អនុប្រធានសហជីពសេរីកម្មករ លោក ម៉ាន់ សេងហាក់ ថ្លែងថា ការហាមប្រាមបែបនេះ គឺជាការរឹតត្បិតសេរីភាពការបញ្ចេញមតិ។ ប៉ុន្តែលោកថា សហជីពពុំមានគម្រោងអញ្ជើញអ្នកតំណាងរាស្ត្រនៃគណបក្សសង្គ្រោះជាតិ ចូលរួមថ្លែងសារនយោបាយនោះទេ។
លោកថា នេះជាពិធីសាសនា និងជាឱកាសអំពាវនាវឲ្យអាជ្ញាធររដ្ឋាភិបាល ពន្លឿនស៊ើបអង្កេត និងស្រាវជ្រាវរកឃាតក និងអ្នកបញ្ជាឲ្យបាញ់សម្លាប់លោក ជា វិជ្ជា៖ «សហជីពសេរីយល់ឃើញថា ការដាក់កំហិតរបស់សាលារាជធានីភ្នំពេញ ទៅលើនយោបាយអ្នកនយោបាយមិនឲ្យថ្លែងសារនោះគឺជារឿងរបស់សាលារាជធានីភ្នំពេញ។ ខ្ញុំគិតថា នេះគឺជាការរឹតត្បិតការបញ្ចេញមតិ គេថាក្រែងលោ ១១៨នាក់ គាត់មកថ្លែងសារនយោបាយអីទៅវាប៉ះពាល់ខាងអ្នករៀបចំ ពីព្រោះគេថា គណបក្សសង្គ្រោះជាតិ គេរំលាយហើយ។ ប៉ុន្តែបើសិនជាអ្នកនយោបាយណាគេអញ្ជើញចូលរួមសហជីពពួកយើងនឹងស្វាគមន៍»។
អភិបាលរងរាជធានី លោក មាន ចាន់យ៉ាដា កាលពីល្ងាចថ្ងៃពុធ ទី១៧ មករា បានហៅសហជីពសេរីកម្មករប្រជុំអំពីការជូនដំណឹងធ្វើពិធីដាក់កម្រងផ្កា គោរពវិញ្ញាណក្ខន្ធលោក ជា វិជ្ជា។ ក្រៅអំពីការហាមប្រាមមិនឲ្យតំណាងរាស្ត្រគណបក្សសង្គ្រោះជាតិ ១១៨រូប ចូលរួមថ្លែងសារនយោបាយក្នុងពិធីនេះ សាលាក្រុងមិនអនុញ្ញាតឲ្យហែក្បួនឡើយ ដោយយកលេសថា ខ្លាចកកស្ទះចរាចរណ៍។
សហជីពសេរីកម្មករ គ្រោងរៀបចំពិធីជួបជុំដាក់កម្រងផ្កា គោរពវិញ្ញាណក្ខន្ធលោក ជា វិជ្ជា អតីតប្រធានសហជីព គម្រប់ខួប ១៤ឆ្នាំ នៅនៅថ្ងៃច័ន្ទ ទី២២ មករា ដោយមានអ្នកចូលរួមប្រមាណ ១៥០នាក់ គឺជាក្រុមគ្រួសារ សាច់ញាតិ មិត្តភ័ក្ដិ ថ្នាក់ដឹកនាំសមាជិកសហជីពសេរីកម្មករ នៅទីតម្កល់រូបសំណាកលោក ជា វិជ្ជា ខាងមុខវត្តលង្កា។
លោក ជា វិជ្ជា ជាអតីតប្រធានសហជីពសេរីកម្មករ ដែលល្បីឈ្មោះខាងទាមទារផលប្រយោជន៍ជូនកម្មករ ត្រូវបានឃាតកបាញ់សម្លាប់នៅតូបលក់កាសែតជិតវត្តលង្កា ក្រុងភ្នំពេញ កាលពីព្រឹកថ្ងៃទី២២ ខែមករា ឆ្នាំ២០០៤។
ជុំវិញសំណុំរឿងបាញ់សម្លាប់មេដឹកនាំសហជីពដ៏ល្បីឈ្មោះនេះ កាលពីថ្ងៃទី១៥ ខែកញ្ញា ឆ្នាំ២០១៥ លោកនាយករដ្ឋមន្ត្រី ហ៊ុន សែន បានបង្កើតគណៈកម្មការអន្តរក្រសួងស៊ើបអង្កេតពិសេសលើឃាតកម្មលោក ជា វិជ្ជា និងមេសហជីពពីររូបផ្សេងទៀត គឺលោក ហ៊ី វុទ្ធី និងលោក រស់ សុវណ្ណារ៉េត ប៉ុន្តែរហូតមកដល់ពេលនេះនៅមិនទាន់មានពន្លឺនៃការស៊ើបអង្កេតនៅឡើយទេ ពោលគឺឃាតកពិតប្រាកដ និងអ្នកបញ្ជាអោយបាញ់សម្លាប់មេសហជីពទាំងពីរនៅតែស្ថិតនៅក្រៅសំណាញ់ច្បាប់នៅឡើយ ជាង១ទសវត្សក្រោយឃាតកម្មនេះ៕
No comments:
Post a Comment