរូបបើមិនសហការ

លោកប្រធានប៉ូលិសម៉ាឡេស៊ី Khalid Abu Bakar (កណ្តាល) ថ្លែងនៅក្នុងសន្និសីទសារព័ត៌មានអំពីឃាតករសម្លាប់លោក Kim Jong Nam បងប្រុសចុងរបស់មេដឹកនាំប្រទេសកូរ៉េខាងជើងនៅ ទីស្នាក់ការកណ្តាលប៉ូលិស ក្នុងទីក្រុងគួឡាឡាំពួ ប្រទេសម៉ាឡេស៊ី កាលពីថ្ងៃទី២២ កុម្ភៈ ២០១៧។

ម៉ាឡេស៊ីនៅថ្ងៃនេះបានឲ្យដឹងថា ខ្លួននឹងចេញដីកាចាប់ខ្លួនមន្ត្រីការទូតកូរ៉េខាងជើងមួយរូប ប្រសិនបើមន្ត្រីរូបនោះបដិសេធមិនសហការជាមួយនឹងការស៊ើបអង្កេតទៅលើការសម្លាប់បងប្រុសម្តាយផ្សេងគ្នារបស់មេដឹកនាំកូរ៉េខាងជើងលោក Kim Jong Un។
ការស៊ើបអង្កេតនេះបានបង្កឲ្យមានវិវាទផ្នែកការទូតធ្ងន់ធ្ងររវាងប្រទេសម៉ាឡេស៊ីនិងកូរ៉េខាងជើង ទាក់ទិននឹងការសង្ស័យសម្លាប់លោក Kim Jong Nam កាលពីថ្ងៃទី១៣ ខែកុម្ភៈ នៅឯអាកាសយានដ្ឋានក្នុងទីក្រុងគូឡាឡាំពួ Kuala Lumpur។ ការលើកឡើងកាលពីថ្ងៃសុក្ររបស់ប៉ូលិសម៉ាឡេស៊ីដែលថា សារធាតុគីមី VX ត្រូវបានប្រើប្រាស់ដើម្បីសម្លាប់លោក Kim នោះ បានបង្កឲ្យមានវិវាទនយោបាយរវាងប្រទេសទាំងពីរ។
ក្រុមអ្នកជំនាញបានថ្លែងថា សារធាតុគីមី VX ដែលត្រូវបានប្រើប្រាស់នៅក្នុងការវាយប្រហារនេះ ស្ទើរតែច្បាស់ហើយថាត្រូវបានផលិតនៅក្នុងបន្ទប់ពិសោធន៍អាវុធរបស់រដ្ឋជឿនលឿនមួយ ហើយត្រូវបានហាមឃាត់ដោយច្បាប់អន្តរជាតិ។ ប៉ុន្តែប្រទេសកូរ៉េខាងជើងមិនដែលបានចុះហត្ថលេខាលើកិច្ចព្រមព្រៀងនោះទេ ហើយបានចំណាយពេលជាច្រើនទសវត្សរ៍ដើម្បីផលិតកម្មវិធីអាវុធគីមីនោះ៕

ក្រុមបាតុករហ្វីលីពីនប្រារព្ធខួបបដិវត្តន៍ដើម្បីថ្កោលទោសការសម្លាប់មនុស្ស

នេះជារូបភាពផ្តល់ដោយជាងថតរូបរបស់ប្រធានាធិបតីនៅ Malacanang Palace លោកប្រធានាធិបតីហ្វីលីពីន Rodrigo Duterte ថ្លែងទៅកាន់ក្រុមប៉ូលិសនៅរដ្ឋធានីម៉ានីល ប្រទេសហ្វីលីពីនកាលពីថ្ងៃទី ០៩ កុម្ភៈ ២០១៧។

ក្រុមឆ្វេងនិយមនិងក្រុមសកម្មជនគាំទ្រលទ្ធិប្រជាធិបតេយ្យរាប់រយនាក់បានប្រារព្ធគម្រប់ខួបនៃការធ្វើបដិវត្តន៍ឆ្នាំ១៩៨៦ ដែលបានទម្លាក់មេដឹកនាំផ្តាច់ការរបស់ហ្វីលីពីនលោក Ferdinand Marcos ចេញពីតំណែង ដើម្បីព្រមានដល់ទំនោរទៅខាងកុម្មុយនីស្តផ្តាច់ការរបស់មេដឹកនាំនាពេលបច្ចុប្បន្ន ហើយដើម្បីថ្កោលទោសចំពោះការសម្រេចចិត្តរបស់លោកដែលអនុញ្ញាតឲ្យបញ្ចុះសពរបស់លោក Marcos នៅឯកន្លែងបញ្ចុះសពវីរៈបុរស។
ក្រុមសកម្មជនជាងមួយពាន់នាក់មកពីក្រុមផ្សេងៗគ្នាបានប្រមូលផ្តុំគ្នានៅថ្ងៃសៅរ៏នេះ នៅឯលានប្រជាធិបតេយ្យដែលស្ថិតនៅតាមមហាវិថីក្នុងទីក្រុងម៉ានីល ជាទីដែលពលរដ្ឋហ្វីលីពីនរាប់លាននាក់បានប្រមូលផ្តុំគ្នាកាលពី៣១ឆ្នាំមុន ដែលជាការបះបោរប្រកបដោយសន្តិវិធី ដើម្បីទម្លាក់លោក Marcos ចេញពីតំណែង។ ការទម្លាក់លោក Marcos ចេញពីតំណែងជាប្រធានាធិបតីគឺដោយសារតែបញ្ហាពុករលួយដ៏ធ្ងន់ធ្ងរនិងការបំពានសិទ្ធិមនុស្ស។
ពិធីរំឮកខួបនៃការធ្វើបដិវត្តន៍មានសភាពតឹងរ៉ឹង បើធៀបជាមួយនឹងឆ្នាំមុនៗ ហើយលោកប្រធានាធិបតី Rodrigo Duterte ដែលអនុញ្ញាតឲ្យបញ្ចុះសាកសពរបស់លោក Marcos នៅទីបញ្ចុះសពវីរៈបុរសកាលពីខែវិច្ឆិកានោះ មិនបានចូលរួមក្នុងពិធីនេះនោះទេ៕

រូបភាពជុំវិញពិភពលោក ២៤ កុម្ភៈ ២០១៧

រូបភាពជុំវិញពិភពលោកថ្ងៃទី ២៤ កុម្ភៈ ២០១៧ មានមកពីប្រទេសដូចជា អេមីរ៉ាតអារ៉ាប់រួម ប្រេស៊ីល បារាំង ជប៉ុន អង់គ្លេស សហរដ្ឋអាមេរិក ឥណ្ឌា អាល្លឺម៉ង់ នេប៉ាល់ និង អ៊ីតាលី។

ផ្សេងទៀត

បុរសជនជាតិអេមីរ៉ាតអារ៉ាប់រួមម្នាក់កំពុងដើរជាមួយសត្វអូដ្ឋរបស់គាត់ឆ្លងកាត់វាលខ្សាច់ Hameem នៅប្រហែល១៧០គីឡូម៉ែត្រភាគខាងលិចឈូងសមុទ្រ នៃទីក្រុងអាប៊ុយដាប៊ី។

បុរសម្នាក់ស្លៀកពាក់តែងខ្លួនជា Uncle Sam ដើរនៅឯសន្និសីទស្តីពីសកម្មភាពនយោបាយនៃក្រុមអ្នកអភិរក្សនិយម CPAC នៅកំពង់ផែជាតិ រដ្ឋ Maryland។

ក្មេងស្រីម្នាក់កំពុងដើរនៅពេលមានព្យុះធូលីនៅមាត់ទន្លេ Ganges ក្នុងទីក្រុង Allahabad ប្រទេសឥណ្ឌា។

កម្មករកំពុងលើករូបចម្លាក់រង្វាន់អូស្ការឡើងលើកម្រាលព្រំពណ៌ក្រហម ខណៈពេលដែលការរៀបចំតុបតែងកំពុងបន្ត សម្រាប់ការផ្តល់ពានរង្វាន់លើកទី៨៩ នៅហូលីវូដ ទីក្រុង Los Angeles រដ្ឋ California។

អ្នកកាន់សាសនាហិណ្ឌូ កំពុងហាលសម្លៀកបំពាក់បន្ទាប់ពីបានចុះមុជទឹកនៅ Sangam ដែលជាចំណុចប្រសព្វនៃទន្លេ Ganges ទន្លេ Yamuna និងទន្លេ Saraswati តាមរឿងព្រេង ក្នុងអំឡុងនៃបុណ្យក្នុងសាសនាហិណ្ឌូឈ្មោះថា Shivaratri ហើយក៏ជាថ្ងៃបញ្ចប់នៃការបង្ហាញប្រចាំឆ្នាំនៃបុណ្យ Magh Mela ក្នុងក្រុង Allahabad ប្រទេសឥណ្ឌា។

ខ្លាឃ្មុំតំបន់ប៉ូល Giovanna (នៅក្រៅកាមេរ៉ា) ជាមួយកូនរបស់វាដែលមានអាយុ១៤សប្តាហ៍ កំពុងចេញរកចំណីនៅខាងក្រៅនៅក្នុងសួន Hellabrunn ក្នុងទីក្រុងមុយនិច ប្រទេសអាល្លឺម៉ង់។

អ្នកស្រី Sonia Guajajara (ឆ្វេង) អ្នកសម្របសម្រួលនៃការបញ្ចេញសូរសំឡេងសម្រាប់ជនជាតិដើមភាគតិចប្រេស៊ីល និងមេដឹកនាំជនជាតិដើមភាគតិចផ្សេងទៀត កំពុងចូលរួមនៅក្នុងសន្និសីទសារព័ត៌មានមួយដែលរៀបចំឡើងដោយសាលា Imperatriz Leopoldinense ក្រោមប្រធានបទផ្តោតទៅលើជនជាតិនៅតំបន់អាម៉ាសូន មុនពេលមកដល់នៃបុណ្យខានីវ៉ាល នៅទីក្រុង Rio de Janeiro ប្រទេសប្រេស៊ីល។

អ្នកចូលរួមស្លៀកពាក់សម្លៀកបំពាក់សម្រាប់សម្ដែង ចូលរួមការតាំងពិព័រណ៍ជប៉ុននៅទីក្រុង Marseille ប្រទេសបារាំង។

គោញីមួយក្បាលត្រូវបានគេថតរូបនៅមុនពេលមកដល់នៃការបង្ហាញកសិកម្មអន្តរជាតិនៅទីក្រុងប៉ារីស ប្រទេសបារាំង។

ឡានម៉ាក Jeep កំពុងបើកចេញឆ្ងាយពីចម្ការមួយនៅទីក្រុង Blair រដ្ឋ Nebraska សហរដ្ឋអាមេរិក។

ម៉ូតូម៉ាក Harley-Davidson ត្រូវបានដាក់តម្រៀបនៅក្នុងកម្មវិធីតាំងបង្ហាញមួយនៅទីក្រុង Hamburg ប្រទេសអាល្លឺម៉ង់។

បុរសកាន់សាសនាហិណ្ឌូម្នាក់ ជក់កញ្ឆានៅក្នុងទីធ្លានៃប្រាសាទ Pashupatinath ក្នុងពិធីបុណ្យ Shivaratri នៅទីក្រុងកដ្ឋមណ្ឌូ ប្រទេសនេប៉ាល់។

កីឡាករជប៉ុន Naoki Nakamura លោតឡើងទៅក្នុងលំហរនៅក្នុងពេលលោកប្រកួតជុំទី២ ក្នុងការប្រកួតកីឡាលោតស្គីផ្នែកបុរសនៅក្នុងក្របខណ្ឌកីឡាទ្វីបអាស៊ីរដូវរងានៅទីក្រុង Sapporo ប្រទេសជប៉ុន។

តារាបង្ហាញម៉ូតស្លៀកសម្លៀកបំពាក់ច្នៃប្រឌិតសម្រាប់ការបង្ហាញម៉ូត Emporio Armani រដូវរងាឆ្នាំ២០១៧ - ២០១៨ ផ្នែកស្ត្រី ដេលការបង្ហាញនេះជាផ្នែកមួយនៃការបង្ហាញនៅទីក្រុង Milan ប្រទេសអ៊ីតាលី។

ស្ត្រី២នាក់កំពុងជិះសេះនៅលើផ្លូវតូចមួយនៅចន្លោះដីទំនេរនិងទីវាល នៅពេលថ្ងៃលិចនៅទីក្រុង Oberursel ប្រទេសអាល្លឺម៉ង់។

បុគ្គលិកស្ត្រីម្នាក់កំពុងរៀបចំសាឡុងមួយដែលគេហៅថា សាឡុង Mae West Lips ផលិតឡើងដោយលោក Salvador Dali និងលោក Edward James នៅពីមុខផ្ទាំងគំនូររបស់លោក Salvador Dali ដែលមានឈ្មោះថា L'oiel fleuri, decor pour le ballet Trist នៅឯអាគារលក់ដេញថ្លៃក្នុងទីក្រុងឡុងដ៍ ប្រទេសអង់គ្លេស។

សង្គមស៊ីវិលចាប់ផ្ដើមកម្មវិធី “បន្ទប់ស្ថានការណ៍ស្ដីពីការបោះឆ្នោត” ដើម្បីឃ្លាំមើលការបោះឆ្នោត

នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) លោក សំ គន្ធាមី ចូលរួមវេទិកាអ្នកស្ដាប់អាស៊ីសេរី កាលពីយប់ថ្ងៃទី១៣ ខែកញ្ញា ឆ្នាំ២០១៦។ Photo: RFA

ក្រុមអង្គការសង្គមស៊ីវិល ដែលធ្វើការពាក់ព័ន្ធនឹងការបោះឆ្នោត ប្រកាសចាប់ផ្ដើមដំណើរការកម្មវិធីមួយឈ្មោះថា “បន្ទប់ស្ថានការណ៍ស្ដីពីការបោះឆ្នោតឆ្នាំ២០១៧” ដោយចាប់ពីថ្ងៃទី២៥ ខែកុម្ភៈ រហូតដល់ខែកក្កដា ឆ្នាំ២០១៧។ បន្ទប់ស្ថានការណ៍ស្ដីពីការបោះឆ្នោត បង្កើតឡើងដើម្បីឃ្លាំមើល ឬសង្កេតការណ៍បោះឆ្នោតឃុំ-សង្កាត់ នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨។
កម្មវិធីឈ្មោះ “បន្ទប់ស្ថានការណ៍ស្ដីពីការបោះឆ្នោត” ដែលក្រុមអង្គការសង្គមស៊ីវិលបង្កើតឡើងនេះ ដើម្បីរួមចំណែកក្នុងការសង្កេតការណ៍ ឃ្លាំមើល និងផ្ទៀងផ្ទាត់លទ្ធផលនៃការបោះឆ្នោត។ កម្មវិធីនេះមានផែនការដាក់ពង្រាយអ្នកសង្កេតការណ៍នៅតាមការិយាល័យបោះឆ្នោតទាំងអស់ទូទាំងប្រទេសកម្ពុជា ដែលមានប្រមាណជាង ២ម៉ឺនការិយាល័យ។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ឬហៅថាអង្គការ និចហ្វិក (NICFEC) លោក សំ គន្ធាមី ឱ្យអាស៊ីសេរី ដឹងនៅរសៀលថ្ងៃទី២៥ ខែកុម្ភៈ ថា កម្មវិធីនេះគឺត្រូវការមនុស្សប្រមាណ ២ម៉ឺននាក់ ដើម្បីធ្វើសង្កេតការណ៍នៅតាមការិយាល័យបោះឆ្នោតទាំងអស់។ លោកថា អ្នកសង្កេតការណ៍នឹងបញ្ជូនលទ្ធផលឆ្នោតមកកាន់ “បន្ទប់ស្ថានការណ៍បោះឆ្នោត” ដើម្បីផ្សាយលទ្ធផលភ្លាមៗតាមដែលអាចធ្វើទៅបាន។
លោក សំ គន្ធាមី៖ «នៅពេលដែលយើងទទួលបានទិន្នន័យនៃការរាប់សន្លឹកឆ្នោតតាមការិយាល័យទាំងអស់ដែលអ្នកសង្កេតការណ៍បានបញ្ជូនមក ទីមួយយើងនឹងផ្សាយព័ត៌មានលទ្ធផលនៃការបោះឆ្នោត ប៉ុន្មានក្រោយដែលអាចធ្វើទៅបាន។ រៀបចំបញ្ចេញរបាយការណ៍បឋមពីលទ្ធផលនៃការបោះឆ្នោតនីមួយៗហ្នឹង។ បោះឆ្នោតឃុំ យើងនឹងចេញរបាយការណ៍ក្នុងយប់ហ្នឹងតែម្ដង»។
នាយកប្រតិបត្តិនៃអង្គការនិចហ្វិក លោក សំ គន្ធាមី បន្ថែមថា ក្រុមការងារនៃបន្ទប់ស្ថានការណ៍បោះឆ្នោត បានធ្វើសំណើទៅសហភាពអឺរ៉ុប រួចហើយ ដើម្បីស្នើសុំជំនួយថវិកាសម្រាប់ផ្គត់ផ្គង់លើការចំណាយរបស់អ្នកសង្កេតការណ៍ម្នាក់ៗ។ លោកថា សហភាពអឺរ៉ុប បានសន្យាផ្ទាល់មាត់ថា នឹងផ្ដល់ជំនួយសម្រាប់អ្នកសង្កេតការណ៍ចំនួន ១ម៉ឺន ២ពាន់នាក់។
លោក សំ គន្ធាមី បញ្ជាក់បន្ថែមទៀតថា ក្រុមការងាររបស់លោកនឹងស្វះស្វែងរកថវិកាបន្ថែមទៀតតាមរយៈមូលនិធិ សម្រាប់ផ្ដល់ឱ្យអ្នកសង្កេតការណ៍ដែលនៅសល់ប្រមាណ ១ម៉ឺន ៣ពាន់នាក់ទៀត ហើយក្នុងម្នាក់ៗ ត្រូវចំណាយប្រមាណ ២២ដុល្លារ។
ក្រុមអង្គការសង្គមស៊ីវិលបានហៅបន្ទប់ស្ថានការណ៍ស្ដីពីការបោះឆ្នោតនេះថា “សាក្សីលទ្ធផលបោះឆ្នោត”។
កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ នឹងប្រព្រឹត្តទៅនៅថ្ងៃអាទិត្យ ទី៤ ខែមិថុនា ឆ្នាំ២០១៧។
នាយកប្រតិបត្តិនៃគណៈកម្មាធិការនិចហ្វិក លោក សំ គន្ធាមី ថ្លែងថា ក្រុមរបស់លោកបានបង្កើតកម្មវិធីបែបនេះដែរ កាលពីបោះឆ្នោតអាណត្តិមុន។ លោកថា កាលណោះអ្នកសង្កេតការណ៍មានចំនួនប្រមាណ ៥០ ទៅ ៦០ភាគរយប៉ុណ្ណោះ នៃចំនួនការិយាល័យបោះឆ្នោតទូទាំងប្រទេស ដែលធ្វើឱ្យការប្រមូលទិន្នន័យនៃភាពមិនប្រក្រតីក្នុងការិយាល័យបោះឆ្នោតនៅមានភាពខ្វះចន្លោះ។
ទាក់ទងនឹងបញ្ហានេះ អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប លោក ហង្ស ពុទ្ធា ថ្លែងថា គ.ជ.ប បើកទូលាយចំពោះការសង្កេតការណ៍ទាំងឡាយណាដែលជួយឱ្យការបោះឆ្នោតកាន់តែប្រសើរឡើង។ តែលោកស្នើថា រាល់អ្នកសង្កេតការណ៍ត្រូវទទួលបានការបណ្ដុះបណ្ដាលឱ្យបានត្រឹមត្រូវ៖ «ការចូលរួមពីគ្រប់ភាគីពាក់ព័ន្ធ ក្នុងនោះពីអ្នកសង្កេតការណ៍ ពិតជាផ្ដល់សារសំខាន់ដល់ការបោះឆ្នោតប្រព្រឹត្តទៅ ដែលលទ្ធផលចុងក្រោយអាចទទួលបានដោយគណបក្សនយោបាយ។ គ្រាន់តែថា គ.ជ.ប ស្នើសុំឱ្យមានការបណ្ដុះបណ្ដាលឱ្យបានហ្មត់ចត់ ឱ្យចេះច្បាប់ បទបញ្ជា និងនីតិវិធីដើម្បីចៀសវាង ការអនុវត្តទៅផ្ទុយទស្សនៈគ្នា ខាតពេលវេលាក្នុងការដោះស្រាយបញ្ហា»។
អ្នកនាំពាក្យ លោក ហង្ស ពុទ្ធា បញ្ជាក់ថា គ.ជ.ប នឹងទទួលចុះឈ្មោះចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៤ ខែឧសភា សម្រាប់អ្នកសង្កេតការណ៍ជាតិ។ ចំណែកអ្នកសង្កេតការណ៍អន្តរជាតិចាប់ផ្ដើមទទួលចាប់ពីថ្ងៃទី១៥ ខែកុម្ភៈ រហូតដល់ថ្ងៃទី៣០ ខែឧសភា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

Friday, February 24, 2017

គណបក្សប្រឆាំងកំណត់ថ្ងៃទី២ ខែមីនា ធ្វើសមាជវិសាមញ្ញជ្រើសរើសមេបក្ស

អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងនៅទីស្នាក់ការគណបក្សសង្គ្រោះជាតិ នាសង្កាត់ចាក់អង្រែលើ រាជធានីភ្នំពេញ នៅថ្ងៃទី២៤ ខែកុម្ភៈ ឆ្នាំ២០១៧។ RFA/Brach
Chev

គណៈកម្មការអចិន្ត្រៃយ៍គណបក្សសង្គ្រោះជាតិ សម្រេចកំណត់ថ្ងៃ២ ខែមីនា ខាងមុខដើម្បីធ្វើសមាជវិសាមញ្ញរៀបចំរចនាសម្ពន្ធក្បាលម៉ាស៊ីនបក្សជាថ្មី។ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងនៅរសៀលថ្ងៃទី២៤ ខែកុម្ភៈ ថា ពិធីនេះធ្វើនៅទីស្នាក់កណ្ដាលគណបក្សសង្គ្រោះជាតិ ក្រុងភ្នំពេញ ដែលមានមន្ត្រីសំខាន់ៗទូទាំងប្រទេសចំនួន ១.០០០នាក់ចូលរួម។
មួយសប្ដាហ៍ទៀតប៉ុណ្ណោះ គណបក្សសង្គ្រោះជាតិ នឹងបោះឆ្នោតជ្រើសរើសប្រធាន និងអនុប្រធានគណបក្សនេះ តាមរយៈការធ្វើសមាជវិសាមញ្ញ ព្រោះអ្នកចូលរួមចំនួន ១.០០០នាក់នោះ ជាអ្នកមានសិទ្ធិបោះឆ្នោតជ្រើសក្បាលម៉ាស៊ីនបក្ស។ អ្នកនាំពាក្យគណបក្សសង្គ្រោះជាតិ លោកឲ្យអាស៊ីសេរី ដឹងក្រោយកិច្ចប្រជុំផ្ទៃក្នុងបក្សថា ត្រូវការជ្រើសរើសក្បាលម៉ាស៊ីនថ្មីដឹកនាំបក្ស។ ទោះយ៉ាងនេះក្ដី លោក យឹម សុវណ្ណ មិនប្រាប់ដឹងពីរូបមន្តនៃជ្រើសរើសប្រធាន ឬអនុប្រធានគណបក្សនៅឡើយដែរ៖ «»។
បន្ថែមពីនេះ សេចក្ដីប្រកាសព័ត៌មានរបស់គណបក្សសង្គ្រោះជាតិ ចុះថ្ងៃទី២៤ ខែកុម្ភៈ ឲ្យដឹងថា សមាជវិសាមញ្ញនេះ មានគោលបំណងធំៗបី ដើម្បីអបអរសាទរបញ្ជីបេក្ខជនឈរក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ។ បោះឆ្នោតជ្រើសតាំងប្រធាន និងអនុប្រធានបក្ស និងអនុម័តសារនយោបាយសម្រាប់ប្រើក្នុងការបោះឆ្នោតឃុំ-សង្កាត់ខាងមុខ។
ចាប់ទាំងពីរតំណាងរាស្ត្រគណបក្សប្រជាជនកម្ពុជា អនុម័តសេចក្ដីស្នើវិសោធនកម្មច្បាប់ស្ដីពីគណបក្សនយោបាយដ៏ចម្រូងចម្រាសដែលរដ្ឋសភាបានអនុម័តកាលពីថ្ងៃទី២០ ខែកុម្ភៈ ដែលហាមមិនឲ្យអ្នកមានទោសធ្វើប្រធាន អនុប្រធានគណបក្ស សមាជិកនៃសមាជិកគណៈកម្មាធិការនាយក។ សមាជិកគណៈកម្មាធិការនាយកនៃគណបក្សប្រឆាំង ៣រូប ដែលកំពុងជាប់ឃុំក្នុងពន្ធនាគារព្រៃស បានលាឈប់ពីតួនាទីនេះ។ ចំណែកលោក សម រង្ស៊ី អតីតប្រធានគណបក្សសង្គ្រោះជាតិ បានលាលែងពីតួនាទីប្រធានបក្សមុនរដ្ឋសភាអនុម័តសេចក្ដីស្នើវិសោធនកម្មច្បាប់ស្ដីពីគណបក្សនយោបាយម្ល៉េះ។
នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និចហ្វិក លោក សំ គន្ធាមី យល់ថា ការធ្វើសមាជបក្សរបស់គណបក្សប្រឆាំងជារឿងល្អ។ ទាក់ទងការជ្រើសរើសក្បាលម៉ាស៊ីនបក្ស លោកយល់ថា គណបក្សសង្គ្រោះជាតិ គួរមានប្រធានគណបក្សតែម្នាក់ និងអនុប្រធានគណបក្សតែម្នាក់បានហើយ៖ «»។
ការប្រជុំរបស់ផ្ទៃក្នុងរបស់គណបក្សសង្គ្រោះជាតិ នៅពេលនេះ ដំណាលគ្នានឹងហ្វេសប៊ុក (Facebook) មួយឈ្មោះ “សីហា” ដែលជំនាញខាងបង្ហោះសំឡេងឆ្លើយឆ្លងរឿងអាស្រូវគណបក្សប្រឆាំង បានបង្ហោះសំឡេងដែលគេសង្ស័យថា ជាការសន្ទនារបស់លោក សម រង្ស៊ី បង្គាប់ឲ្យលោក យឹម សុវណ្ណ ធ្វើជាអនុប្រធានគណបក្សសង្គ្រោះជាតិ ក្នុងចំណោមអនុប្រធានទាំងបីរបស់គណបក្សនេះ។ ប៉ុន្តែអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បដិសេធមិនឆ្លើយតបការសន្ទនានេះទេ និងបង្វែរសំណួរនេះទៅអ្នកទម្លាយសារឆ្លើយឆ្លងនោះវិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

លោក Pence៖ សេតវិមានរបស់លោក Trump កំពុងតែធ្វើទៅតាមពាក្យសន្យា

លោកអនុប្រធានាធិបតី Mike Pence ថ្លែងនៅសន្និសីទសកម្មភាពនយោបាយអភិរក្សនិយម ឬហៅកាត់ថា CPAC នៅ National Harbor កាលពីថ្ងៃទី២៣ ខែកុម្ភៈ ឆ្នាំ២០១៧។

លោកប្រធានាធិបតីសហរដ្ឋអាមេរិក Donald Trump នឹងថ្លែងសុន្ទរកថាទៅកាន់អ្នកអភិរក្សនិយមរាប់ពាន់នាក់នៅថ្ងៃសុក្រនេះ នៅក្នុងថ្ងៃទី៣ ដែលជាថ្ងៃចុងបញ្ចប់នៃសន្និសីទសកម្មភាពនយោបាយអភិរក្សនិយម ឬហៅកាត់ថា CPAC ដែលឆ្នាំធ្វើឡើងនៅក្បែររដ្ឋធានីវ៉ាស៊ីនតោន។
លោកអនុប្រធានាធិបតី Mike Pence បានថ្លែងនៅឯព្រឹត្តិការណ៍កាលពីថ្ងៃព្រហស្បតិ៍ ដោយប្រាប់ទៅដល់ក្រុមអភិរក្សនិយមថា សេតវិមានរបស់លោក Trump «កំពុងតែធ្វើទៅតាមការសន្យា‍»។
លោក Pence គឺជាសមាជិកគណបក្សសាធារណរដ្ឋជាន់ខ្ពស់បំផុតហើយដែលបានថ្លែងនៅឯសន្និសីទ CPAC ដែលជាការជួបជុំគ្នារវាងពួកអភិរក្សនិយមប្រចាំឆ្នាំដ៏ធំជាងគេបំផុត។
ក្រុមមនុស្សទាំងនោះបានមកដល់សណ្ឋាគារនៅម្តុំ National Harbor នៃរដ្ឋMaryland ប្រកបដោយភាពក្លៀវក្លា ដោយនេះជាលើកទីមួយហើយក្នុងរយៈពេល១០ឆ្នាំចុងក្រោយនេះ ដែលទាំងសេតវិមាននិងសភាត្រូវបានគ្រប់គ្រងដោយគណបក្សសាធារណរដ្ឋ។
នៅក្នុងសុន្ទរកថាដែលប្រៀបដូចជាយុទ្ធនាការមួយ លោក Pence បានហៅមេរបស់លោក គឺលោកប្រធានធិបតី Trump ថា ជាបុរសដែលប្រកបដោយភាពជឿជាក់ ប្រកបដោយវិចារណញាណ និងប្រកបដោយភាពអង់អាចក្លាហាន‍ ហើយលោកបន្ថែមទៀតថា លោក Trump កំពុងតែធ្វើទៅតាមពាក្យសន្យាដែលលោកបានសន្យាទៅកាន់ពលរដ្ឋអាមេរិកនៅក្នុងអំឡុងពេលយុទ្ធនាការបោះឆ្នោត។
លោក Pence បានថ្លែងថា ប្រព័ន្ធផ្សព្វផ្សាយ និងគណបក្សប្រជាធិបតេយ្យនៅតែព្យាយាមបង្អាក់លោក Trump និងចលនារបស់ក្រុមអភិរក្សនិយម។ ប៉ុន្តែលោកបានថ្លែងថា វាគឺពេលដែលត្រូវបង្ហាញហើយថា ចម្លើយរបស់ក្រុមអភិរក្សនិយមគឺជាចម្លើយដ៏ល្អបំផុតសម្រាប់ប្រទេសនេះ ដូចជាការបន្ថែមការងារ កាត់បន្ថយពន្ធ ការពង្រឹងផ្នែកយោធា និងការគោរពទៅតាមរដ្ឋធម្មនុញ្ញ។
កាលពីព្រឹកថ្ងៃព្រហស្បតិ៍នេះ ប្រធានផ្នែកយុទ្ធសាស្ត្ររបស់សេតវិមានលោក Steve Bannon បានប្រាប់ក្រុមអភិរក្សនិយមឲ្យរំពឹងទុកជាមុននូវការប្រយុទ្ធគ្នាជាមួយនឹងប្រព័ន្ធផ្សព្វផ្សាយ និងក្រុមប្រឆាំងដទៃទៀត‍៕

kh-cnn

Pages

Monday, February 27, 2017

លោក ត្រាំ បានចំអកដល់ការបោះឆ្នោតជ្រើសរើសប្រធានថ្មីរបស់គណបក្សប្រជាធិបតេយ្យ

អភិបាលរដ្ឋនានានៅអាមេរិកនឹងផ្តោតទៅលើកិច្ចខិតប្រឹងប្រែងជួយកុមារអត់ឃ្លាននិងស្តារហេដ្ឋារចនាសម្ព័ន្ធ

បងប្រុសឪពុកតែមួយម្តាយទីទៃរបស់មេដឹកនាំកូរ៉េខាងជើងស្លាប់ក្នុងរយៈពេល២០នាទីក្រោយរងការវាយប្រហារ

រូបភាពជុំវិញពិភពលោក ២៦ កុម្ភៈ ២០១៧

ប្រទេសឥណ្ឌាជាប់កំណត់ត្រាក្នុងការបង្ហោះផ្កាយរណបចំនួន១០៤គ្រឿងក្នុងទីអវកាស

លោក ហ៊ុន សែន ៖ ទប់ឲ្យបាន ស្អីៗចាំនិយាយគ្នាក្រោយ ដើម្បីការពារសន្តិភាព

Sunday, February 26, 2017

លោក កឹម សុខា៖ សន្តិភាពពិតគឺសន្តិភាពទាំងផ្លូវកាយទាំងផ្លូវចិត្ត

កំណើននៃចំនួនអ្នកសង្កេតការណ៍ នឹងធ្វើឲ្យប្រជាពលរដ្ឋកាន់តែទុកចិត្តលើដំណើការបោះឆ្នោត

គណៈកម្មាធិការជាតិប្រជាធិបតេយ្យបានបោះឆ្នោតជ្រើសរើសលោក Tom Perez ជាប្រធានថ្មី

ទាហានអ៊ីរ៉ាក់ប្រឈមនឹងការប្រយុទ្ធស្វិតស្វាញ ខណៈដែលការប្រយុទ្ធនៅទីក្រុងMosul ចេះតែរំកិលទៅមុខ

ប៉ូលិសអាល្លឺម៉ង់បាញ់និងធ្វើឲ្យបុរសម្នាក់រងរបួស ក្រោយពីការវាយប្រហារដោយបើករថយន្តបំបុក

ប៉ាគីស្ថាននិងអាហ្វហ្គានីស្ថាននឹងបើកកិច្ចប្រជុំប្រយុទ្ធប្រឆាំងនឹងអំពើភេរវកម្ម

ទីប្រឹក្សាសន្តិសុខជាតិថ្មីត្រូវបានរាយការណ៍ថា ឃ្លាតឆ្ងាយពីទស្សនៈរបស់រដ្ឋបាលលោក Trump ចំពោះសាសនាឥស្លាម

ម៉ាឡេស៊ីព្រមានចាប់ខ្លួនមន្ត្រីកាទូតកូរ៉េខាងជើងមួយរូបបើមិនសហការ

ក្រុមបាតុករហ្វីលីពីនប្រារព្ធខួបបដិវត្តន៍ដើម្បីថ្កោលទោសការសម្លាប់មនុស្ស

រូបភាពជុំវិញពិភពលោក ២៤ កុម្ភៈ ២០១៧

សង្គមស៊ីវិលចាប់ផ្ដើមកម្មវិធី “បន្ទប់ស្ថានការណ៍ស្ដីពីការបោះឆ្នោត” ដើម្បីឃ្លាំមើលការបោះឆ្នោត

Friday, February 24, 2017

គណបក្សប្រឆាំងកំណត់ថ្ងៃទី២ ខែមីនា ធ្វើសមាជវិសាមញ្ញជ្រើសរើសមេបក្ស

លោក Pence៖ សេតវិមានរបស់លោក Trump កំពុងតែធ្វើទៅតាមពាក្យសន្យា

How to earn money from enrich asia

Search This Blog