kh-cnn

Sunday, December 10, 2017

អាជ្ញាធរខេត្តព្រះសីហនុ ធ្វើសន្និសីទកាសែតបង្ហាញមុខ ក្រុមចាប់ជំរិតជនជាតិចិន៣នាក់នៅកម្ពុជា

អាជ្ញាធរខេត្តព្រះសីហនុ នៅថ្ងៃទី ១០ ធ្នូ នេះ បានធ្វើសន្និសីទកាសែតមួយ ដើម្បីបង្ហាញមុខក្រុមចាប់ជំរិតជាជនជាតិចិន៣រូប ក្រោយពីការបង្ក្រាបបានកាលពីយប់ថ្ងៃទី ០៩ ធ្នូ។ ការប៉ុនប៉ងចាប់ជំរិតលើជនជាតិចិនដូចគ្នាតែមិនបានសម្រេចនេះ គឺក្នុងបំណងទាមទារប្រាក់ចំនួន៨០ម៉ឺនដុល្លារអាមេរិក។ សូមបញ្ជាក់ថា នេះគឺជាករណីចាប់ជំរិតទី០១ ដែលបានកើតឡើងនៅក្នុងទឹកដីខេត្តទេសចរណ៍ដ៏ធំរបស់កម្ពុជាមួយនេះ ខណៈប្រជាពលរដ្ឋ និងអ្នកទេសចរណ៍កម្ពុជា បានរអ៊ូរទាំកាន់តែខ្លាំង ពីវត្តមានដ៏ច្រើនរបស់ជនជាតិចិន នៅក្នុងទឹកដីខេត្តព្រះសីហនុ។

អំពើចាប់ជំរិតជនជាតិចិនតែមិនបានសម្រេចនេះ បានកើតឡើង កាលពីវេលាម៉ោង ៦ និង៣០នាទីយប់ និងទី០៩ ធ្នូ ស្ថិតនៅផ្ទះជួលមួយកន្លែង ក្នុងបុរី ប៊ីអេស (BS) ក្រុមទី១ ភូមិ៥ សង្កាត់លេខ៤ ក្រុងព្រះសីហនុ ដោយក្រុមជនសង្ស័យមានគ្នា៣នាក់។ ពួកគេបានរៀបផែនការនិងចាប់ជំរិតជនរងគ្រោះម្នាក់ឈ្មោះ LI FUJIE ភេទប្រុសអាយុ៤៧ឆ្នាំ ជាជនជាតិចិនដូចគ្នា ដែលមានតួនាទីជាប្រធានទីផ្សារផ្នែកទំនាក់ទំនងនាំភ្ញៀវប្រចាំកាស៊ីណូមួយកន្លែង នៅខេត្តព្រះសីហនុ។

បើតាមរបាយការណ៍ គឺកាលពីយប់ថ្ងៃទី ០៨ ធ្នូ ជនរងគ្រោះឈ្មោះ LI FUJIE ភេទប្រុសអាយុ៤៧ឆ្នាំ ជាជនជាតិចិន បានបើករថយន្ដម៉ាក PORSCHE តែម្នាក់ឯង លុះមកដល់កន្លែងស្ងាត់ត្រង់ចំណុចជិតស្ថានីយចំរោះទឹកអូរឈើទាល់ ក្នុងសង្កាត់លេខ៤ ក្រុមជនសង្ស័យមានគ្នា០៣នាក់ បានបើករថយន្ដ Lexus ស្ទាក់គៀរ។ ពេលនោះជនរងគ្រោះបានឈប់រថយន្តដើម្បីសួរនាំ ប៉ុន្តែត្រូវបានក្រុមជនល្មើសយកកាំភ្លើងភ្ជង់ រួចបានចាប់ក្រៀកដាក់ចូលទៅក្នុងរថយន្ត ដឹកយកទៅបង្ខាំងទុកតែម្តង។ បន្ទាប់មកជនល្មើស បានទុកគ្នាម្នាក់ឲ្យនៅយាមជនរងគ្រោះ រីឯគ្នាជនល្មើស០២នាក់ទៀត បានបើករថយន្តរបស់ជនរងគ្រោះម៉ាក PORSCHE យកទៅផ្លុងចោល នៅក្បែបេនឡានចាស់ ស្ថិតនៅក្នុងខេត្តព្រះសីហនុដដែល។ បន្ទាប់មក នៅប្រមាណជា២ម៉ោងក្រោយមក ក្រុមជនសង្ស័យបានទូរស័ព្ទទៅប្អូនរបស់ជនរងគ្រោះ ដោយបានទាមទារប្រាក់ចំនួន៨០ម៉ឺនដុល្លារអាមេរិក ប៉ុន្តែផែនការរបស់ពួកគេ ត្រូវបានបរាជ័យ បន្ទាប់ពីសមត្ថកិច្ចបង្ក្រាបខេត្តព្រះសីហនុបង្ក្រាបបាន កាលពីយប់ថ្ងៃទី ០៩ ធ្នូ ឆ្នាំ ២០១៧នេះ។ ប្រតិបត្តិការនេះ ដឹកនាំផ្ទាល់ដោយលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដោយមានកិច្ចសហការពីព្រះរាជអាជ្ញារផង។

នៅក្នុងប្រតិបត្តិការនេះ សមត្ថកិច្ចបានចាប់ខ្លួនជនសង្ស័យបានចំនួន៣នាក់ ដែលម្នាក់ឈ្មោះ ZHENG RONGMAO ភេទប្រុស អាយុ ២៦ឆ្នាំ ទី២.ឈ្មោះ DAI HONGDA ភេទប្រុស អាយុ ២៣ឆ្នាំ និងអ្នកទី៣.ឈ្មោះ LIN JINPEI ភេទប្រុសអាយុ២៤ឆ្នាំ។ ជាមួយនឹងការចាប់ខ្លួននេះ សមត្ថកិច្ចបានរកឃើញនូវវត្ថុតាងមួយចំនួនដូចជា៖ កាំភ្លើងខ្លីមួយដើម (BERETTA STOM) មានគ្រាប់ចំនួន១០គ្រាប់, កូនកាំប៊ិតមួយ, ខ្សែចងរឹត (ស៊ីល) ចំនួន២ដុំ, ទូរស័ព្ទដៃចំនួន០៦គ្រឿង និង រថយន្តលុចសីស RX300 ចំនួន១គ្រឿងផង។

តាមរយៈសន្និសីទកាសែតនៅថ្ងៃនេះ លោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីហនុ បានឲ្យដឹងថា ក្រុមជនសង្ស័យទាំងនេះមកពីប្រទេសចិន ដោយបានប្រើប្រាស់លិខិតឆ្លងដែនពីរផ្សេងៗគ្នា មួយជាលិខិតឆ្លងដែនពិតប្រាកដសម្រាប់ធ្វើទិដ្ឋាការធ្វើដំណើរ និងមួយទៀតជាលិខិតឆ្លងដែនក្លែងក្លាយ ប្រើសម្រាប់ការជួលរថយន្ត និងជួលផ្ទះ ដើម្បីងាយស្រួលក្នុងការផ្លាស់ប្តូរអត្តសញ្ញាណនិងទីតាំងរបស់ពួកគេដើម្បីគេចខ្លួននៅពេលបែកការណ៍។ ហើយបើតាមការបញ្ជាក់ពីលោកស្នងការដដែល ក្រុមនេះ បានធ្វើដំណើរមកកាន់ប្រទេសកម្ពុជា គឺដើម្បីតាមរកមើលអ្នកវិនិយោគិនចិនណាដែលមានប្រាក់ច្រើន ដើម្បីរកឱកាសចាប់ជំរិតជាបន្តបន្ទាប់ ប៉ុន្តែសកម្មភាពរបស់ពួកគេ ត្រូវបានបង្ក្រាបបានទាន់ពេលវេលា។

គួរជំរាបជូនថា នេះគឺជាអំពើចាប់ជំរិតជនជាតិចិនលើកទី០១ ដែលបានកើតឡើងនៅក្នុងខេត្តព្រះសីហនុ ខណៈដែលប្រជាពលរដ្ឋខ្មែរ កំពុងរអ៊ូរទាំទៅនឹងវត្តមានដ៏ច្រើនរបស់ជនជាតិចិននៅក្នុងខេត្តជាប់មាត់សមុទ្ររបស់កម្ពុជាមួយនេះ៕

សមាគមខ្មែរពីរនៅណូវ៉ែលហ្សេឡង់ប្រកាសគាំទ្រការរំលាយបក្សប្រឆាំង ខណៈពលរដ្ឋផ្សេងទៀតគ្រោងធ្វើបាតុកម្ម

សមាគមពលរដ្ឋខ្មែរចំនួន២ នៅប្រទេសណូវ៉ែលហ្សេឡង់កាលពីថ្ងៃទី៩ ធ្នូ បានដាក់លិខិតមួយទៅកាន់លោកTrevor Mallard ប្រធានរដ្ឋសភាប្រទេសនេះដោយរៀបរាប់ពីស្ថានភាពនយោបាយនៅកម្ពុជា។ សម្រាប់សមាគមពលរដ្ឋខ្មែរទាំងពីរនេះ ការសម្រេចរំលាយបក្សសង្គ្រោះជាតិដោយតុលាការកំពូល គឺបានធ្វើឡើងស្របតាមច្បាប់របស់កម្ពុជា។ ការចេញមុខមកគាំទ្រនេះ ធ្វើឡើងមុនពេលដែលពលរដ្ឋខ្មែរនៅណូវ៉ែលហ្សេឡង់ផ្សេងទៀតគ្រោងធ្វើបាតុកម្មប្រឆាំងនឹងការរំលាយបក្សសង្គ្រោះជាតិនៅថ្ងៃទី១២ ធ្នូខាងមុខ។

សមាគមពលរដ្ឋខ្មែរទាំងពីរនេះ រូមមានសមាគមយុវជនខ្មែរនៃរដ្ឋវែល្លីងតុន(Wellington) និង សមាគមខ្មែរ ហាមិលតុន-ភ្នំពេញ។ សមាគមទាំងពីរ បានចាត់ទុកការសម្រេចរំលាយគណបក្សសង្គ្រោះជាតិដោយតុលាការកំពូលកម្ពុជាថា ជាបុព្វសិទ្ធិរបស់កម្ពុជាក្នុងការអនុវត្តច្បាប់របស់ខ្លួន ដើម្បីធានាថា ដំណើរការលទ្ធិប្រជាធិបតេយ្យត្រូវបានគោរព។ សមាគមពលរដ្ឋខ្មែរទាំង២ ក៏បានបញ្ជាក់ប្រាប់លោកប្រធានរដ្ឋសភាណូវ៉ែលហ្សេឡង់ដែរថា ក្នុងនាមពលរដ្ឋខ្មែរណូវ៉ែលហ្សេឡង់ ពួកគេសូមប្រកាន់ខ្ជាប់ និងគោរពតាមគោលការណ៍របស់ប្រទេសដែលប្រកាន់យកនូវនីតិរដ្ឋ ដើម្បីធានាបាននូវការបន្ដលើកកម្ពស់លទ្ធិប្រជាធិបតេយ្យក្នុងប្រទេសកម្ពុជា តាមរយៈយន្ដការនៃការអនុវត្តច្បាប់ដ៏តឹងតែងក្នុងការធានារក្សាបាននូវសន្ដិភាព ស្ថេរភាព សន្ដិសុខ និងសណ្ដាប់ធ្នាប់សង្គម សម្រាប់ប្រជាជន និងសង្គមកម្ពុជា។
ជាកត់សម្គាល់ថា ការចេញមុខមកប្រកាសការពារចំណាត់ការរបស់តុលាការកំពូលកម្ពុជារបស់សមាគមពលរដ្ឋខ្មែរទាំងពីរពេលនានេះ បានធ្វើឡើងមុនប៉ុន្មានថ្ងៃប៉ុណ្ណោះដែលប្រជាពលរដ្ឋខ្មែរនៅក្នុងប្រទេសណូវ៉ែលហ្សេឡង់ផ្សេងទៀត គ្រោងធ្វើបាតុកម្មនៅថ្ងៃទី១២ ធ្នូខាងមុខ។ ជាបាតុកម្ម ដើម្បីទាមទារឲ្យដំណើរការគណបក្សសង្គ្រោះជាតិឡើងវិញ និងទាមទារឲ្យមានការដោះលែងលោកកឹម សុខា។ នេះបើតាមការបញ្ជាក់របស់លោកស្រីមួរ សុខហួរ ដែលជាអតីតអនុប្រធានគណបក្សសង្គ្រោះជាតិ។ ប៉ុន្តែចំពោះគម្រោងបាតុកម្មនេះ សមាគមពលរដ្ឋខ្មែរទាំងពីរ បានចាត់ទុកថា ជាការរៀបចំឡើងដោយមនុស្សមួយក្រុមតែប៉ុណ្ណោះ គឺពុំឆ្លុះបញ្ចាំងនូវទស្សនៈឫគំនិតរួមរបស់ប្រជាពលរដ្ឋខ្មែរណូវ៉ែលហ្សេឡង់ទាំងមូលនោះឡើយ។
សូមរំលឹកឡើងវិញថា គណបក្សសង្គ្រោះជាតិត្រូវបានតុលាការកំពូលរំលាយចោលកាលពីថ្ងៃទី១៦ ខែវិច្ចិកា ក្រោមការរិះគន់យ៉ាងសម្បើមដៃពីសំណាក់មជ្ឈដ្ឋានក្នុងស្រុកនិងអន្តរជាតិដោយបានសម្តែងទាំងការព្រួយបារម្ភផង និងព្រមានចាត់វិធានការផ្សេងៗផង បើសិនស្ថានភាពនយោបាយមិនធូរស្រាល។ ក្នុងនោះ សហរដ្ឋអាមេរិក បានចេញមុខចាត់វិធានការមុនគេ ដោយបានសម្រេចបញ្ឈប់ការផ្តល់ជំនួយដល់គណៈកម្មាធិការជាតិរៀបចំការបោះឆ្នោតកម្ពុជា និង បានប្រកាសលែងផ្តល់ទិដ្ឋាការដល់មន្ត្រីរដ្ឋាភិបាលកម្ពុជាមួយចំនួនព្រមទាំងក្រុមគ្រួសាររបស់ពួកគេផងដែរចំពោះការរួមចំណែកបង្កើតឲ្យមានរឿងរ៉ាវនេះ ដែលអាមេរិកចាត់ទុកថាជាផ្នែកមួយនៃការបំផ្លាញលទ្ធិប្រជាធិបតេយ្យនៅកម្ពុជា៕

Saturday, December 9, 2017

សមាជិកព្រឹទ្ធសភាអាមេរិកអបអរសាទរចំពោះការបិទទិដ្ឋាការលើមន្ត្រីកម្ពុជានិងក្រុមគ្រួសារ

សមាជិកព្រឹទ្ធសភាអាមេរិក លោក ថិត គ្រូស (Ted Cruz) អបអរសាទររដ្ឋមន្ត្រីការបរទេសអាមេរិក លោក រិក ធីលលើសិន (Rex Tillerson) ដែលបានបិទទិដ្ឋាការមន្ត្រីរដ្ឋាភិបាលកម្ពុជា និងក្រុមគ្រួសារដែលពាក់ព័ន្ធការបំផ្លាញលទ្ធិប្រជាធិបតេយ្យ និងការចាប់លោក កឹម សុខា ប្រធានគណបក្សសង្គ្រោះជាតិ ដាក់ពន្ធនាគារយ៉ាងអយុត្តិធម៌។
សេចក្ដីថ្លែងការណ៍របស់ លោក ថិត គ្រូស ចេញកាលពីថ្ងៃទី៨ ខែធ្នូ បញ្ជាក់ថា ការបិទទិដ្ឋាការមន្ត្រីរដ្ឋាភិបាល និងក្រុមគ្រួសារ ជាជំហានដំបូងដ៏មានប្រសិទ្ធភាពឆ្ពោះទៅស្តារលទ្ធិប្រជាធិបតេយ្យនៅកម្ពុជា ឡើងវិញ និងក៏ជាការឆ្លើយតបដ៏ចាំបាច់មួយចំពោះការកើនឡើងឥទ្ធិពលចិន នៅកម្ពុជា។
លោកបន្តថា លោក ហ៊ុន សែន មានជម្រើសដ៏សាមញ្ញមួយគឺត្រូវដោះលែងលោក កឹម សុខា អនុញ្ញាតឲ្យលោក សម រង្ស៊ី អាចចូលស្រុកវិញបាន លុបចោលសាលដីការម្លាយគណបក្សសង្គ្រោះជាតិ និងលើកលែងការហាមឃាត់លើប្រព័ន្ធផ្សព្វផ្សាយ និងអនុញ្ញាតឲ្យមានសេរីភាពផ្នែកបញ្ចេញមតិពេញលេញ បើមិនដូច្នោះទេ កម្ពុជានឹងរកទណ្ឌកម្មរបស់សហរដ្ឋអាមេរិក បន្ថែមទៀត។
លោក ថិត គ្រូស សរសេរបន្ថែមទៀតថា ពលរដ្ឋកម្ពុជា សមតែទទួលបានមេដឹកនាំល្អ ជាជាងមេដឹកនាំជាបុរសខ្លាំង ផ្តាច់ការ។ លោកសន្យាថា សហរដ្ឋអាមេរិកនឹងមិនបង្អង់ដៃចំពោះការប្តេជ្ញាការពារសិទ្ធិសេរីភាពនោះទេ។ ទោះបីសហរដ្ឋអាមេរិក បានលុបចោលជំនួយសម្រាប់ការបោះឆ្នោតនៅកម្ពុជា និងហាមឃាត់មន្ត្រីរដ្ឋាភិបាល និងក្រុមគ្រួសារមិនឲ្យចូលអាមេរិក ក៏ដោយ ក៏រដ្ឋាភិបាលលោក ហ៊ុន សែន នៅមិនទាន់បន្ទន់ឥរិយាបថនៅឡើយទេ ហើយថែមទាំងចោទសហរដ្ឋអាមេរិកថា ការផ្អាកទិដ្ឋាការនោះជារឿងនយោបាយ។
ព្រឹទ្ធសភាដ៏មានឥទ្ធិពល លោក ថិត គ្រូស កាលពីខែតុលា បានផ្ញើលិខិតមួយច្បាប់ទៅទូតខ្មែរប្រចាំនៅអាមេរិក ទាមទារឲ្យដោះលែង លោក កឹម សុខា ប្រសិនបើរដ្ឋាភិបាលកម្ពុជា មិនចង់រងទណ្ឌកម្មរបស់សហរដ្ឋអាមេរិក៕

សមាជិកព្រឹទ្ធសភាអាមេរិកដ៏មានឥទ្ធិពលម្នាក់សារទរការដាក់បំរាមទិដ្ឋការលើមន្ត្រីកម្ពុជាដែលធ្វើឲ្យខូចដល់ដំណើរការលទ្ធិប្រជាធិបតេយ្យ

សមាជិកព្រឹទ្ធសភា ស.រ.អា នៃគណបក្សសាធារណរដ្ឋ ដ៏មានឥទ្ធិពលមួយរូប មកពីរដ្ឋ Texas លោក Ted Cruz បានអបអរសារទរលោករដ្ឋមន្ត្រីការបរទេស Rex Tillerson ដែលបានចេញសេចក្តីប្រកាសដាក់បំរាមទិដ្ឋាការលើមន្ត្រីរដ្ឋាភិបាលកម្ពុជាដែលធ្វើឱ្យខូចដល់ដំណើរការលទ្ធិប្រជាធិបតេយ្យនៅកម្ពុជា។
នៅក្នុងសេចក្តីថ្លែងការណ៍មួយដែលបានចុះផ្សាយក្នុងគេហទំព័ររបស់លោក កាលពីថ្ងៃសុក្រម្សិលមិញ លោក Ted Cruz បាននិយាយថា៖ «នេះជាជំហានទីមួយយ៉ាងល្អឆ្ពោះទៅរកការធ្វើឲ្យមានលទ្ធិប្រជាធិបតេយ្យឡើងវិញក្នុងប្រទេសកម្ពុជា និង ជាការឆ្លើយតបមួយដែលត្រូវការយ៉ាងខ្លាំងដើម្បីទប់ទប់ឥទ្ធិពលចិន ដែលកាន់តែកើនឡើងនៅក្នុងទីក្រុងភ្នំពេញ»។
លោក Ted Cruz បានបន្តទៀតថា៖ «លោក ហ៊ុនសែន ប្រឈមនិងជម្រើសយ៉ាងសាមញ្ញមួយ គឺដោះលែងមេដឹកនាំគណបក្សប្រឆាំង លោក កឹម សុខា អនុញ្ញាតឲ្យលោក សម រង្ស៊ី វិលត្រឡប់ទៅកម្ពុជាវិញ ដាក់ឲ្យមានគណបក្សសង្គ្រោះជាតិឡើងវិញ លប់បំបាត់ការហាមប្រាមរបស់លោក ចំពោះការផ្សាយព័ត៌មានដោយចំហរ និង សិទ្ធិសេរីភាពក្នុងការនិយាយស្តី បើមិនដូច្នោះទេនឹងត្រូវប្រឈមនឹងការដាក់ទណ្ឌកម្មពីស.រ.អាថែមទៀត»។
នៅក្នុងសេចក្តីប្រកាសព័ត៌មានមួយកាលពីថ្ងៃសុក្រនេះ ក្រសួងការបរទេសកម្ពុជា បានសម្តែងនូវ«ការសោកស្តាយយ៉ាងខ្លាំងចំពោះការសម្រេចចិត្តចុងក្រោយរបស់ក្រសួងការបរទេសអាមេរិក ដែលពុំពិចារណាលើអង្គហេតុ និងអង្គច្បាប់ជុំវិញការវិវត្តនយោបាយថ្មីៗនៅកម្ពុជា‍»។ មកទល់នឹងម៉ោងផ្សាយនេះ VOA មិនទាន់អាចទាក់ទងសុំប្រតិកម្មពីសំណាក់រដ្ឋាភិបាលកម្ពុជា ចំពោះសេចក្តីថ្លែងការថ្មីរបស់សមាជិកព្រិទ្ធសភាស.រ.អា លោក Ted Cruz នៅឡើយទេ។ យើងនឹងផ្សាយជូនលោកអ្នកស្តាប់នៅពេលណាដែលយើងទទួលបានការឆ្លើយតប៕

បារាំងអំពាវនាវជាថ្មីឲ្យរដ្ឋាភិបាលកម្ពុជាវិលត្រលប់មកចូលរួមដំណើរការប្រជាធិបតេយ្យវិញ ខណៈ EU ចង់សើរើទំនាក់ទំនងកម្ពុជា-EU

បារាំង បានអំពាវនាវជាថ្មី ឲ្យអាជ្ញាធរកម្ពុជា វិលត្រលប់មកចូលរួមនៅក្នុងដំណើរការប្រជាធិបេតេយ្យ វិញ ហើយអនុញ្ញាតឲ្យគណបក្សប្រឆាំង ប្រព័ន្ធផ្សព្វផ្សាយ និងសង្គមស៊ីវិល មានដំណើរការដោយគ្មានការរារាំង។ នេះជាការអំពាវនាវ នៅក្នុងដំណើរទស្សនកិច្ចមកកម្ពុជា របស់ឯកអគ្គរដ្ឋទូតទទួលបន្ទុកសិទ្ធិមនុស្ស និងការចងចាំនៃក្រសួងអឺរុប និងការបរទេសបារាំង ពីថ្ងៃទី ៤ ដល់ថ្ងៃទី ៨ធ្នូ។ ជាមួយគ្នានេះ សហភាពអឺរុប (EU) ក៏បញ្ជាក់ដែរថា ខ្លួនកំពុងតែពិភាក្សាជាមួយនឹងក្រុមការងារ ដែលមានស្នាក់នៅទីក្រុងព្រុយសែល ដើម្បីសើរើពីទំនាក់ទំនងរវាងកម្ពុជា និងសហភាពអឺរុប ឆ្លើយតបនឹងស្ថានភាពនយោបាយនាពេលសព្វថ្ងៃ។

លោក François CROQUETTE (ហ្វ្រង់ស៊័រ ក្រូគែត) ឯកអគ្គរដ្ឋទូត ទទួលបន្ទុកសិទ្ធិមនុស្ស និងការចងចាំនៃក្រសួងអឺរ៉ុបនិងការបរទេសបារាំង បានគូសបញ្ជាក់សារជាថ្មី ពីការអំពាវនាវរបស់ប្រទេសបារាំង ឱ្យអាជ្ញាធរកម្ពុជាវិលត្រឡប់មកចូលរួម នៅក្នុងដំណើរការប្រជាធិបតេយ្យ ហើយអនុញ្ញាតឱ្យគណបក្សប្រឆាំង ប្រព័ន្ធផ្សព្វផ្សាយ និងសង្គមស៊ីវិល មានដំណើរការដោយគ្មានការរារាំង។
ជាការអំពាវនាវជាថ្មី បន្ទាប់ពីមានការរំលាយគណបក្សសង្គ្រោះជាតិ ជាបក្សប្រឆាំង និងជាគូបដិបក្ខដ៏ធំរបស់គណបក្សកាន់អំណាច ការឃុំខ្លួនលោកកឹម សុខា ក្នុងពន្ធនាគារ ការបញ្ឈប់ប្រព័ន្ធផ្សព្វផ្សាយ អាមេរិក និងការគម្រាមបិទអង្គការសង្គមស៊ីវិលមួយចំនួនជាដើម។
យ៉ាងណាក៏ដោយ លោកឯកអគ្គរដ្ឋទូត បានស្វាគមន៍ចំពោះការប្រកាសថា មជ្ឈមណ្ឌលសិទ្ធិមនុស្សកម្ពុជា (CCHR) នឹងមិនត្រូវបានបិទនោះឡើយ។ ហើយលោកសង្ឃឹមថា នឹងមានការវិវឌ្ឍជាវិជ្ជមានផ្សេងៗទៀត នៅពេលខាងមុខ ជាពិសេសពាក់ព័ន្ធនឹងសង្គមស៊ីវិល។
ស្របជាមួយគ្នានោះដែរ ឯកអគ្គរដ្ឋទូតសហភាពអឺរុបប្រចាំកម្ពុជា លោក George Edgar ក៏បានលើកឡើងពីការសើរើទំនាក់ទំនងរវាងកម្ពុជា និងសហភាពអឺរុប នៅក្នុងជំនួបសង្ខេបជាមួយអ្នកសារព័ត៌មាន នាល្ងាចថ្ងៃទី ៨ធ្នូ នាទីស្នាក់ការសហភាពអឺរុប ក្រុងភ្នំពេញ។ ជាជំនួបដែលធ្វើឡើង ក្រោយពីការដាក់ទណ្ឌកម្មផ្នែកទិដ្ឋាការរបស់សហរដ្ឋអាមេរិក មកលើមន្ត្រីរដ្ឋាភិបាលកម្ពុជាណា ដែលអាមេរិកចាត់ទុកថា បានចូលរួមបំផ្លាញដំណើរការលទ្ធិប្រជាធិបតេយ្យនៅកម្ពុជា។
ទោះមិនបានសម្តែងចំណាប់អារម្មណ៍លើចំណាត់ការរបស់សហរដ្ឋអាមេរិកមែន ប៉ុន្តែឯកអគ្គរដ្ឋទូតសហភាពអឺរុបប្រចាំកម្ពុជា បានឲ្យដឹងថា នៅរយៈពេលប៉ុន្មានថ្ងៃទៀត សហភាពអឺរុប នឹងបង្ហាញពីលទ្ធផលមួយ ឆ្លើយតបនឹងសកម្មភាពរបស់រដ្ឋាភិបាលកម្ពុជា នាពេលបច្ចុប្បន្ន ជាពិសេសគឺជុំវិញដំណើរការរៀបចំការបោះឆ្នោតជាតិ នាពេលខាងមុខ។ លទ្ធផល ដែលបានមកពីកិច្ចពិភាក្សា ក្នុងស្នាក់ការធំ ទីក្រុងព្រុយសែល ពាក់ព័ន្ធនឹងដំណើរការអនុវត្តលទ្ធិប្រជាធិបតេយ្យក្នុងប្រទេសកម្ពុជា។
យ៉ាងណាក៏ដោយ លោកសុខ ឥសាន្ត អ្នកនាំពាក្យគណបក្សប្រជាជនកម្ពុជា បានលើកឡើងនៅថ្ងៃទី ៩ធ្នូនេះថា ទោះបីជាមានការអំពាវនាវបែបណា ក៏រដ្ឋាភិបាលខ្មែរ ដាច់ខាតមិនអាចដើរថយក្រោយវិញបានទេ។ មិនបាន ដោយសារតែនេះ គឺជាការវិវន្តទៅរកការបំផ្លាញលទ្ធិប្រជាធិតេយ្យនៅកម្ពុជា ទៅវិញ។ លោកសុខ ឥសាន្ត ថាកម្ពុជាកំពុងតែអនុវត្តប្រជាធិតេយ្យ និងនីតិរដ្ឋរបស់ខ្លួនយ៉ាងត្រឹមត្រូវបំផុត។ រដ្ឋាភិបាលកម្ពុជា ក៏អំពាវនាវជាថ្មីទៅវិញ ទៅកាន់សហគមន៍អន្តរជាតិ សូមកុំលូកដៃចូលក្នុងកិច្ចការផ្ទៃក្នុងរបស់កម្ពុជា ដែលនេះអាចចាត់ទុកថា ជាការរំលោភលើឯករាជ្យភាព អធិបតេយ្យរបស់កម្ពុជា ដែលផ្ទុយពីកិច្ចព្រមព្រៀងក្រុងប៉ារីស និងកិច្ចព្រមព្រៀងក្នុងការរក្សាទំនាក់ទំនងការបរទេស៕

Friday, December 8, 2017

“ឧកញ៉ានិងអ្នកមានឥទ្ធិពលបន្តធ្វើអាជីវកម្មឈើខុសច្បាប់នៅខេត្តស្ទឹងត្រែង”

បទល្មើសព្រៃឈើទ្រង់ទ្រាយធំ និងតូចៗដែលប្រព្រឹត្តឡើងដោយពលរដ្ឋនៅមូលដ្ឋាន និងពលរដ្ឋចំណាកស្រុក បានមកធ្វើកម្មករអារឈើ និងដឹកជញ្ជូនឈើឲ្យអ្នកមានឥទ្ធិពល និងឧកញ៉ាមួយចំនួននៅក្បែរតំបន់បាតអាងនៃទំនប់វារីអគ្គិសនីសេសានក្រោមពីរ នៅខេត្តស្ទឹងត្រែង។ អាជីវកម្មឈើជាក្រុមៗនេះ បានធ្វើឲ្យឈើមូលមានតម្លៃត្រូវគេអាររំលំ រួចដឹកតាមរថយន្តប៉ាកុងចូលទៅផ្ទៃអាងនៃតំបន់បាតអាងទំនប់វារីអគ្គិសនីសេសានក្រោមពីរ។
រថយន្តប៉ាកុង និងគោយន្តរាប់សិបគ្រឿងគឺជាមធ្យោបាយដឹកជញ្ជូនឈើមូល មុខកាត់ធំៗ ចាប់ពី ៣តឹកឡើងទៅ ចូលតំបន់បាតអាងនៃទំនប់វារីអគ្គិសនីសេសានក្រោមពីរ ក្នុងមួយថ្ងៃៗ។
សហគមន៍រស់នៅឃុំស្តៅ ស្រុកសេសាន ខេត្តស្ទឹងត្រែង សម្ដែងក្តីបារម្ភខ្លាំងពីអនាគតធនធានធម្មជាតិនៅតំបន់នោះថានឹងវិនាសហិនហោចនៅពេលដ៏ខ្លីខាងមុខ ព្រោះបច្ចុប្បន្នសកម្មភាពកាប់ឈើមូល និងការដឹកជញ្ជូនឈើខុសច្បាប់កើតមានគគ្រឹកគគ្រេង។ ចំណែកអាជ្ញាធរមូលដ្ឋាន និងពលរដ្ឋអះអាងថា សមត្ថកិច្ចពាក់ព័ន្ធហាក់ធ្វើមិនដឹងមិនឮ បើទោះបីជាសហគមន៍រាយការណ៍ព័ត៌មាននេះច្រើនសាក្តី។
ពលរដ្ឋរស់ឃុំស្តៅ ស្រុកសេសាន ខែត្រស្ទឹងត្រែង ថ្លែងសុំមិនបញ្ចេញឈ្មោះ ឲ្យដឹងនៅថ្ងៃទី៨ ខែធ្នូ ថា ក្នុងមួយថ្ងៃៗ កម្មករច្រើនក្រុមអមដោយរថយន្តដឹកឈើច្រើនគ្រឿង និងគោយន្តដឹកឈើមូល បានចូលព្រៃអារឈើនៅតំបន់ក្បែរភូមិសាស្ត្រអ្នកភូមិរស់នៅដោយពុំមានអាជ្ញាធរណាបង្ហាញជំហរច្បាស់លាស់ទប់ស្កាត់ឲ្យមានប្រសិទ្ធភាពនោះទេ ក៏ប៉ុន្តែប្រសិនបើពលរដ្ឋណាចេញមុខទប់ស្កាត់ត្រូវបានអាជ្ញាធរគំរាមកំហែង។
លោកថា ឈើមូលរាប់សិនម៉ែត្រគូបដែលគេអារច្រៀករៀងរាល់ថ្ងៃ និងដឹកជញ្ជូនចូលតំបន់បាតបាតអាងនៃទំនប់វារីអគ្គិសនីសេសានក្រោមពីរដើម្បីបម្លែងជាឈើស្របច្បាប់ រួចដឹកចេញទៅក្រៅ ឬទៅប្រទេសវៀតណាម នៅតែបន្តកើតមាន៖ «ខ្ញុំព្រួយបារម្ភមែនទែនថា ព្រៃឈើនៅតំបន់នោះរលាយអស់ហើយ ប្រជាជនរអ៊ូរ។ ចង់ស្នើសុំសមត្ថកិច្ច ឬរដ្ឋាភិបាលមកជួយបង្ក្រាបបទល្មើសឲ្យអស់ពីភូមិសាស្ត្រនេះផង»។
មេឃុំស្តៅ ស្រុកសេសាន មកពីបក្សប្រជាជនកម្ពុជា ដែលជាប់ឆ្នោតជាមេឃុំ ៣០ឆ្នាំមកហើយ លោក នួយ ប៊ុនធួយ ឲ្យដឹងថា អាជ្ញាធរឃុំតែងតែធ្វើការបង្ក្រាប ណែនាំជនល្មើស និងអប់រំពលរដ្ឋឲ្យដឹងពីច្បាប់ព្រៃឈើនៅវេទិកាសាធារណៈជារឿយៗ ក្នុងបំណងរួមគ្នាលុបបំបាត់បទល្មើសព្រៃឈើ។ លោកថា បទល្មើសព្រៃឈើពុំមែនជារឿងថ្មីនោះទេ ហើយអាជ្ញាធរតែងតែយកចិត្តទុកដាក់បង្ក្រាប ក៏ប៉ុន្តែមានបុគ្គលមួយចំនួនតែងតែលូចចូលព្រៃកាប់ឈើលក់ ដែលអាជ្ញាធរជំនាញលំបាកទប់ស្កាត់៖ «មានបទល្មើសកើតឡើង វាអាស្រ័យលើប្រជាពលរដ្ឋយើងដែរ ពលរដ្ឋខ្លះ វាអាចលួចធ្វើសកម្មភាពផ្សេងៗ អាហ្នឹងយើងមិនទៅណែនាំអីទេ អ្នកខូចខិលវាធ្វើអ៊ីចឹង»។
នៅតាមបណ្ដាស្រុកផ្សេងទៀតនៅខែត្រស្ទឹងត្រែង រួមមានស្រុកថាឡាបរិវ៉ាត់ ស្រុកសៀមបូក ស្រុកសៀមប៉ាង និងក្រុងស្ទឹងត្រែង ជំនួញឈើតាមគោយន្ត និងតាមម៉ូតូកើតមានជារៀងរាលថ្ងៃ ដែលតាមការប៉ាន់ស្មានក្នុងមួយថ្ងៃគោយន្តមួយគ្រឿងអាចផ្ទុកឈើចាប់ពី ៥ម៉ែត្រគូប និងលើសពីនេះ។ រីឯការដឹកជញ្ជូនឈើតាមម៉ូតូ ចាប់ពីកន្លះម៉ែត្រគូប ឬលើសពីនេះ យ៉ាងហោចណាស់ជាង ១០គ្រឿងឡើងទៅក្នុងមួយយប់ៗ។
មន្ត្រីជាន់ខ្ពស់សមាគមអាដហុក (ADHOC) លោក ប៉ែន ប៊ុណ្ណារ៍ កត់សម្គាល់ថា ការអនុវត្តច្បាប់ព្រៃឈើរបស់អាជ្ញាធរ និងសមត្ថកិច្ចពាក់ព័ន្ធនៅតែធូរលុងនៅឡើយ ដែលបណ្តោយឲ្យមានបទល្មើសព្រៃឈើកើតមានដោយពុំមានការទទួលខុសត្រូវ។ លើសពីនេះ ការទទួលប្រយោជន៍ពីបទល្មើសព្រៃឈើរបស់សមត្ថកិច្ចពាក់ព័ន្ធ គឺជាកត្តាដែលនាំឲ្យព្រៃឈើកាន់តែវិនាសហិនហោច។ លោកបញ្ជាក់ថា ពលរដ្ឋត្រូវរួមគ្នាដាក់បណ្តឹងបរិហាររឿងនេះទៅតុលាការ ដើមអាចលុបបំបាត់បទល្មើសព្រៃឈើបានខ្លះ៖ «រួមគ្នាដាក់បណ្ដឹងអ្នកទទួលខុសត្រូវ ទាំងថ្នាក់ខែត្រ និងថ្នាក់ជាតិ បើទោះមិនមានការទុកចិត្ត តែយើងធ្វើម៉េចឲ្យបានច្រើន។ … ច្បាប់មានប្រសិទ្ធភាពនៅពេលដែលអ្នកប្រព្រឹត្តល្មើសទទួលការផ្ដន្ទាទោស»។
កាលពីខែវិច្ឆិកា ឆ្នាំ២០១៧ ពលរដ្ឋ និងមន្ត្រីសមាគមអាដហុក លោក ប៉ែន ប៊ុណ្ណារ៍ រួមគ្នាដាក់បណ្ដឹងបរិហារមន្ត្រីអាជ្ញាធរ មន្ត្រីជំនាញ និងគណៈកម្មការសហគមន៍ជាង ១០នាក់ ពាក់ព័ន្ធអនុគ្រោះ ឬបណ្ដែតបណ្ដោយឲ្យមានបទល្មើសព្រៃឈើក្នុងដែនសមត្ថកិច្ចរបស់ខ្លួន។
កាលពីចុងខែវិច្ឆិកា ឆ្នាំ២០១៧ សហគមន៍ឃុំស្តៅ ស្រុកសេសាន ប្រមាណ ៤០នាក់ បាននាំគ្នាឃាត់រថយន្ត ៣គ្រឿង ដឹកឈើឆ្លងកាត់ភូមិពួកគាត់នៅបំណងឲ្យសមត្ថកិច្ចអនុវត្តច្បាប់ ក៏ប៉ុន្តែអាជ្ញាធរបែររំដោះរថយន្តទាំងនោះឲ្យឈ្មួញទៅវិញ៕

សហគមន៍មានបញ្ហាដីធ្លីគ្រោងលើកបដាទាមទារឲ្យដោះលែងអតីតបុគ្គលិកអាស៊ីសេរី

ក្រុមប្រជាសហគមន៍មានបញ្ហាដីធ្លី និងអង្គការការពារសិទ្ធិមនុស្សថា ពួកគេនឹងលើកបដាទាមទារឲ្យមានការដោះលែងអតីតបុគ្គលិកអាស៊ីសេរី ពីររូប គឺលោក អ៊ួន ឈិន និងលោក យាង សុជាមេត្តា ឲ្យទទួលបានសេរីភាពឡើងវិញ។ ក្រុមពលរដ្ឋ និងមន្ត្រីសិទ្ធិមនុស្ស នៅតែលើកឡើងថា អតីតបុគ្គលិកអាស៊ីសេរី ទាំងពីររូបមិនបានប្រព្រឹត្តទោសកំហុសដូចការចោទប្រកាន់របស់ព្រះរាជអាជ្ញាសាលាដំបូងក្រុងភ្នំពេញឡើយ។
ក្រុមពលរដ្ឋអះអាងថា ពួកគេនឹងទាមទាររកយុត្តិធម៌ជូនអតីតបុគ្គលិកអាស៊ីសេរីវិញ។ ពួកគេថា អ្វីដែលពួកគេអាចទាមទារឲ្យមានការដោះលែង គឺការលើកបដាទាមទារឲ្យមានការលោះលែង លោក អ៊ួន ឈិន និង លោកយាង សុធារិន្ទ (យាង សុជាមេត្តា)។
តំណាងពលរដ្ឋមានបញ្ហាដីធ្លីតំបន់បឹងកក់ កញ្ញា សុង ស្រីលាភ ឲ្យអាស៊ីសេរី ដឹងថា សហគមម៍បឹងកក់ នឹងចូលរួមការទាមទារទាំងឡាយឲ្យមានការដោះលែងអតីតបុគ្គលិកអាស៊ីសេរីទាំងពីររូប។ កញ្ញាថា កញ្ញាកំពុងយកករណីលើកបដាទាមទារទៅជជែកជាមួយប្រជាសហគមន៍មានបញ្ហាដីធ្លីផ្សេងទៀតជាមុនសិន មុននឹងចាប់ផ្តើមលើកបដាទាមទារឲ្យដោះលែងអតីតបុគ្គលិកអាស៊ីសេរី ទាំងពីររូបនេះ៖ «»។
ចំណែកតំណាងពលរដ្ឋមានបញ្ហាដីធ្លីឡពាង ខេត្តកំពង់ឆ្នាំង លោកស្រី អ៊ុំ សុភី ប្រាប់ដែរថា សហគមន៍លោកស្រីនឹងលើកបដាទាមទារឲ្យមានការដោះលែងអតីតបុគ្គលិកអាស៊ីសេរី នៅថ្ងៃទី១០ ខែធ្នូ ដែលជាទិវាសិទ្ធិមនុស្ស៖ «»។
ការអះអាងរបស់ប្រជាសហគមន៍មានបញ្ហាដីធ្លីថា នឹងទាមទារឲ្យមានការដោះលែងអតីតបុគ្គលិកអាស៊ីសេរីបែបនេះ ខណៈអង្គការលើកលែងទោសអន្តរជាតិ (Amnesty International) ប្រកាសចាប់ផ្ដើមធ្វើយុទ្ធនាការកាលពីថ្ងៃទី៧ ខែធ្នូ រហូតដល់ថ្ងៃទី១៨ ខែមករា ឆ្នាំ២០១៨ ដើម្បីទាមទារឲ្យដោះលែងអតីតបុគ្គលិកអាស៊ីសេរី ទាំងពីរនាក់ដែលកំពុងជាប់ឃុំនៅពន្ធនាគារព្រៃស។
ក្នុងយុទ្ធនាការនេះ អង្គការលើកលែងទោសអន្តរជាតិ អំពាវនាវឲ្យពលរដ្ឋទាំងអស់រួមគ្នាសរសេរលិខិតអំពាវនាវជាភាសាខ្មែរ ឬភាសាអង់គ្លេសក៏បាន ដោយទីមួយទាមទារឲ្យអាជ្ញាធរកម្ពុជា ដោះលែងលោក អ៊ួន ឈិន និងលោកយាង សុធារិន្ទ (យាង សុជាមេត្តា) ដោយឥតលក្ខខណ្ឌ និងត្រូវទម្លាក់ចោលរាល់បទចោទប្រកាន់មកលើពួកគាត់ទាំងអស់។ ទីពីរ ទាមទារឲ្យអាជ្ញាធរបញ្ឈប់ការធ្វើទុក្ខបុកម្នេញ ការតាមដាន និងចំណាត់ការផ្លូវច្បាប់ដែលជាចេតនារឹតត្បិតសិទ្ធិសេរីភាពផ្នែកសារព័ត៌មាន និងសិទ្ធិសេរីភាពក្នុងការបញ្ចេញមតិ។
មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុក (ADHOC) លោក ស៊ឹង សែនករុណ ឲ្យអាស៊ីសេរី ដឹងថា សមាគមរបស់លោក អង្គការសិទ្ធិមនុស្សផ្សេងទៀតកំពុងជជែកគ្នាពីគម្រោងលើកបដាទាមទារឲ្យដោះលែងអតីតបុគ្គលិកអាស៊ីសេរី ទាំងពីររូប។ លោកបន្តថា បើមានការសម្រេចជាផ្លូវការ សមាគមអាដហុក នឹងលើកបដានេះនៅមុខទីស្នាក់ការតែម្ដង៖ «»។
អតីតបុគ្គលិកអាស៊ីសេរី ត្រូវសមត្ថកិច្ចចាប់ខ្លួនកាលពីថ្ងៃទី១៤ ខែវិច្ឆិកា និងចោទប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ដែលបង្កឲ្យមានការអន្តរាយដល់ការការពារជាតិ ដែលប្រឈមជាប់ពន្ធនាគារពី ៧ ទៅ ១៥ឆ្នាំ។
ការចាប់ខ្លួន និងចោទលើអតីតបុគ្គលិកអាស៊ីសេរី ទាំងពីររូបនេះ ធ្វើឡើងមុនពីរថ្ងៃនៃការសម្រេចរំលាយគណបក្សសង្រ្គោះជាតិ ចោល។ អ្នកវិភាគចាត់ទុកថា អ្នកទាំងពីរជាជនរងគ្រោះព្រោះវិបត្តិនយោបាយ។ ការចាប់ខ្លួននេះបង្កើតព្រឹត្តិការណ៍មួយថ្មីដើម្បីបង្វែរការចាប់អារម្មណ៍របស់សាធារណជនទៅលើផែនការរំលាយគណបក្សប្រឆាំង៕