ការឆ្លើយតបនេះ ក្រោយពេលលោកនាយករដ្ឋមន្ត្រីកាលពីព្រឹកមិញ បានប្រកាសចំឈ្មោះថា លោក វន់ ពៅ ថាកំពុងតែគេចខ្លួនទៅក្រៅប្រទេស និងឲ្យវិលត្រឡប់មកវិញ ដោយគ្មានការចាប់ខ្លួន។
ជាមួយគ្នានេះដែរ កាលពីថ្ងៃព្រហស្បត្តិ៍ទី១៦ ខែវិច្ឆិកា ជាថ្ងៃបើកសវនាការរំលាយគណបក្សសង្គ្រោះជាតិនាតុលាការកំពូល ក្រុមមេធាវីបានរបស់ក្រសួងមហាផ្ទៃបានបង្ហាញវីដេអូស្ដីពីសកម្មភាពលោក វ៉ន ពៅ បានដឹកនាំការតវ៉ាមួយនៅខាងក្រៅទីស្ដីការគណៈរដ្ឋមន្ត្រីក្នុងឆ្នាំ២០១៣ និងទាមទារឲ្យលោកហ៊ុន សែន ចុះចេញពីតំណែង។
សកម្មភាពទាំងនេះ ជាអ្វីដែលក្រុមមេធាវីយល់ថាជាការពាក់ព័ន្ធទៅហ្នឹងចលនារបស់គណបក្សប្រឆាំងក្នុងការប៉ុនប៉ងធ្វើ ”បដិវត្តផ្កាឈូក” ដើម្បីផ្ដួលរំលំរាជរដ្ឋាភិបាល។
លោកវ៉ន ពៅ ឲ្យដឹងថាប៉ុន្មានថ្ងៃចុងក្រោយនេះលោកមិនបានរត់ទៅណានោះទេលោកគ្រាន់តែអញ្ជើញទៅការិយាល័យសមាគមរបស់លោកនាក្រុងប៉ោយប៉ែត ខេត្តបន្ទាយមានជ័យប៉ុណ្ណោះ។
លោកថ្លែងថា៖ “ខ្ញុំមិនបានទៅណាទេខ្ញុំគ្រាន់តែទៅលេងខេត្តបន្ទាយមានជ័យ ក្រុងប៉ោយប៉ែត ព្រោះខ្ញុំមានការិល័យសាខានៅទីនោះ”។
“ខ្ញុំមានអារម្មណ៍ថាជាការល្អប្រសើរហើយដែលយើងអត់មានធ្វើការខុសអីផង ហើយគាត់អំពាវនាវឲ្យមកវីញ កុំឲ្យចេះតែចោទអញ្ចឹងវាធ្វើឲ្យមនុស្សមានការបារម្មណ៍ដែរ។ ឥឡូវយើងមានការបារម្មណ៍ ពេលគាត់និយាយអញ្ចឹងដូចជាបង្ហាញថាផ្តល់ភាពកក់ក្ដៅដល់អ្នកទាំងឡាយណាដែលតែងតែបារម្មណ៍ដូច(ខ្ញុំ)អញ្ចឹងដែរ”។
លោកក៏បដិសេធចំពោះការចោទប្រកាន់ពីការចូលរួមឬ ប៉ុនប៉ងធ្វើបដិវត្តពណ៌ណាមួយប្រឆាំងនឹងរាជរដ្ឋាភិបាល ហើយថាទាំងនេះគឺ«ធ្វើតាមវិជ្ជាជីវៈគឺការពារប្រយោជន៍កម្មករក្រៅប្រព័ន្ធតែប៉ុណ្ណឹង»។
ថ្លែងក្នុងឱកាសជួបសំណេះសំណាលជាមួយតំណាងកម្មការកម្មារិនីជាង៥ពាន់នាក់មកពីរោងចក្រចំនួនជាង៤.៦០០ នាមជ្ឈមណ្ឌលពីព័រណ៍ និងសន្និបាតកោះពេជ្រកាលពីព្រឹកថ្ងៃអាទិត្យ លោកនាយករដ្ឋមន្ត្រី ហ៊ុន សែន ប្រកាសថាមានមនុស្សមួយចំនួនព្រោះតែការធ្វើសកម្មភាពល្មើសច្បាប់ កំពុងតែគេចខ្លួនទៅក្រៅប្រទេស។
លោកថា លោកបានទាក់ទងទៅលោក វ៉ន ពៅ ប្រធានសមាគមសេដ្ឋកិច្ចក្រៅប្រព័ន្ធ ឲ្យត្រឡប់មកផ្ទះវិញ ដោយធានាអះអាងថា គ្មាននរណាចាប់ខ្លួននោះទេ។
លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងមនុស្សចំនួន២២នាក់ទៀត ត្រូវបានអាជ្ញាធរចាប់ខ្លួនក្នុងហេតុការណ៍ប៉ះទង្គិចរវាងកម្មករ និងសមត្ថកិច្ច កាលពីថ្ងៃទី០២ និងទី០៣ ខែមករា ឆ្នាំ២០១៤ នៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង នៅពេលដែលកម្មករធ្វើបាតុកម្មទាមទារដំឡើងប្រាក់ឈ្នួលកម្មករ ១៦០ដុល្លារក្នុងមួយខែ។ អ្នកទាំងអស់ត្រូវបានចោទប្រកាន់ពីបទញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម។
នៅថ្ងៃទី៣០ ខែឧសភា ឆ្នាំ២០១៤ សាលាដំបូងរាជធានីភ្នំពេញ បានបើកសនវនាការកាត់ក្តីលើអ្នកទាំងនេះ និងបានសម្រេចផ្តន្ទាទោសលោក វ៉ន ពៅ ចំនួន៤ឆ្នាំកន្លះ ប៉ុន្តែទោសទាំងនេះត្រូវព្យួរវិញ ដោយតុលាការសម្រេចដោះលែងរូបលោក និងអ្នកផ្សេងទៀតផងដែរ៕
