kh-cnn

Friday, November 24, 2017

សមាជិកក្រុមប្រឹក្សាបក្សប្រឆាំងខេត្តប៉ៃលិនថាពួកគេនៅតែស្មោះស្ម័គ្រចំពោះបក្ស

សមាជិកក្រុមប្រឹក្សារបស់គណបក្សប្រឆាំងនៅខេត្តប៉ៃលិន ប្រកាន់ជំហរជាថ្មីថា ពួកគាត់នៅតែស្មោះស្ម័គ្រជាមួយគណបក្សរបស់ខ្លួនដោយមិនក្បត់ឆន្ទៈម្ចាស់ឆ្នោតនោះទេ បើទោះបីជាគណបក្សរបស់ខ្លួនត្រូវបានតុលាការរបស់រដ្ឋាភិបាលគណបក្សកាន់អំណាច កម្ទេចចោលជិតមួយសប្ដាហ៍ហើយក្ដី។ ទន្ទឹមគ្នានេះមន្ត្រីគណបក្សសង្គ្រោះជាតិ ខេត្តប៉ៃលិន អះអាងថា អាជ្ញាធរគណបក្សប្រជាជនកម្ពុជា បន្តធ្វើយុទ្ធនាការយ៉ាងសស្រាក់សស្រាំ ដើម្បីអូសទាញសកម្មជនគណបក្សប្រឆាំងឲ្យទៅរួមរស់ជាមួយគណបក្សខ្លួនមិនទាន់ឈប់នៅឡើយ។

សមាជិកក្រុមប្រឹក្សាគណបក្សសង្គ្រោះជាតិ តំបន់ផ្ដាច់ខ្លួនខ្មែរក្រហមនៅខេត្តប៉ៃលិន បានអះអាងថាអាជ្ញាធរគណបក្សកាន់អំណាចនៅខេត្តមួយនេះ បានប្ដូរយុទ្ធសាស្ត្រពីការចែចូវថ្នាក់ដឹកនាំគណបក្សមកសកម្មជនថ្នាក់ក្រោមវិញ។

ប្រធានគណបក្សសង្គ្រោះជាតិខេត្តប៉ៃលិនអ្នកស្រី វ៉ែន ដារ៉ា ឲ្យដឹងនៅថ្ងៃទី២៣ វិច្ឆិកា ថា មូលហេតុដែលអាជ្ញាធរគណបក្សកាន់អំណាចប្ដូរយុទ្ធសាស្ត្រក្នុងការអូសទាញសកម្មជនថ្នាក់ក្រោមនោះ ទំនងដោយសារយុទ្ធនាការកន្លងមក ពុំទទួលបានលទ្ធផល ដោយសារតែសមាជិកក្រុមប្រឹក្សាគណបក្សសង្គ្រោះជាតិ មិនទៅចុះចូលគណបក្សកាន់អំណាចនោះទេ។

ស្ត្រីប្រធានគណបក្សប្រឆាំងរូបនេះ អះអាងបន្តទៀតថា អ្នកដែលសកម្មក្នុងយុទ្ធនាការអូសទាញសមាជិកគណបក្សខ្លួន ដូចភ្លៀងរលឹមនេះ គឺអភិបាលស្រុកសាលាក្រៅ លោក សំ សារ៉េត តែម្ដង ក៏ប៉ុន្តែក៏មិនអាចទិញទឹកចិត្តសមាជិកក្រុមប្រឹក្សាគណបក្សបានដែរ៖ «យើងបានប្ដេជ្ញាចិត្តទាំងអស់គ្នាថា មិនទៅណាចោលគ្នា គឺសុខចិត្តអត់ឃ្លានមានហូបអីទាំងអស់គ្នា ដូច្នេះហើយមិនមានទៅណាចោលគ្នាទេ។ ប្រជាពលរដ្ឋក៏គាត់មកផ្ដល់កម្លាំងចិត្តឲ្យជាហូរហែដែរ»។

អភិបាលស្រុកសាលាក្រៅ លោក សំ សារ៉េត ពុំទាន់មានប្រតិកម្មអ្វីជុំវិញពីការរិះគន់របស់មន្ត្រីគណបក្សប្រឆាំងនេះនៅឡើយទេ ដោយលោកទទួលទូរស័ព្ទហើយក៏ផ្ដាច់ទៅវិញ។

ទោះជាយ៉ាងនេះក្ដី ពលរដ្ឋអ្នកតាមដានស្ថានការណ៍នយោបាយនៅខេត្តប៉ៃលិន មានប្រសាសន៍ថា សមាជិកគណបក្សប្រឆាំង នៅតំបន់ផ្ដាច់ខ្លួនខ្មែរក្រហម មិនទៅរួមរស់ជាមួយគណបក្សកាន់អំណាច គឺជាអ្នកនយោបាយល្អនៅក្នុងបេះដូងរបស់ពួកគាត់។ ពលរដ្ឋរូបនេះអះអាងថា សំណូមពរឲ្យសមាជិកក្រុមប្រឹក្សាឃុំសង្កាត់គណបក្សប្រឆាំងទាំងអស់ បន្តស្មោះស្ម័គ្រជាមួយម្ចាស់ឆ្នោតទៅមុខទៀត៖ «ព្រោះយល់ឃើញថា គាត់ពេញចិត្តនឹងរបបប្រជាធិបតេយ្យពិតប្រាកដ ព្រោះគាត់ចង់បានភាពយុត្តិធម៌និងភាពត្រឹមត្រូវក្នុងសង្គម។ ដូច្នេះគាត់ធ្វើនយោបាយដើម្បីឲ្យប្រទេសរីកចំរើន ទើបបានជាខ្ញុំគាំទ្រ និងកោតសរសើរពួកគាត់នោះ»។

ចំណែកអ្នកវិភាគស្ថានការណ៍នយោបាយលោក បណ្ឌិត មាស នី លើកឡើងថា ការសាមគ្គីស្មោះស្ម័គ្ររបស់ក្រុមប្រឹក្សាគណបក្សសង្គ្រោះជាតិនៅពេលនេះ គឺជាសញ្ញាបញ្ជាក់ភាពរាំងមាំរបស់គណបក្សប្រឆាំងនៅថ្នាក់មូលដ្ឋាន៖ «សម្រាប់មូលដ្ឋាន ប្រយោជន៍របស់គណបក្សប្រឆាំងគឺជាសញ្ញាមួយ ជួយផ្ដល់ការលើកទឹកចិត្តទៅដល់អ្នកគាំទ្រគណបក្សសង្គ្រោះជាតិ នៅមូលដ្ឋានដែលដើម្បីបង្ហាញឲ្យឃើញថា សង្គ្រោះជាតិមិនមានការបែកបាក់គ្នា ដូចពាក្យចចាមអារ៉ាមទេ បើទោះបីជាគណបក្សនេះដែលកន្លងមក ត្រូវគេបង្ហោះតាមហ្វេសប៊ុក (Facebook) ថាបែកបាក់គ្នាក្ដី»។

សមាជិកក្រុមប្រឹក្សាគណបក្សនៅខេត្តប៉ៃលិនទាំងអស់ ក្រោយពីគណបក្សត្រូវបានតុលាការរបស់រដ្ឋាភិបាលក្រុងភ្នំពេញបំផ្លាញចោល កាលពីទីថ្ងៃ១៦ វិច្ឆិកា មក ភាគច្រើនពួកគាត់ទៅធ្វើស្រែធ្វើចម្ការ ដោយពុំមានសមាជិកណាម្នាក់ ទៅរួមរស់ជាមួយគណបក្សប្រជាជនកម្ពុជានោះទេ។ ទោះជាយ៉ាងណាសមាជិកខ្លះក៏ព្រួយបារម្ភពីសុវត្ថិភាពផ្ទាល់ខ្លួនដែរ ពីព្រោះអាជ្ញាធរគណបក្សកាន់អំណាចបានដាក់កម្លាំងតាមដានពួកគាត់ជារៀងរាល់ថ្ងៃមិនឈប់នៅឡើយ៕

Thursday, November 23, 2017

អនុប្រធានគណបក្សប្រឆាំងថា លោក ហ៊ុន សែន ជាឃាតកនិងជាមេដឹកនាំផ្ដាច់ការ

មន្ត្រីជាន់ខ្ពស់គណបក្សសង្គ្រោះជាតិអះអាងថា លោក ហ៊ុន សែន កំពុងតែលាតត្រដាងកាន់តែច្បាស់ពីភាពឃោរឃៅ និងជាឃាតកដែលនៅពីក្រោយការបាញ់សម្លាប់អ្នកដែលប្រឆាំង និងលោក ក្រោមការដឹកនាំផ្ដាច់ការរបស់ខ្លួននោះ។
អ្នកច្បាប់ពន្យល់ថា ការលាតត្រដាងរបស់លោក ហ៊ុន សែន ពីការប៉ុនប៉ងសម្លាប់មនុស្សរង្គាលនេះ ជាឯកសារភស្តុតាងដ៏សំខាន់មួយសម្រាប់ដាក់បន្ទុក ក្នុងការប្ដឹងទៅតុលាការព្រហ្មទណ្ឌអន្តរជាតិ។
គណបក្សសង្គ្រោះជាតិ កំពុងពិភាក្សាជាមួយមេធាវីអន្តរជាតិ ដើម្បីដាក់ភស្តុតាងបន្ថែមទៅតុលាការព្រហ្មទណ្ឌអន្តរជាតិ ពីករណី លោក ហ៊ុន សែន ជាឃាតកសម្លាប់ពលរដ្ឋខ្លួនឯង។
លោក អេង ឆៃអ៊ាង អនុប្រធានគណបក្សសង្គ្រោះជាតិ ឲ្យដឹងកាលពីថ្ងៃទី២២ វិច្ឆិកា ថា លោក ហ៊ុន សែន ថ្លែងជាសាធារណៈពីការសោកស្ដាយ ដែលលោកមិនបានសម្លាប់ចោលអ្នកដែលប្រឆាំងនឹង លោក កាលពីឆ្នាំ២០១៣ ក្រោយការបោះឆ្នោតនោះ គឺជាភស្តុតាងយ៉ាងច្បាស់ថា លោក ហ៊ុន សែន ជាឃាតក នៅពីក្រោយការបញ្ជាកងកម្លាំងប្រដាប់អាវុធ បាញ់សម្លាប់ពលរដ្ឋ និងកម្មករ នៅផ្លូវវ៉េងស្រេង និងនៅទីតាំងផ្សេងៗទៀត។
លោក អេង ឆៃអ៊ាង អះអាងថា គណបក្សសង្គ្រោះជាតិបានដាក់ភស្តុតាងជាច្រើនទៅតុលាការព្រហ្មទណ្ឌអន្តរជាតិរួចហើយ ហើយមេធាវីនឹងដាក់ភស្តុតាងថ្មីនេះបន្ថែមទៀត ក្នុងពេលឆាប់ៗនេះ។ «»
អ្នកច្បាប់លើកឡើងថា លោក ហ៊ុន សែន កំពុងតែរំលោភរដ្ឋធម្មនុញ្ញម្ដងហើយម្ដងទៀត ក្នុងការប្រកាសប្រហារជីវិតក្រុមប្រឆាំងនោះ ជារឿងខុសច្បាប់ ព្រោះថា កម្ពុជាគ្មានទោសប្រហារជីវិតឡើយ។
លោក មេធាវី ហែម សុជាតិ ថ្លែងឲ្យដឹងនៅថ្ងៃទី២២ វិច្ឆិកា ថា បើសិនជាការសម្លាប់មនុស្សទោះបីជាស្ថិតនៅក្នុងរង្វង់បាតុកម្មក្ដី ឬមិនមែនបាតុកម្មក្ដី ដោយបង្កឡើងដោយអាជ្ញាធររដ្ឋ និងមានបទបញ្ជាពីថ្នាក់លើនោះ គឺជាបទល្មើស។ ហើយការប្រកាសរបស់លោកនាយករដ្ឋមន្ត្រីនេះ តុលាការព្រហ្មទណ្ឌអន្តរជាតិ មានយុត្តាធិការក្នុងការស៊ើបអង្កេតករណីនេះ ឬក៏ជាភស្តុតាងមួយដ៏សំខាន់។ «»
លោក ហ៊ុន សែន សំដែងពីការសោកស្ដាយដែលមិនបានសម្លាប់ពលរដ្ឋខ្មែរ ឬក្រុមប្រឆាំងនឹងលោកឲ្យអស់ ព្រោះលោកទើបតែ ដឹងអំពីផែនការដែលលោកចោទថា ជាគម្រោងផ្ដាច់ព្រ័ត្រផ្ដួលរំលំរដ្ឋាភិបាល។ លោក ហ៊ុន សែន អះអាងបន្ថែមថា អ្នកដែលលោកមិនបានសម្លាប់ទាំងនោះ ពិតជាសំណាងណាស់ដែលបាននៅរស់ ព្រោះលោកទើបដឹងដំណឹងនេះ កាលពីថ្ងៃទី១៥ ខែវិច្ឆិកា ឆ្នាំ២០១៧៖ «បើខ្ញុំដឹងរឿងហ្នឹងតាំងពីហ្នុង ប្រហែលជាចុងឆ្នាំ២០១៣ និងដើម២០១៤ គឺពួកនេះងាប់អស់ហើយ។ គេកំណត់យកថ្ងៃទី២៩ ខែធ្នូ ឆ្នាំ២០១៣ ជាថ្ងៃផ្ដាច់ព្រ័ត្ររំលំយើង។ បើខ្ញុំឃើញពីពេលហ្នុង អ្នកទាំងនេះងាប់តាំងពីហ្នុង ពេលនេះជាពេលបុណ្យខ្មោចពួកហ្នុងទៀត។ ស្ដាយណាស់! សំណាងដែលខ្ញុំអត់បានមើលឃ្លីបនេះ បើសិនបានមើលឃ្លីបនេះ ថ្ងៃដែលគេប្រកាសហ្នឹង ប៉ុន្មានម៉ោងក្រោយ វ៉ៃសង្គ្រុបយកហ្មង»។
មេធាវីអន្តរជាតិតំណាងឲ្យជនរងគ្រោះកម្ពុជា លោក រីឆាត រ៉ូជើរ (Richard Rogers) ចាត់ទុកសម្ដីរបស់លោក ហ៊ុន សែន ថាមិនស័ក្ដិសមជាសម្ដីរបស់អ្នកដឹកនាំក្នុងសម័យទំនើបនេះទេ។ លោកថា សម្ដីបែបនេះមិនខុសពីសម្ដីរបស់មេដឹកនាំផ្ដាច់ការ និងឃោរឃៅបំផុត ដូចជាលោក សាដាម ហ៊ូសេន និង ប៉ុល ពត ជាដើម។ លោកបន្ថែមទៀតថា សម្ដីរបស់លោក ហ៊ុន សែន ដែលបង្ហាញពីចេតនាសម្លាប់អ្នកប្រឆាំងបែបនេះ គឺរឹតតែបង្ហាញឲ្យឃើញច្បាស់ថា នរណាជាឃាតកពិតប្រាកដដែលបានបញ្ជាឲ្យបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ និង ការសម្លាប់សកម្មជនដទៃទៀត ដែលសកម្មក្នុងការតវ៉ាប្រឆាំងនឹងអំពើអយុត្តិធម៌សង្គម ក្រោមការដឹកនាំរបស់លោក ហ៊ុន សែន៖ «លោក ហ៊ុន សែន ក្នុងនាមជាមេដឹកនាំប្រទេស មានចេតនាយ៉ាងពិតប្រាកដក្នុងការសម្លាប់អ្នកទាំងឡាយណាដែលហ៊ានតវ៉ាប្រឆាំងការដឹកនាំរបស់គាត់។ ច្បាស់ណាស់ គាត់ហ៊ានសម្លាប់មនុស្សប៉ុន្មាននាក់ក៏មិនខ្វល់ដែរ ឲ្យតែគាត់អាចបន្តក្រាញអំណាចបានតទៅមុខទៀត។ គាត់មិនខ្វល់នឹងការលើកស្ទួយការគោរពសិទ្ធិមនុស្ស នីតិរដ្ឋ និងសុខុមាលភាពរបស់ពលរដ្ឋកម្ពុជានោះទេ។ គាត់ខ្វល់តែពីរឿងធ្វើយ៉ាងម៉េចឲ្យគាត់នៅកាន់អំណាចបានយូរ ដើម្បីប្រយោជន៍បុគ្គលខ្លួនគាត់ និងប្រយោជន៍បក្សពួក ព្រមទាំងក្រុមគ្រួសារគាត់ប៉ុណ្ណោះ។ សម្ដីរបស់គាត់សបញ្ជាក់យ៉ាងច្បាស់អំពីរឿងនេះ»។
លោក រីឆាត រ៉ូជើរ អះអាង ប្រាប់អាស៊ីសេរី កាលពីថ្ងៃទី២០ ខែវិច្ឆិកា ថាលោកនឹងដាក់ភស្តុតាងបន្ថែមក្នុងរយៈពេលពីរបីសប្ដាហ៍ខាងមុខ។ លោកបញ្ជាក់ថា មូលហេតុនៃការដាក់ភស្តុតាងបន្ថែមនេះ ដោយសារតែលោក ហ៊ុន សែន បង្ហាញចេតនាឧក្រិដ្ឋក្នុងការសម្លាប់រង្គាលទៅលើហ្វូងអ្នកបាតុករ ដែលតវ៉ាមិនទទួលស្គាល់លទ្ធផលបោះឆ្នោតជាតិ កាលពីឆ្នាំ២០១៣។
លោក រីឆាត រ៉ូជើរ បញ្ជាក់បន្ថែមថា ឯកសារភស្តុតាងដាក់បន្ទុកបន្ថែមនេះ រួមមានសម្ដីលោក ហ៊ុន សែន និងករណីរម្លាយគណបក្សសង្គ្រោះជាតិដែរ។ លោកមេធាវីបរទេសរូបនេះ សង្ឃឹមយ៉ាងមុតមាំថា តុលាការ ICC នឹងចាត់ការក្នុងសំណុំរឿងនេះឲ្យបានឆាប់។
លោក ហ៊ុន សែន បង្ហាញពីចេតនាឧក្រិដ្ឋក្នុងការសម្លាប់មនុស្សក្រៅច្បាប់នេះជាច្រើនលើក ច្រើនសា។ លោក ហ៊ុន សែន ធ្លាប់បានគំរាមឲ្យមនុស្សបក្សប្រឆាំងត្រៀមក្ដារមឈូសបើចង់តតាំងប្រឆាំងគាត់។ កាលពីចុងខែឧសភា ឆ្នាំ២០១៧ នេះ លោក ហ៊ុន សែន ក៏បានថ្លែងដោយមិនញញើតក្នុងការសម្លាប់មនុស្ស ១០០ ទៅ២០០នាក់ ដែលលោកអះអាងថា កម្ទេចចោលដើម្បីការពារសន្តិភាព។
លោក ហ៊ុន សែន បានកាន់តំណែងចាប់ពីមេបញ្ជាការខ្មែរក្រហមក្នុងទសវត្សរ៍ឆ្នាំ៧០ រហូតដល់តួនាទីបច្ចុប្បន្ន ជានាយករដ្ឋមន្ត្រី។ អង្គការ យូមែន រ៉ៃត៍ វ៉ច្ឆ (Human Rights Watch) បានចេញរបាយការណ៍កន្លងមករៀបរាប់ថា លោក ហ៊ុន សែន ដើម្បីការពារអំណាចរបស់ខ្លួន លោកបានធ្វើអ្វីៗសព្វបែបយ៉ាងទោះជាស្របច្បាប់ ឬមិនស្របច្បាប់គិតតាំងពីការបោះឆ្នោតអាណត្តិទី១មក។
អង្គការ យូមែន រ៉ៃត៍ វ៉ច្ឆ បានសំអាងរបាយការណ៍ចុងក្រោយមួយរៀបរាប់ថា លោក ហ៊ុន សែន បានបំពានរំលោភបំពាន ចាប់ចង និងបាញ់សម្លាប់មនុស្សជាបន្តបន្ទាប់ ប្រព្រឹត្តដោយកងកម្លាំងនគរបាល និងយោធាដែលអនុវត្តក្រោមបញ្ជារបស់ភ្នាក់ងាររបស់គណបក្សប្រជាជនកម្ពុជា។ ក្រៅពីនេះ គេបានបង្កើតក្រុមកងកម្លាំងជាច្រើន មានទាំងក្រុមចំហ និងក្រុមសម្ងាត់។ ក្រុមប្រភេទនេះមានទាំងនៅថ្នាក់ក្រសួង បណ្ដាក្រុង និងខេត្ត។
អ្នកធ្វើការតាមក្រុមទាំងនោះអាចនឹងត្រូវគេជ្រើសរើសចេញពីកងកម្លាំងរក្សាសន្តិសុខ។ ភាគច្រើននៃក្រុមទាំងនោះ ត្រូវបង្កើតក្នុងគោលដៅវាយប្រហារក្រុមប្រឆាំង។ ក្នុងចំណោមក្រុមទាំងនោះមានក្រុមមួយដែលទំនងជាក្រុមដែលក្រោយមកបានពាក់ព័ន្ធនឹងការវាយប្រហារដោយគ្រាប់បែកលើហ្វូងបាតុករក្នុងឆ្នាំ១៩៩៧ និងការរំលោភបំពានផ្សេងទៀត ហើយក្រោយមកក្រុមនេះបានប្ដូរឈ្មោះថ្មី គឺកងពលតូច ង៧០ ដែលត្រូវគេស្គាល់ថា ជាកងកម្លាំងផ្ទាល់របស់លោក ហ៊ុន សែន។ ក្នុងរបាយការណ៍ដដែលបានលើកឧទាហរណ៍ជាក់ស្ដែង ពីក្រុមមួយដែលដឹកនាំដោយមន្ត្រីជាន់ខ្ពស់នៃរដ្ឋកម្ពុជា ដែលអាចជាប់ទាក់ទងនឹងគម្រោងការសម្លាប់សកម្មជនប្រឆាំង។
នៅឆ្នាំ២០១២ ក៏មានអំពើហិង្សាជាច្រើនទៀត បានកើតឡើង រវាងកងកម្លាំងរក្សាសន្តិសុខរបស់រដ្ឋ ស្របពេលដែលមានការផ្ដល់ដីដល់ឈ្មួញអ្នកមានអំណាចកើនឡើង។ ម្យ៉ាងវិញទៀត ការមិនពេញចិត្តចំពោះគោលនយោបាយសេដ្ឋកិច្ចរបស់រាជរដ្ឋាភិបាល នៃការផ្ដល់ដីសម្បទានសេដ្ឋកិច្ច បានបង្កើតភាពចលាចលនៃកម្លាំងពលកម្ម។
ក្នុងខែមេសា ឆ្នាំ២០១២ សកម្មជនការពារព្រៃឈើ និងបរិស្ថាន លោក ឈុត វុទ្ធី ត្រូវបានកងកម្លាំងប្រដាប់អាវុធរបស់ក្រុមហ៊ុនដីសម្បទានសេដ្ឋកិច្ច ត្រូវបានគេបាញ់សម្លាប់នៅក្នុងព្រៃនៅខេត្តកោះកុង នៅពេលដែលរូបលោកបានព្យាយាមថតសកម្មភាពការកាប់ឈើដោយខុសច្បាប់។ មួយខែក្រោយមក គឺនៅខែមិថុនា ក្នុងឆ្នាំ២០១២ ក្មេងស្រីម្នាក់ ឈ្មោះ ហេង ចន្ធា ត្រូវបានកងកម្លាំងរដ្ឋាភិបាលបាញ់សម្លាប់នៅខេត្តក្រចេះ នៅពេលដែលប្រជាពលរដ្ឋបានតវ៉ាពីការរំលោភដីធ្លីពីឈ្មួញបរទេស។
សម្រាប់ក្រោយការបោះឆ្នោតឆ្នាំ២០១៣ វិញ គឺមានចលនាបាតុកម្មជាច្រើនក្រុម គឺក្រុមគាំទ្របក្សប្រឆាំង បានធ្វើបាតុកម្មប្រឆាំងលទ្ធផលបោះឆ្នោត និងក្រុមកម្មករធ្វើបាតុកម្មដើម្បីទាមទារសុំដំឡើងប្រាក់ខែជាដើម។ អាជ្ញាធររដ្ឋាភិបាលបានបាញ់សម្លាប់កម្មករយ៉ាងហោចណាស់ស្លាប់ ៤នាក់ របួសជាង ២០នាក់ និងមានអ្នកនៅបាត់ខ្លួនមិនទាន់រកឃើញនៅឡើយរហូតមកដល់ពេលនេះ។ ក្រៅពីនេះ ក៏មានបាញ់សម្លាប់ស្ត្រីម្នាក់នៅក្បែរស្ពានអាកាសស្ទឹងមានជ័យ និងការបាញ់សម្លាប់បុរសម្នាក់ទៀតឈ្មោះ ម៉ៅ សុខចាន់ នៅក្បែរស្ពានក្បាលថ្នល់។ លោក ហ៊ុន សែន ចោទលោក កឹម សុខា និងមន្ត្រីគណបក្សប្រឆាំងថា នៅពីក្រោយអំពើហិង្សានៅលើផ្លូវវ៉េងស្រេងនេះ។ មកទល់ពេលនេះ ឃាតកដែលជាក្រុមសមត្ថកិច្ចនោះ មិនត្រូវបានតុលាការចាប់ខ្លួន យកមកផ្ដន្ទាទោសនោះឡើយ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ យល់ឃើញថា សម្ដីរបស់មេដឹកនាំមួយវាគួរតែមានសេចក្ដីថ្លៃថ្នូរ និងមានសីលធម៌ខ្ពស់ជាងនេះ។ លោកចាត់ទុកសម្ដីបែបនេះថា បង្ហាញនូវភាពឃោរឃៅក្នុងនាមជាមេដឹកនាំ ដែលជាការមិនត្រឹមត្រូវ ខុសទាំងសីលធម៌ ខុសទាំងវិន័យកងទ័ព ខុសនឹងរដ្ឋធម្មនុញ្ញ ដែលមិនអនុញ្ញាតឲ្យមានទោសប្រហារជីវិតនោះទេ។
អ្នកឃ្លាំមើលផ្នែកអភិវឌ្ឍន៍សង្គមវិញ លោក បណ្ឌិត មាស នី មានប្រសាសន៍ថា មេដឹកនាំត្រូវមានការអត់ធ្មត់ច្រើន ហើយក៏មិនគួរប្រើពាក្យប្រមាថពលរដ្ឋខ្លួនឯងនោះទេ «»
តុលាការព្រហ្មទណ្ឌអន្តរជាតិ ជាតុលាការអចិន្ត្រៃយ៍អន្តរជាតិ ដែលមានសមត្ថកិច្ចស៊ើបអង្កេត និងផ្ដន្ទាទោសអ្នកដែលជាប់ចោទពីបទប្រព្រឹត្តឧក្រិដ្ឋកម្មធ្ងន់ធ្ងរ រួមមានឧក្រិដ្ឋកម្មប្រឆាំងមនុស្សជាតិជាដើម។
លោក ហ៊ុន សែន ត្រូវបានគេមើលឃើញមិនត្រឹមតែផ្ដាច់ការ ក្នុងការប្រើប្រាស់តុលាការជាឧបករណ៍បម្រើនយោបាយរបស់ខ្លួន និងបានប្រើប្រាស់ស្ថាប័នសភាកែប្រែច្បាប់ជាច្រើន ដើម្បីការពារអំណាចរបស់ខ្លួនប៉ុណ្ណោះទេ លោក ហ៊ុន សែន ក៏ធ្វើអ្វីៗដោយអត្តនោម័តនៅក្នុងបក្ស ដើម្បីសម្រេចគោលបំណងរបស់ខ្លួនទាំងនេះដែរ៕

លោក ហ៊ុន សែន អំពាវនាវឲ្យសមាជិកបង្កើនប្រសិទ្ធភាពការងារទ្វេដង ក្រោយសង្រ្គោះជាតិត្រូវបានរំលាយ

លោកនាយករដ្ឋមន្រ្តី ហ៊ុន សែន បានផ្ញើសារទៅកាន់សមាជិក-សមាជិការគណបក្សប្រជាជនកម្ពុជានៅទូទាំងប្រទេស ឲ្យបង្កើនសកម្មភាពចុះទៅកាន់មូលដ្ឋានទ្វេដង ដើម្បីទាក់ទាញការគាំទ្រពីប្រជាពលរដ្ឋ ខណៈដែលអវត្តមានគណបក្សប្រឆាំងពីប្រទេសកម្ពុជា។ តាមរយៈប្រសាសន៍របស់ប្រមុខបក្សកាន់អំណាច ដែលគេអះអាងថា ជាការបែកធ្លាយស្តីពី “យុទ្ធសាស្រ្តរបស់គណបក្សកាន់អំណាចក្រោយពីរំលាយគណបក្សសង្រ្គោះជាតិ” នោះ លោកនាយករដ្ឋមន្រ្តីបានចាត់ទុកថា បញ្ហារបស់កម្ពុជាពេលនេះ មិនមែនបញ្ចប់ត្រឹមការរំលាយគណបក្សសង្រ្គោះជាតិនោះទេ។

សារបែកធ្លាយរបស់លោកនាយករដ្ឋមន្រ្តី ហ៊ុន សែន បានអំពាវនាវឲ្យសមាជិក-សមាជិការគណបក្សប្រជាជនកម្ពុជារបស់លោក បង្កើនសកម្មភាពចុះទៅកាន់មូលដ្ឋានមួយទ្វេជាពីរ ដោយមិនត្រូវមានការធ្វេសប្រហែសនោះឡើយ។ អ្វីដែលសំខាន់ទៅទៀតនោះ សារជាសំឡេងរបស់លោកនាយករដ្ឋមន្រ្តី ហ៊ុន សែន ដែលគេអះអាងថា បានបែកធ្លាយនេះ ក៏បានអំពាវនាវឲ្យមានការបង្ការទប់ស្កាត់ ការប្រមូលកម្លាំងឡើងវិញ នៃអ្នកគាំទ្រគណបក្សសង្រ្គោះជាតិ ដែលជាគ្រោះថ្នាក់របស់គណបក្សកាន់អំណាចនាពេលអនាគត។

គួរជំរាបជូនថា នេះគឺជាសារបែកធ្លាយជាលើកដំបូងរបស់លោកនាយករដ្ឋមន្រ្តី ហ៊ុន សែន ស្តីពីយុទ្ធសាស្រ្តរបស់គណបក្សកាន់អំណាច ក្រោយពីការរំលាយគណបក្សសង្រ្គោះជាតិ តាមរយៈសេចក្តីសម្រេចរបស់តុលាការកំពូល កាលពីថ្ងៃទី ១៦ វិច្ឆិកា។ សារនេះ ត្រូវបានគេចែករំលែកតគ្នានៅបណ្តាញទំនាក់ទំនងសង្គមហ្វេសបុក ហើយត្រូវបានកាសែតក្នុងស្រុកមួយ បានចុះផ្សាយកាលពីថ្ងៃទី ២២ វិច្ឆិកា។

បើតាមសារអំពាវនាវ ប្រមាណជា១៥នាទីនេះ ប្រមុខបក្សកាន់អំណាច បានលើកឡើងថា បញ្ហាសំខាន់របស់កម្ពុជានៅពេលនេះ មិនមែនកត្តាកំណត់ពីខាងក្រៅ (ប្រទេស) នោះទេ តែជាកត្តាកំណត់នៅក្នុងប្រទេសឯណេះទៅវិញទេ។ មានន័យថា សមាជិក-សមាជិការគណបក្សប្រជាជនកម្ពុជាទាំងអស់ ត្រូវបង្កើនសកម្មភាពចុះមូលដ្ឋានទ្វេដង ដើម្បីយកចិត្តប្រជាពលរដ្ឋ ដោយមិនត្រូវធ្វើឲ្យប្រជាពលរដ្ឋមិនសប្បាយចិត្តនោះទេ។ ក្នុងនោះ អាជ្ញាធរគ្រប់ជាន់ថ្នាក់ ត្រូវបំបាត់ចោលនូវចរិកនាម្មឺននិយម បក្ខពួកនិយម បំបាត់អំពើពុករលួយ កុងត្រូលជជុះ ឬបាតុភាពផ្សេងៗ ដែលនាំឲ្យប្រជាពលរដ្ឋមិនសប្បាយចិត្ត។ ជាពិសេស គឺការអន្ទងចិត្តឲ្យអតីតសកម្មជនគណបក្សប្រឆាំងឲ្យចុះចូលជាមួយគណបក្សប្រជាជនកម្ពុជា និងងាកមកបម្រើផលប្រយោជន៍របស់គណបក្សកាន់អំណាចវិញ។ បើផ្អែកតាមសារដែលបែកធ្លាយនេះ លោកនាយករដ្ឋមន្រ្តី ហ៊ុន សែន បានលើកឡើងថា បញ្ហាប្រឈមរបស់គណបក្សកាន់អំណាចនៅពេលនេះ គឺត្រូវកសាងទំនុកចិត្តពីប្រជាពលរដ្ឋឡើងវិញ។ ហើយថាសកម្មភាពនៃការចុះជួបកម្មករនៅតាមបណ្តារោងចក្រនារយៈពេលចុងក្រោយនេះ គឺជាយុទ្ធសាស្រ្តមួយរបស់លោក ដើម្បីច្បាមយកការគាំទ្រពីកម្មករនៅកម្ពុជា ដែលពីមុនត្រូវបានគេចាត់ទុកថា ជាកម្លាំងគាំទ្រដ៏សំខាន់របស់គណបក្សប្រឆាំង ឲ្យមានការប្រែពណ៌ឡើងវិញ។

សូមបញ្ជាក់ថា បើគ្មានការប្រែប្រួលទេ គណបក្សប្រជាជនកម្ពុជា នឹងបើកសន្និបាតគណៈកម្មាធិការកណ្តាលបើកទូលាយមួយ នៅពាក់កណ្តាលខែមករាឆ្នាំ២០១៨ខាងមុខ ដើម្បីវាយតម្លៃទៅលើសកម្មភាពការងាររបស់គណបក្សប្រជាជនកម្ពុជា មុនពេលបោះឆ្នោតជាតិនៅខែកក្កដា ឆ្នាំ ២០១៨។ នេះបើតាមលោកនាយករដ្ឋមន្រ្តី ហ៊ុន សែន៕

គ.ជ.ប សម្រេចចែកកៅអីសង្គ្រោះជាតិឲ្យបក្ស៥ ខណៈហ្វ៊ិនស៊ិនប៉ិចនឹងបាន៤១

គណៈកម្មាធិការជាតិរៀបចំការបោះឆ្នោត ឲ្យដឹងថា ស្ថាប័ននេះ សម្រេចបែងចែងអាសនៈសភារបស់គណបក្សប្រឆំាងទាំង៥៥អាសនៈ ទៅឲ្យគណបក្សចំនួន៥ ដែលក្នុងនោះ គណបក្ស ហ៊្វុន ស៊ិន ប៉ិច នឹងទទួលបាន ៤១អាសនៈ ខណៈនៅសល់១៤អាសនៈទៀត មានបក្សខ្លះ ប្រកាសទទួលយក និងខ្លះទៀតបដិសេធ។
ការសម្រេចបែងចែកអាសនៈ ឬកៅអី ក្នុងរដ្ឋសភារបស់បក្សប្រឆាំងដ៏ធំនេះ គឺធ្វើឡើងបន្ទាប់ពីមានការំលាយគណបក្សបសង្គ្រោះជាតិ កាលពីថ្ងៃទី១៦ខែវិច្ឆិកា ដោយអំណាចតុលាការកំពូល។
អគ្គលេខាធិការរង គ.ជ.ប លោក សោម សូរីដា បានពន្យល់ប្រាប់ VOD នៅព្រឹកថ្ងៃទី២៣ ខែវិច្ឆិកានេះថា សមាជិក គ.ជ.ប បានប្រជុំសម្រេចបែងចែកអាសនៈរបស់គណបក្សប្រឆំាងកាលពីថ្ងៃទី២២ម្សិលមិញ។ ហើយ លោកថា តួលេខ មិនទាន់ផ្លូវការ គណបក្ស ហ៊្វុន ស៊ិន ប៉ិច បាន៤១ គណបក្សសម័ន្ធ ដើម្បីប្រជាធិបតេយ្យបាន៦ គណបក្សខ្មែរឈប់ក្របាន៥ គណបក្សសញ្ជាតិកម្ពុជាបាន២ និងខ្មែរអភិវឌ្ឍន៍សេដ្ឋកិច្ចទទួលបាន១អាសនៈ។
លោក សោម សូរីដា បញ្ជាក់ទៀតថា ចំពោះចំនួនអាសនៈ ដែលគណបក្សចំនួនពីរ បានប្រកាសមិនព្រមទទួលនោះ លោកថា គ.ជ.ប នឹងធ្វើការបែងចែកឲ្យគណបក្សដែលមានអាសនៈនៅក្នុងសភា។
លោកបញ្ជាក់ថា «គណបក្សសម័ន្ធ ដើម្បីប្រជាធិបតេយ្យ ទទួលបាន៦អាសនៈ ហើយគណបក្សខ្មែរឈប់ក្រ ក្នុងការបែងចែកគាត់ទទួលបាន៥អាសនៈ។ សរុប អាសនៈ ដែលមិនព្រមទទួលយក គឺមានចំនួន១១។ ក្នុងជំហ៊ានទី២ យើង គ.ជ.ប និងអនុវត្តតាមកថាខ័ណ្ឌចុងក្រោយនៃមាត្រា១៣៨ស្ទួន ដែលអាសនៈ [មិនព្រមទទួលយក] នោះ ត្រូវបែងចែកទៅឲ្យគណបក្សដែលមាន [អាសនៈ] នៅក្នុងសភា»។
នៅពេល វីអូឌី សួរថា តើនៅពេលណា គ.ជ.ប សម្រេចបែងចែកអាសនៈក្រុមប្រឹក្សាឃុំសង្កាត់ របស់គណបក្សសង្គ្រោះជាតិ ជាង៥ពាន់អាសនៈ ទៅឲ្យបក្សនយោបាយផ្សេងៗ នោះ? លោក សូរីដា ឆ្លើយតបវិញថា គ.ជ.ប នៅមិនទាន់សម្រេចអ្វីនៅឡើយ ប៉ុន្តែលោកថា មិនឲ្យផុតពីកន្លះខែនោះទេ។
ចំពោះ អ្នកនាំពាក្យគណបក្ស ហ៊្វុន ស៊ិនប៉ិច លោក ញេប ប៊ុនជិន មានប្រសាសន៍ថា គណបក្សរបស់លោក នៅមិនទាន់ទទួលបានព័ត៌មានពី គ.ជ.ប ថានឹងទទួលបានប៉ុន្មានអាសនៈនៅឡើយទេ។ ប៉ុន្តែ លោកថា គណបក្សរបស់លោក នឹងទទួលយកអាសនៈ៤១ តាមរូបមន្តបែងចែករបស់ គ.ជ.ប។ ហើយថា នឹងជួយបំរើប្រជាពលរដ្ឋ ដើម្បីធ្វើឲ្យប្រទេសជាតិមានស្ថេរភាពនិងសន្តិភាព។
លោកថ្លែងថា «យើងទទួលយកដោយរីករាយ ហើយការទទួលយកនេះ ដោយខិតខំប្រឹងប្រែងបំរើរាស្ត្រ ថ្វីត្បិតតែ អ្នកមើលឃើញយើងថា យ៉ាងណានោះ ជាការបកប្រែរបស់គេទេ។ ប៉ុន្តែយើងយកចំនួនណាមួយនោះ ដែលច្បាប់ប្រគល់ឲ្យគណបក្ស ហ៊្វុន ស៊ិនប៉ិច យកទៅប្រើការក្លាយទៅជាសហប្រយោជន៍ចំពោះរាស្ត្រ ចំពោះជាតិ ធ្វើម៉េចឲ្យរាស្ត្របានសុខ ស្ថេរភាពនយោបាយ»។
មន្ត្រីគណបក្សខ្មែរឈប់ក្រ និងគណបក្សសម្ព័ន្ធ ដើម្បីប្រជាធិបតេយ្យ បានអះអាងប្រហាក់ប្រហែល គ្នាថា ករណីបក្សទំាងពីរមិនព្រមទទួលយកអាសនៈរបស់បក្សសង្គ្រោះជាតិ ដោយថា មិនចង់រំលោភឆន្ទៈប្រជាពលរដ្ឋម្ចាស់ឆ្នោត។
មន្ត្រីច្បាប់ និងអង្កេតនៃអង្គការខុមហ្វ្រែល លោក យឿង សុធារ៉ា បានពន្យល់ថា តាមនីតិវិធីច្បាប់ មុននឹងសភាស្នើសុំទៅ គ.ជ.ប. បែងចែកអាសនៈរបស់គណបក្សសង្គ្រោះជាតិ ទៅឲ្យគណបក្សនយោបាយដែលមិនជាប់ឆ្នោតចំនួន៥នោះបាន លុះត្រាតែ គ.ជ.ប. មានសមាសភាព៩រូប ដើម្បីប្រជុំសម្រេចលើរបៀបវារៈផ្សេងៗ ជាមួយសំឡេង៥០បូក១បាន បើទោះបីអវត្តមានសមាជិកបីរូបក៏ដោយ។
លោក សុធារ៉ា បានពន្យល់ទៀតថា ការជ្រើសរើសសមាជិក គ.ជ.ប ថ្មីបីរូប ជំនួសអ្នកដែលលាលែងនោះ ជាកាតព្វកិច្ចរបស់គណៈកម្មាធិការអចិន្ត្រៃយ៍នៃរដ្ឋសភាទំាងពីបក្ស រួមមានបក្សប្រឆំាង និងបក្សប្រជាជានកម្ពុជា ខណៈបច្ចុប្បន្ននេះ មានតែបក្សប្រជាជនមួយតែប៉ុណ្ណោះ។ ករណីនេះ លោកបញ្ជាក់ថា ដំណាក់កាលនេះ គ.ជ.ប គ្មានជម្រើសអ្វី ក្រៅពីការសម្រេចបែងចែកអាសនៈបក្សប្រឆំាង មុនជ្រើសរើសសមាជិក គ.ជ.ប ថ្មីបីរូប ជំនួសអ្នកលាលែងនោះទេ ដោយថានេះ ជាការខ្វះចន្លោះនៃច្បាប់។
លោកពន្យល់ថា៖ «គ.ជ.ប បច្ចុប្បន្នមានតែសមាជិកតែ៦នាក់ទេ ចំាបាច់ត្រូវបំពេញ៣នាក់បន្ថែមទៀតសិន បន្ទាប់មកធ្វើការសម្រេចទៅលើរឿងអ្វីមួយ។ វាចន្លោះប្រហោង ខ្វះការចង្អុលបង្ហាញបែបនេះ ប៉ុន្តែដោយសារតែរឿងហ្នឹង វាមិនធ្លាប់កើតមានពីមុនមកទេ! ចឹងជាការខ្វះខាតភាសានៃច្បាប់ហ្នឹងដែរ ប៉ុន្តែទោះជាយ៉ាងណាខ្ញុំមើលឃើញថា គ.ជ.ប និងសម្រេចទៅតាមការយល់ឃើញរបស់គាត់ មានន័យថា គាត់និងសម្រេចទៅលើសំឡេង ៥០+១ នៃសមាជិក គ.ជ.ប ទំាងមូល សំដៅទៅលើ៦នាក់»។
គួរបញ្ជាក់ថា ក្រោយពី គ.ជ.ប ជូនដំណឹងទៅគណបក្សនយោបាយ មិនបានជាប់ឆ្នោតចំនួន៦ឲ្យត្រៀមទទួលយកអាសនៈបក្សប្រឆំាង។ ភ្លាមៗនោះ មេដឹកនាំ គ.ជ.ប.ទាំង ៣រូប រួមមាន អនុប្រធាន គ.ជ.ប. លោក គួយ ប៊ុនរឿន និងសមាជិក គ.ជ.ប. លោក រ៉ុង ឈុន និងលោកស្រី តែ ម៉ានីរ៉ុង ដែលត្រូវបានជ្រើសរើសដោយគណបក្សសង្គ្រោះជាតិ សម្រាប់ដឹកនាំស្ថាប័នបោះឆ្នោតជាតិចាប់តាំងពីឆ្នាំ២០១៤នោះ បានដាក់ពាក្យ ទៅប្រធានរដ្ឋសភា លោក ហេង សំរិន កាលពីថ្ងៃទី២០ ខែវិច្ឆិកា សុំលាលែងពីតំណែង ដោយថា មិនចង់ រំលោភលើឆន្ទៈរបស់ប្រជាពលរដ្ឋម្ចាស់ឆ្នោត និងមានឈ្មោះអាក្រក់ក្នុងប្រវត្តិសាស្ត្រ៕

Wednesday, November 22, 2017

រដ្ឋាភិបាល៖ អត់បក្សប្រឆាំង ប្រជាធិបតេយ្យកាន់តែល្អជាងមុន

មន្ដ្រីជាន់ខ្ពស់រដ្ឋាភិបាលលើកឡើងថា លទ្ធិប្រជាធិបតេយ្យនៅកម្ពុជា មិនដើរថយក្រោយនោះទេ ខណៈប្រទេសលោកសេរី និងសហគមន៍អន្ដរជាតិ ថ្កោលទោសយ៉ាងខ្លាំង ក្រោយមានការរំលាយគណបក្សប្រឆាំង។
ក្នុងវេទិកាតុមូលមួយ កាលពីថ្ងៃអង្គារម្សិលមិញ នៅរាជបណ្ឌិតសភាកម្ពុជា ស្ដីអំពី «ដំណើរការប្រជាធិបតេយ្យក្រោយអវត្តមានគណបក្សសង្គ្រោះជាតិ» អ្នកនាំពាក្យគណបក្សប្រជាជន លោក សុខ ឥសាន ថ្លែងថា នៅកម្ពុជា លទ្ធិប្រជាធិបតេយ្យ សិទ្ធិមនុស្ស និងសេរីភាពសារព័ត៌មាន ត្រូវបានគោរពយ៉ាងល្អប្រសើរ។ លោកថា ចំពោះវិធានការរំលាយគណបក្សសង្គ្រោះជាតិ គឺមិនរំលោភឆន្ទៈពលរដ្ឋម្ចាស់ឆ្នោតនោះទេ ដោយសារថា គណបក្សប្រឆាំងខ្លួនឯង ប្រព្រឹត្តបំពានច្បាប់ និងរដ្ឋធម្មនុញ្ញ។
អ្នកនាំពាក្យគណបក្សកាន់អំណាចរូបនេះ បន្ដថា ក្រោយបាត់បក្សប្រឆាំងដ៏ធំនៅកម្ពុជា លទ្ធិប្រជាធិបតេយ្យ មិនមែនដើរថយក្រោយ ដូចដែលប្រទេសលោកសេរី និងអង្គការអន្ដរជាតិមួយចំនួន យល់ឃើញនោះទេ ព្រោះលោកថា នៅមានគណបក្សផ្សេងទៀត ដែលពលរដ្ឋអាចបោះឆ្នោតឲ្យ។
លោកថា៖ «ក៏ប៉ុន្ដែប្រធានបទ បច្ចុប្បន្នសួរថា ពេលដែលគណបក្សប្រឆាំង ត្រូវបានរំលាយ ដោយតុលាការស្របតាមគោលការណ៍ច្បាប់ តើលទ្ធិប្រជាធិបតេយ្យនៅឯណា? ប្រសិនណាជាប្រទេសជាតិយើងបច្ចុប្បន្ន មិនមានលទ្ធិប្រជាធិបតេយ្យទេ ក្មួយៗ ក៏ដូចព្រះអង្គគ្រប់ព្រះអង្គ មិនមែនឱកាសអង្គុយពេលនេះ អង្គុយបញ្ចេញមតិក្នុងសិក្ខាសិលានេះហើយ ដែលវាហាក់បង្ហាញថា លទ្ធិប្រជាធិបតេយ្យ អត់មានប៉ះពាល់ទេ ហើយវាកាន់តែដំណើរការល្អប្រសើរ កុំឲ្យយល់ច្រឡំថា បាត់បង់គណបក្សនយោបាយមួយ លទ្ធិប្រជាធិបតេយ្យ ត្រូវស្លាប់»។
ក្នុងវេទិកាតុមូលនេះ អ្នកនាំពាក្យក្រសួងយុត្តិធម៌ លោក គឹម សន្ដិភាព និងប្រធានរាជបណ្ឌិតសភាកម្ពុជា លោក សុខ ទូច បានថ្លែងគាំទ្រ ចំណាត់ការរំលាយបក្សប្រឆាំងនេះ ដោយថា តុលាការកំពូលបានសម្រេចត្រឹមត្រូវ និងផ្អែកតាមច្បាប់នៃព្រះរាជាណាចក្រកម្ពុជា។
ថ្លែងពីទីក្រុងម៉ុងរេអាល់ ប្រទេសកាណាដា អតីតប្រធានគណបក្សសង្គ្រោះជាតិ លោក សម រង្ស៊ី មានប្រសាសន៍ថា គណបក្សប្រជាជន របស់លោក ហ៊ុន សែន បានប្លន់អំណាចពីគណបក្សប្រឆាំង និងរំលោភឆន្ទៈពលរដ្ឋម្ចាស់ឆ្នោតធ្ងន់ធ្ងរ។ លោកថា ក្រោមការដឹកនាំរបស់រដ្ឋាភិបាលសព្វថ្ងៃ គឺមិនមានលទ្ធិប្រជាធិបតេយ្យ និងការគោរពសិទ្ធិមនុស្សនោះទេ។ នេះបើតាមវីដេអូ បង្ហោះលើទំព័រហ្វេសប៊ុកផ្លូវការរបស់លោក នៅថ្ងៃអង្គារទី២១វិច្ឆិកា។
ក្រោយរំលាយគណបក្សប្រឆាំងកាលពីសប្ដាហ៍មុន សហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានហៅចំណាត់ការបែបនេះ ថា ធ្វើឲ្យលទ្ធិប្រជាធិបតេយ្យស្លាប់បាត់បង់ជីវិត និងផ្ទុយពីស្មារតីនៃកិច្ចព្រមព្រៀងទីក្រុងប៉ារីស ខណៈប្រទេសលោកសេរីទាំងនេះ ក៏ព្រមានដាក់ទណ្ឌកម្មលើរដ្ឋាភិបាល ប្រសិនបើស្ថានការណ៍នយោបាយ នៅតែឡើងកម្ដៅរបៀបនេះ។
អង្គការអន្ដរជាតិមួយចំនួនទៀត រួមមាន អង្គការ Global Witness អង្គការឃ្លាំមើលសិទ្ធិមនុស្សអន្ដរជាតិ Human Rights Watch អង្គការលើកលែងទោសអន្ដរជាតិ និងក្រុមសមាជិកសភាអាស៊ាន ដើម្បីសិទ្ធិមនុស្ស បានចូលរួមទទូចឲ្យរដ្ឋាភិបាលរបស់លោក ហ៊ុន សែន បញ្ឈប់នូវរាល់ការគំរាមកំហែងលើក្រុមអង្គការសង្គមស៊ីវិល បណ្ដាញសារព័ត៌មាន និងគណបក្សប្រឆាំង ដោយថា ដើម្បីឲ្យការបោះឆ្នោត មានភាពសេរី ត្រឹមត្រូវ និងយុត្ដិធម៌។
គណបក្សសង្គ្រោះជាតិ ដែលមានអ្នកគាំទ្រជិតពាក់កណ្ដាលប្រទេស កាលពីបោះឆ្នោតឃុំសង្កាត់ ត្រូវបានតុលាការកំពូល សម្រេចរំលាយចោល កាលពីថ្ងៃទី១៦ខែវិច្ឆិកាឆ្នាំ២០១៧ ហើយសមាជិក និងមន្ដ្រីជាន់ខ្ពស់គណបក្សនេះចំនួន១១៨រូប ត្រូវបានហាមឃាត់មិនឲ្យធ្វើនយោបាយ៥ឆ្នាំ។ ចំណែក ប្រធានគណបក្សនេះ គឺលោក កឹម សុខា ក៏កំពុងជាប់ឃុំក្នុងពន្ធនាគារ ពីបទ «ក្បត់ជាតិ»៕

លោក ហ៊ុន សែន ចាត់ទុកការលាលែងរបស់សមាជិក គជប ថាជាអំពើ «ឆ្កួតៗ»

ការលាលែងរបស់សមាជិក គជប គឺជាអំពើ «ឆ្កួតៗ»។ នេះគឺជាការលើកឡើងរបស់លោក ហ៊ុន សែន នាយករដ្ឋមន្ដ្រីខ្មែរ នាព្រឹកថ្ងៃពុធនេះ ក្នុងឱកាសលោកជួបសំណេះសំណាលជាមួយកម្មករនិយោជិតជាង១ម៉ឺននាក់ នៅតំបន់ភ្នំពេញថ្មី។ សម្រាប់លោកនាយករដ្ឋមន្ដ្រី ការលាឈប់របស់មន្ដ្រី គជប កូតាគណបក្សសង្គ្រោះជាតិចំនួន៣រូបនាពេលនេះ ធ្វើឡើងដើម្បីឲ្យ គជប ជាប់គាំង។ ប៉ុន្តែលោកថា ការណ៍នេះ មិនប៉ះពាល់ដល់ដំណើរការរបស់ គជប ឡើយ ព្រោះច្បាប់បើកផ្លូវរួចហើយ ឲ្យមានការជ្រើសរើសសមាជិកថ្មីដើម្បីជំនួសអ្នកចាស់ដែលលាលែងពីតំណែង។

ដំណើរការរបស់គណៈកម្មាធិការជាតិរៀបចំការបោះឆ្នោត នឹងនៅតែមានស្ថានភាពធម្មតា បើទោះបីជាសមាជិកសំខាន់ៗរបស់ គជប កូតាគណបក្សសង្គ្រោះជាតិចំនួន៣រូប បានសុំលាលែងពីតំណែងក៏ដោយ។ នេះគឺជាការលើកឡើងរបស់លោក ហ៊ុន សែន នាយករដ្ឋមន្ដ្រី។ ក្នុងនោះ ដើម្បីកុំឲ្យដំណើរការរបស់ គជប ជាប់គាំង ប្រមុខរដ្ឋាភិបាលកម្ពុជា បានផ្ដល់ជាយោបល់ថា គណបក្សប្រជាជនកម្ពុជា មិនគួរចូលឡូកឡំបន្ថែមនៅក្នុងរឿងនេះទេ។ បើតាមលោកនាយករដ្ឋមន្ដ្រី សមាជិកថ្មី ដែលត្រូវមកជំនួសកន្លែងអ្នកចាស់ដែលលាឈប់ គួរតែប្រគល់ឲ្យគណបក្សហ្វ៊ុនស៊ិនប៉ិកម្នាក់ ជាអនុប្រធាន, ពីគណបក្សសញ្ជាតិកម្ពុជាម្នាក់ជាសមាជិក និងអង្គការសង្គមស៊ីវិលម្នាក់ជាសមាជិក។
សូមជម្រាបជូនថា ការលើកឡើងរបស់លោកនាយករដ្ឋមន្ដ្រី ហ៊ុន សែន យ៉ាងដូច្នេះ ធ្វើឡើងបន្ទាប់ពីសមាជិក គជប ស្នើដោយគណបក្សសង្គ្រោះជាតិចំនួន៣រូប បានសុំលាលែងចេញពីតំណែង បន្ទាប់ពីគណបក្សសង្គ្រោះជាតិត្រូវតុលាការរំលាយ។ អ្នកទាំង៣រូបនោះរួមមាន៖ លោក គួយ ប៊ុនរឿន ជាអនុប្រធាន គជប, លោក រ៉ុង ឈុន និងលោកស្រី តែ ម៉ានីរ៉ុង ជាសមាជិក។ នៅក្នុងលិខិតផ្ញើទៅកាន់ប្រធានរដ្ឋសភា ចុះថ្ងៃទី២០វិច្ឆិកា អ្នកទាំង៣រូប បានពន្យល់ថា ខ្លួនលាលែងពីតំណែងនៅ គជប ដោយសារតែមានការបែងចែកអាសនៈអតីតគណបក្សសង្គ្រោះជាតិ ទៅឲ្យគណបក្សដទៃទៀតដែលពលរដ្ឋមិនគាំទ្រ។ និងថា ក្នុងនាមជាអាជ្ញាកណ្ដាល ពួកគេមិនអាចនៅបន្តការងារក្នុងស្ថាប័នរៀបចំការបោះឆ្នោតតទៅទៀតទេ ដោយសារវាក្បត់នឹងឧត្តមគតិរបស់ពួកគេ ក្បត់ឆន្ទៈពលរដ្ឋម្ចាស់ឆ្នោត ដែលអាចនាំឲ្យជាប់ឈ្មោះអាក្រក់ក្នុងប្រវត្តិសាស្ត្រ។
ដោយឡែកសម្រាប់ លោក យ៉ែម ប៉ុញ្ញាឬទ្ធិ អតីតមន្ដ្រីអតីតគណបក្សសង្គ្រោះជាតិ។ លោកបានសម្ដែងការកោតសរសើរមន្ដ្រីជាន់ខ្ពស់ គជប ទាំង៣រូប ដែលបានលាលែងពីតំណែង។ តាមរយៈទំព័រហ្វេសប៊ុកនៅថ្ងៃទី២១វិច្ឆិកា លោក លោក យ៉ែម ប៉ុញ្ញាឬទ្ធិ ចាត់ទុកការលាលែងពីតំណែងនេះ ថាជាសក្ខីភាពមួយបង្ហាញពីគោលជំហរក្នុងនាមជាអាជ្ញាកណ្ដាលពិតប្រាកដ ការពារយុត្តិធម៌ ការពារសន្លឹកឆ្នោតរបស់ពលរដ្ឋ ដែលបានបោះឆ្នោតឲ្យទៅគណបក្សដែលខ្លួនពេញចិត្ត ហើយមិនបង្វិលសន្លឹកឆ្នោតនោះទៅឲ្យគណបក្សដទៃដែលមិនទទួលបានការគាំទ្រ។
យ៉ាងណាក៏ដោយ សម្រាប់ប្រមុខរដ្ឋាភិបាលកម្ពុជាឯណេះវិញ។ ការលាលែងពីតំណែងរបស់សមាជិក គជប ទាំង៣រូប បង្ហាញពីការស្មោះត្រង់របស់ពួកគេចំពោះគណបក្សសង្គ្រោះជាតិ ជាជាងភាពស្មោះត្រង់ចំពោះជាតិ។ នេះបើតាមលោក ហ៊ុន សែន នាយករដ្ឋមន្ដ្រី៕

Tuesday, November 21, 2017

ស៊ុយអែតសម្រេចបញ្ឈប់ជំនួយសម្រាប់កំណែទម្រង់វិមជ្ឈការនៅកម្ពុជា

ភ្នំពេញ — បន្ទាប់ពីតុលាការកំពូលរបស់កម្ពុជា ដែលគេជឿថា ស្ថិតក្រោមឥទ្ធិពលរបស់គណបក្សកាន់អំណាច បានរំលាយគណបក្សសង្គ្រោះជាតិកាលពីសប្ដាហ៍មុន ស្ថានទូតស៊ុយអែតប្រចាំនៅកម្ពុជាថា ខ្លួនកំពុងពិនិត្យឡើងវិញនូវទម្រង់នៃទំនាក់ទំនងជាច្រើននៅកម្ពុជា ហើយថា វានឹងមិនអាចទៅរួចទៀតទេ សម្រាប់ប្រទេសស៊ុយអែត ក្នុងការជួយធ្វើការកែទម្រង់វិមជ្ឈការនៅកម្ពុជា។ មន្ត្រីរដ្ឋាភិបាលថា កម្ពុជានៅតែបន្តដំណើរទៅមុខទៀតបានដដែល ទោះបីមិនមានជំនួយរបស់ស៊ុយអែត ព្រោះកម្ពុជាបានជ្រើសរើសផ្លូវដើររបស់ខ្លួនរួចទៅហើយ។
រដ្ឋាភិបាលស៊ុយអែតនៅថ្ងៃអង្គារនេះ ប្រកាសថា ខ្លួនចាត់ទុកការវិវត្តស្ថានការណ៍នយោបាយថ្មីៗនៅកម្ពុជាថា ជាការព្រួយបារម្ភយ៉ាងខ្លាំងមួយ ដោយបានហៅវិធានការថ្មីៗនេះប្រឆាំងនឹងគណបក្សប្រឆាំង ប្រព័ន្ធផ្សព្វផ្សាយ និងអង្គការសង្គមស៊ីវិលទាំងឡាយ ថា ជាដំណើរថយក្រោយដ៏ធ្ងន់ធ្ងរនៃកិច្ចអភិវឌ្ឍន៍តាមបែបប្រជាធិបតេយ្យ និងការគោរពសិទ្ធិមនុស្សនៅកម្ពុជា។ កី្តបារម្ភយ៉ាងខ្លាំងនេះ ក៏បានរាប់បញ្ចូលការរំលាយគណបក្សសង្គ្រោះជាតិ ដែលសម្រេចដោយតុលាការកំពូលកាលពីសប្តាហ៍មុន។ នេះបើយោងតាមសេចក្តីប្រកាសព័ត៌មានរបស់ស្ថានទូតស៊ុយអែត ប្រចាំនៅកម្ពុជាដែល VOA ទទួល។
សេចក្តីប្រកាសព័ត៌មានរបស់ស្ថានទូតស៊ុយអែតចុះថ្ងៃទី ២១ ខែវិច្ឆិកា ឆ្នាំ ២០១៧ បានបញ្ជាក់ឲ្យដឹងថា រដ្ឋាភិបាលស៊ុយអែតកំពុងពិនិត្យរាល់ទម្រង់ទំនាក់ទំនងទាំងឡាយរវាងកម្ពុជា និងប្រទេសស៊ុយអែត ហើយថា ប្រទេសស៊ុយអែត នឹងមិនអាចបន្តជួយប្រទេសកម្ពុជា ក្នុងការធ្វើកំណែទម្រង់វិមជ្ឈការបានទៀតនោះឡើយ ផ្អែកលើស្ថានភាពនៃការវិវត្តកាលពីពេលថ្មីៗនេះ។
ស្ថានទូតស៊ុយអែតប្រចាំរាជធានីភ្នំពេញ បានថ្លែងបញ្ជាក់ឲ្យដឹងនៅក្នុងសេចក្តីប្រកាសរបស់ខ្លួនក្នុងន័យដើមថា៖
«ដោយសារតែមានការអភិវឌ្ឍអវិជ្ជមានផ្នែកនយោបាយ រដ្ឋាភិបាលប្រទេសស៊ុយអែត បច្ចុប្បន្នកំពុងត្រួតពិនិត្យឡើងវិញនូវទម្រង់នៃការចូលរួមរបស់យើងក្នុងប្រទេសកម្ពុជា។ យើងបញ្ជាក់យ៉ាងច្បាស់ ពីកិច្ចសហប្រតិបត្តិការការអភិវឌ្ឍ ក្នុងការជួយគាំទ្រសិទ្ធិមនុស្ស និងលទ្ធិប្រជាធិបតេយ្យ ដែលត្រូវបានពង្រឹងរួចហើយក្នុងអំឡុងឆ្នាំ ២០១៧ តាមរយៈការបង្កើនការគាំទ្រទៅកាន់អ្នកការពារលទ្ធិប្រជាធិបតេយ្យ និងសិទ្ធិមនុស្ស។ ជាងនេះទៅទៀត ប្រទេសស៊ុយអែត បានសម្រេចចិត្តថា យើងនឹងមិនបង្កើតកិច្ចព្រមព្រៀងសហប្រតិបត្តិការរវាង រដ្ឋាភិបាល និងរដ្ឋាភិបាលបន្តទៀតទេ លើកលែងតែវិស័យអប់រំ និងការស្រាវជ្រាវ។ ដូច្នេះ ការបន្តការគំាទ្ររបស់យើងសម្រាប់កំណែទម្រង់វិមជ្ឈការក្នុងបែបបទបច្ចុប្បន្ននេះ នឹងមិនអាចទៅរួចទេ»។
ការប្រកាសរបស់ស្ថានទូតស៊ុយអែតបានធ្វើឡើងបន្ទាប់ពីតុលាការកំពូលរបស់កម្ពុជា ដែលគេជឿថា ស្ថិតក្រោមឥទ្ធិពលរបស់គណបក្សកាន់អំណាច បានរំលាយគណបក្សសង្គ្រោះជាតិកាលពីសប្តាហ៍មុន។
ស្ថានទូតស៊ុយអែត បានបន្តបញ្ជាក់ឲ្យដឹងទៀតថា ជំហរនេះនឹងមានសុពលភាព រហូតដល់រដ្ឋាភិបាលរបស់ខ្លួនអាចនឹងសម្រេចចិត្តលើការផ្តល់សេចក្តីណែនាំ ដល់ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត (Sida) អំពីការផ្តោតលើសហប្រតិបត្តិការអភិវឌ្ឍន៍ស៊ុយអែតនៅប្រទេសកម្ពុជា។
សេចក្តីប្រកាសព័ត៌មានរបស់ស្ថានទូតស៊ុយអែតប្រចាំនៅកម្ពុជាកើតមានឡើង ក្រោយដំណើរស្វែងយល់អំពីស្ថានភាពនយោបាយ និងសិទ្ធិមនុស្សនៅកម្ពុជារបស់អ្នកស្រី Annika Ben David ឯកអគ្គរាជទូតស៊ុយអែតទទួលបន្ទុកកិច្ចការសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ ដែលបានធ្វើឡើងកាលពីខែតុលា ឆ្នាំ២០១៧។
អ្នកស្រី Annika បានប្រាប់ក្រុមអ្នកសារព័ត៌មាននៅទីក្រុងភ្នំពេញនៅពេលនោះថា អ្នកស្រី បានជួបពិភាក្សាជាមួយរដ្ឋមន្ត្រី និងមន្ត្រីសំខាន់ៗជាច្រើនទៀតរបស់កម្ពុជា។ អ្នកស្រីមានប្រសាសន៍ថា អ្នកស្រីបានបញ្ជាក់ច្បាស់ៗនៅចំពោះតំណាងរដ្ឋាភិបាលកម្ពុជាមួយរូបថា រដ្ឋាភិបាលប្រទេសស៊ុយអែតនឹងត្រូវគិតគូរឡើងវិញពីទំនាក់ទំនងជាមួយរដ្ឋាភិបាលកម្ពុជា ក្នុងករណីមានការរំលាយគណបក្សសង្គ្រោះជាតិ។
មន្ត្រីជាន់ខ្ពស់នៃរដ្ឋាភិបាលកម្ពុជាទទួលបន្ទុកមហាផ្ទៃ បានសម្តែងការសោកស្តាយចំពោះវិធានការរបស់រដ្ឋាភិបាលស៊ុយអែត ដែលបានជួយកម្ពុជាក្នុងកិច្ចការកែទម្រង់វិមជ្ឈការនៅកម្ពុជា។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ប្រាប់ VOA នៅល្ងាចថ្ងៃអង្គារថា កម្ពុជាមានការសោកស្តាយ ដែលប្រទេសស៊ុយអែតឈប់ផ្តល់ការគាំទ្ររបស់ខ្លួនក្នុងពង្រឹងវិមជ្ឈការនៅកម្ពុជា។ ប៉ុន្តែលោកថា ទោះបីជាបែបណាក៏ដោយ កម្ពុជាបានសម្រេចរើសផ្លូវដើរដោយខ្លួនឯងរួចទៅហើយ។ ដូច្នេះ កម្ពុជានឹងសម្លឹងរកមិត្តផ្សេងទៀត ដើម្បីជួយកម្ពុជាក្នុងកិច្ចការកែទម្រង់ខាងវិមជ្ឈការនេះ។
«យើងខ្ញុំមានការសោកស្តាយ សោកស្តាយហើយចំពោះនែ៎ ការមិនផ្តល់នូវការគាំទ្រហ្នឹង។ ប៉ុន្តែអ្វីដែលយើងធ្វើកន្លងមក គឺថា យើងបានសហការគ្នា បានមួយជំហានហើយ។ ប៉ុន្តែទោះជាយ៉ាងណាក៏ដោយ បើគ្មានការផ្តល់ក៏ដោយ កម្ពុជានៅតែដើរដដែល ដើម្បីធ្វើយ៉ាងណាឲ្យមានគម្រោង ដែលយើងបានគ្រោងហ្នឹងឲ្យវាបានចប់សព្វគ្រប់»។

រូបឯកសារ៖ លោកខៀវ សុភ័គ អ្នកនាំពាក្យក្រសួងមហាផ្ទៃ (ឡេង ឡែន/VOA)

លោកនាយឧត្ដមសេនីយ៍ បានថ្លែងការពារថា ទោះបីប្រទេសកម្ពុជា ពុំមានគណបក្សសង្គ្រោះជាតិ ក៏លទ្ធិប្រជាធិបតេយ្យនៅរស់រានមានជីវិតនៅឡើយផងដែរ។
«ហើយចំពោះពាក្យថា គ្មានប្រជាធិបតេយ្យហ្នឹង ខ្ញុំសូមជម្រាបជូនថា មិនមែនដូចគាត់គិតឃើញនោះទេ មិនមែនបានសេចក្តីថា បក្សមួយហ្នឹងរំលាយទៅ មានតែបក្សហ្នឹង បានប្រជាធិបតេយ្យទេ ប៉ុន្តែខ្ញុំគិតថា ចុះ អាអង្កាលមុនឆ្នាំ ២០១២នេះ មុនហ្នឹងបក្សសង្គ្រោះជាតិហ្នឹងកើតឡើងមក ក្រែងគាត់ទទួលស្គាល់កម្ពុជា ថាប្រទេសប្រជាធិបតេយ្យដែរអី? ហ្នឹងហើយ ព្រោះសង្គ្រោះជាតិហ្នឹងកើតនៅឆ្នាំ២០១២ បាន២០១៣ ចូលរួមបោះឆ្នោត។ ម៉េចក៏បាត់សង្គ្រោះជាតិ មានទៅបាត់ប្រជាធិបតេយ្យ អាហ្នឹងជាគួរឲ្យនែ៎ ដូចជាខ្ញុំមិនឯកភាពទេ»។
ស្ថានទូតស៊ុយអែតប្រចាំកម្ពុជា បានបញ្ជាក់ឲ្យដឹងបន្ថែមថា ប្រទេសស៊ុយអែត បានធ្វើជាដៃគូសហប្រតិបត្តិការអភិវឌ្ឍន៍ទ្វេភាគីជាមួយកម្ពុជាជាយូរមកហើយ ហើយកំពុងធ្វើការលើវិស័យសំខាន់ៗបី រួមមានសមភាពយេនឌ័រ សិទ្ធិមនុស្ស ប្រជាធិបតេយ្យ ការងារ ការអប់រំ វិមជ្ឈការ និងការប្រែប្រួលអាកាសធាតុ និងបរិស្ថាន។ ស្ថានទូតបានបន្តថា កិច្ចសហប្រតិបត្តិការរបស់ស៊ុយអែត នាពេលបច្ចុប្បន្ន ត្រូវបានចែងនៅក្នុងយុទ្ធសាស្ត្រគ្របដណ្តប់ពីឆ្នាំ ២០១៤ ដល់ឆ្នាំ ២០១៨ ហើយថា ខ្លួននឹងបេ្តជា្ញ និងចូលរួមរកមធ្យោបាយជាច្រើនទៀតដើម្បីបន្តគាំទ្រដល់ការអភិវឌ្ឍនៅប្រទេសកម្ពុជា។
រដ្ឋាភិបាលប្រទេសស៊ុយអែតបានផ្តល់ជំនួយដល់ប្រទេសកម្ពុជា ក្នុងទឹកប្រាក់ប្រមាណ ១០០លានដុល្លារសហរដ្ឋអាមេរិក ក្នុងរយៈពេល៥ឆ្នាំកន្លងមកនេះ។ ជំនួយនេះ ជាផ្នែកមួយនៃកម្មវិធីសហប្រតិបត្តិការដើម្បីការអភិវឌ្ឍរវាងកម្ពុជា និងស៊ុយអែត។ នេះបើតាមការបញ្ជាក់ពីពេលកន្លងមករបស់អ្នកស្រី Annika Ben David ឯកអគ្គរាជទូតស៊ុយអែត ទទួលបន្ទុកកិច្ចការសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ។ អ្នកស្រីបានបន្ថែម ថា រដ្ឋាភិបាលស៊ុយអែត ក្នុងនាមជាមិត្តភក្តិ និងជាដៃគូយូរអង្វែងរបស់កម្ពុជាបានធ្វើការជាមួយកម្ពុជា ដើម្បីប្រឆាំងនឹងភាពក្រីក្រ ការពង្រឹងលទ្ធិប្រជាធិបតេយ្យ និងគោរពសិទ្ធិមនុស្ស៕