kh-cnn

Friday, February 24, 2017

រូបភាពជុំវិញពិភពលោក ២៣ កុម្ភៈ ២០១៧

24 កុម្ភៈ 2017

រូបភាពជុំវិញពិភពលោកថ្ងៃទី ២៣ កុម្ភៈ ២០១៧ មានមកពីប្រទេសដូចជា អេស្ប៉ាញ ជប៉ុន អង់គ្លេស កាណាដា សហរដ្ឋអាមេរិក ឥណ្ឌា អាល្លឺម៉ង់ និង ស៊ីលី។

ផ្សេងទៀត

បុរសអ្នកកាន់សាសនាហិណ្ឌូម្នាក់តែងខ្លួនជាព្រះឥសូរដាក់ភ្លើងទៀននៅក្នុងមាត់របស់គាត់ នៅពេលដែលគាត់ចូលរួមក្នុងពិធីសាសនាមួយនៅមុនពេលមកដល់នៃពិធីបុណ្យ Maha Shivratri នៅទីក្រុង Jalandhar។

រដ្ឋមន្ត្រីក្រសួងការបរទសអង់គ្លេស Boris Johnson កំពុងត្រូវបានលោកស្រី Julie Bishop រដ្ឋមន្ត្រីក្រសួងការបរទេសអូស្ត្រាលីតម្រង់ក្រវ៉ាត់កឲ្យ នៅការិយាល័យរបស់លោកនៅក្នុងទីក្រុងឡុងដ៍។

ស្ត្រីម្នាក់ដែលអះអាងថាមកពីប្រទេសយេម៉ែន កំពុងជូតទឹកភ្នែក នៅពេលប៉ូលិសកាណាដាប្រាប់នាងថាមិនឲ្យនាងចូលតាមច្រកព្រំដែនអាមេរិក - កាណាដា ដើម្បីទៅកាន់តំបន់ Hemmingford នៃទីក្រុង Quebec ប្រទេសកាណាដា កាលពីថ្ងៃ២២ កុម្ភៈ។

ទឹកជំនន់ជន់លិចកន្លែងកម្សាន្តមួយកាលពីថ្ងៃទី២២ ខែកុម្ភៈ នៅទីក្រុង San Jose រដ្ឋ California។

ទេសចរកំពុងនិយាយជាមួយបុគ្គលិកនៃការតាំងពិព័រណ៍អន្តរជាតិ ARCO នៅទីក្រុងម៉ាឌ្រីដ ប្រទេសអេស៉្បាញ។

សិល្បកររូបធម្មជាតិ Rick Roberts នៃក្រុមសិល្បៈ Local 800 កំពុងផាត់ពណ៌លើរូបចម្លាក់ពានអូស្ការសម្រាប់ពិធីប្រគល់ពានរង្វាន់លើកទី៨៩ នៅថ្ងៃអាទិត្យនេះ នៅជិតរោងសម្តែងល្ខោន Dolby Theatre ក្នុងទីក្រុង Los Angeles។

បុរស៤នាក់ស្លៀកពាក់ជាស្តេច នៅពេលមកដល់កណ្តាលក្រុងដែលមានមនុស្សរាប់ពាន់នាក់ក៏កំពុងតែស្លៀកពាក់សម្លៀកបំពាក់ផ្សេងៗដើម្បីអបអរការចាប់ផ្តើមនៃបុណ្យខានីវ៉ាល នៅតាមដងផ្លូវក្នុងក្រុង Cologne ប្រទេសអាល្លឺម៉ង់។

ក្រុមអ្នកគាំទ្រតារាចម្រៀងជាតិអេស៉្បាញ Isabel Pantoja ក្រោកឈរដោយមានកាន់ទូរស័ព្ទថតផង ក្នុងពេលនាងសម្តែងនៅក្នុងកម្មវិធី Viña del Mar International Song Festival នៅក្នុងឧទ្យាន Quinta Vergara ក្នុងក្រុង Viña del Mar ប្រទេសស៊ីលី។

គោញីមួយក្បាលត្រូវបានគេរៀបចំដើម្បីត្រៀមថតរូបសម្រាប់បោះពុម្ពផ្សាយក្នុងសៀវភៅកំណត់ហេតុដែលមានចំណងជើងថា «ការបង្ហាញដែលល្អដាច់គេ» នៃសម្រស់សត្វគោ នៅក្នុងក្រុង Verden an der Aller ភាគពាយ័ព្យប្រទេសអាល្លឺម៉ង់។

អ្នកដែលត្រូវបានតែងតាំងជាម្ចាស់ក្សត្រិយនៃបុណ្យខានីវ៉ាល សម្រាប់តួ Santa Cruz បង្ហាញសម្លៀកបំពាក់របស់នាងនៅលើឆាកធំ ក្នុងទីកក្រុង Santa Cruz de Tenerife នៅដែនដីកោះ Tenerife របស់ប្រទេសអេស៉្បាញ។

លិខិតឆ្លងដែនអេឡិចត្រូនិចថ្មីរបស់អាល្លឺម៉ង់ នៅក្រោមពន្លឺពណ៌ស្វាយ នៅពេលដែលលិខិតឆ្លងដែនថ្មីនេះត្រូវបានដាក់បង្ហាញដល់សារព័ត៌មាននៅទីក្រុងប៊ែកឡាំង ប្រទេសអល្លឺម៉ង់។

នាង Zahra Lari មកពីប្រទេសអេមីរ៉ាតអារ៉ាប់រួម សម្ដែងក្នុងកម្មវិធីប្រកួតសម្តែងលំនឹងផ្នែកស្ត្រី នៅទីលានប្រកួតជិះស្គីក្នុងសាលសម្រាប់ការប្រកួតកីឡាស្គីអាស៊ី នៅទីក្រុង Sapporo ភាគខាងកើតប្រទេសជប៉ុន។

ប្រទេសឥណ្ឌាធូរស្រាលចិត្ត បន្ទាប់ពីលោកត្រាំបោះបង់ចោលកិច្ចព្រមព្រៀង TPP

នៅពេលដែលលោកប្រធានាធិបតី ដូណាល់ ត្រាំ បានបោះបង់ចោលកិច្ចព្រមព្រៀងដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក ឬ TPP កាលពីចុងខែមករា ប្រទេសឥណ្ឌាមានការធូរស្រាលចិត្ត ដោយសារតែវិស័យនានារបស់ឥណ្ឌាដូចជាឧស្សាហកម្មដេរសម្លៀកបំពាក់និងផលិតឱសថប្រឈមនឹងផលប៉ះពាល់ខ្លាំង។

ញូវដេលី — កិច្ចព្រមព្រៀង TPP ដ៏មានមហិច្ឆតារបស់ប្រទេសចំនួន១២ដែលមានព្រំប្រទល់នៅជាប់អាស៊ីប៉ាស៊ីហ្វិក ដែលបង្កើតឡើងដើម្បីបង្កើនពាណិជ្ជកម្ម គឺជា «ក្តីកង្វល់ដ៏ធំ» សម្រាប់លោក Sudhir Dhingra ដែលជានាយកគ្រប់គ្រងនៃក្រុមហ៊ុន Orient Craft។ ក្រុមហ៊ុនដែលមានមូលដ្ឋាននៅក្នុងទីក្រុងញូវដេលីមួយនេះ គឺជាក្រុមហ៊ុននាំចេញធំបំផុតមួយក្នុងចំណោមក្រុមហ៊ុននាំចេញសម្លៀកបំពាក់ធំបំផុតនានារបស់ឥណ្ឌា។
ឥណ្ឌាសប្បាយចិត្តដែលកិច្ចព្រមព្រៀង TPP ត្រូវបោះបង់ចោល
មូលហេតុនោះគឺថា កិច្ចព្រមព្រៀងនេះនឹងធ្វើឲ្យការនាំចេញរបស់ឥណ្ឌាមានលក្ខណៈប្រកួតប្រជែងតិចជាងមុន ដោយសារតែកិច្ចព្រមព្រៀងនេះកាត់បន្ថយពន្ធគយនាំចេញនាំចូល និងផ្តល់ឱកាសដល់ប្រទេសនានាដូចជាវៀតណាមនិងម៉ាឡេស៊ីឲ្យទទួលបានការអនុគ្រោះពិសេសសម្រាប់ការនាំចូលទៅក្នុងទីផ្សារអាមេរិកនិងជប៉ុន។
លោក Dhingra យល់ថា ការបោះបង់ចោលនេះជាដំណឹងដ៏ល្អ។
លោកពន្យល់ថា «ខ្លួនខ្ញុំផ្ទាល់ពិតជាមានការព្រួយបារម្ភចំពោះពាណិជ្ជកម្មនេះណាស់។ បើតាមកិច្ចព្រមព្រៀងហ្នឹង ផ្នែកខ្លះនៃតំបន់ទាំងនោះនឹងបង្កើនផលិតកម្មរបស់ខ្លួនជាងមុននិងកាន់តែមានប្រសិទ្ធិផល។ ក្រៅពីនេះ ពួកគេនឹងទទួលបានអត្ថប្រយោជន៍តាមរយៈការលើកលែងពន្ធ ដូច្នេះជំនួញទាំងអស់នឹងទៅប្រមូលផ្តុំក្នុងទីផ្សារទាំងនេះ»។

វិស័យវាយនភ័ណ្ឌរបស់ឥណ្ឌាមានការភ័យខ្លាចការប៉ះពាល់ដល់ជំនួញខ្លួនដោយសារកិច្ចព្រមព្រៀងដៃគូពាណិជ្ជកម្មឆ្លងមហាសមុទ្រប៉ាស៊ីហ្វិក។

ឧស្សាហកម្មសម្លៀកបំពាក់ដ៏ធំនៅក្នុងប្រទេសឥណ្ឌា
វិស័យវាយនភណ្ឌនិងសម្លៀកបំពាក់របស់ឥណ្ឌាផ្តល់ការងារដល់ពលរដ្ឋរាប់លាននាក់ ហើយប្រមាណជា២០%នៃការនាំចេញសម្លៀកបំពាក់ត្រូវបាននាំចេញទៅសហរដ្ឋអាមេរិក។
វិស័យសម្លៀកបំពាក់មិនមែនជាវិស័យតែមួយដែលទទួលរងការគំរាមកំហែងពីកិច្ចព្រមព្រៀង TPP ទេ។ រដ្ឋមន្រ្តីពាណិជ្ជកម្មរបស់ឥណ្ឌា លោកស្រី Nirmala Sitharaman បាននិយាយថា កិច្ចព្រមព្រៀងនេះនឹងប៉ះពាល់ដល់វិស័យជាច្រើនដូចជា ទំនិញដែលធ្វើពីស្បែកសត្វ ប្លាស្ទិក សារធាតុគីមី និងវាយនភណ្ឌ។
នេះមានន័យថា កិច្ចព្រមព្រៀង TPP នឹងធ្វើឲ្យប្រទេសឥណ្ឌាខ្ទាតចេញពីកិច្ចព្រមព្រៀងពាណិជ្ជកម្មធំៗ ដែលគ្របដណ្តប់ពាណិជ្ជកម្មពិភពលោកប្រមាណជា៤០%។
ការប៉ាន់ស្មានលើការខាតបង់វិស័យនាំចេញរបស់ឥណ្ឌាមានចំនួនខុសគ្នាយ៉ាងខ្លាំង។ វិទ្យាស្ថាន Peterson សម្រាប់សេដ្ឋកិច្ចអន្តរជាតិបានឲ្យដឹងថា ការខាតបង់របស់ឥណ្ឌាអាចមានចំនួនប្រមាណជា៥០ពាន់លានដុល្លារក្នុងមួយឆ្នាំ ប្រសិនបើចិននិងប្រទេសដទៃទៀតចូលរួមជាមួយនឹងកិច្ចព្រមព្រៀងនេះនៅពេលក្រោយ។ អ្នកវិភាគផ្សេងទៀតនិយាយថា វាអាចមានចំនួនតិចជាងនេះឆ្ងាយណាស់។
លោក Biswajit Dhar ដែលជាអ្នកជំនាញផ្នែកពាណិជ្ជកម្មនិងជាសាស្រ្តាចារ្យនៃសាកលវិទ្យាល័យ Jawaharlal Nehru ក្នុងទីក្រុងញូវដេលីនិយាយថា ក្រោយពីបោះបង់ចោលកិច្ចព្រមព្រៀង TPP ឥណ្ឌាបានធូរស្បើយចិត្តឡើងវិញ។
លោកនិយាយថា «អាចមានភាពធូរស្បើយឡើងវិញ ដោយសារតែកិច្ចព្រមព្រៀង TPP បានគំរាមនាំយកបទដ្ឋានថ្មីៗសម្រាប់សេរីភាវូបនីយកម្មវិស័យពាណិជ្ជកម្មនិងការនាំយកនូវបទបញ្ញត្តិថ្មីៗដែលកាន់តែតឹងរ៉ឹងជាងបទបញ្ញត្តិដែលផ្តល់ផលប្រយោជន៍ដល់ឥណ្ឌា»។
កិច្ចព្រមព្រៀង TPP បង្កើតឲ្យមានបទបញ្ញត្តិបរិស្ថាននិងពលកម្មតឹងរ៉ឹងនិងការការពារកម្មសិទ្ធិបញ្ញាខ្លាំងជាងមុន។

កិច្ចព្រមព្រៀងថ្នាក់តំបន់
ការបោះបង់ចោលកិច្ចព្រមព្រៀង TPP អាចនឹងបង្វែរការយកចិត្តទុកដាក់ទៅលើកិច្ចព្រមព្រៀងថ្នាក់តំបន់នានា ដែលមួយក្នុងចំណោមកិច្ចព្រមព្រៀងទាំងនោះអាចជាកិច្ចព្រមព្រៀងដៃគូសេដ្ឋកិច្ចទូលំទូលាយថ្នាក់តំបន់ឬហៅថាកិច្ចព្រមព្រៀង RCEP។ កិច្ចព្រមព្រៀងនេះជាប្លុកមួយដែលបូករួមទាំងឥណ្ឌានិងចិន ហើយគ្របដណ្តប់លើប្រជាជនសាកលលោកស្ទើរតែពាក់កណ្តាល។
អ្នកវិភាគជាច្រើនរំពឹងថា ចិននឹងចូលរួមបំពេញគម្លាតដែលបន្សល់ទុកដោយសហរដ្ឋអាមេរិក ខណៈដែលកិច្ចព្រមព្រៀងពាណិជ្ជកម្មថ្មីៗត្រូវបានបង្កើតឡើង។ អ្នកវិភាគខ្លះនិយាយថា នេះនឹងជារឿងល្អមួយសម្រាប់ឥណ្ឌា ដោយសារតែចិនទំនងជានឹងមិនបង្កើតបទដ្ឋានដូចគ្នាទៅនឹងកិច្ចព្រមព្រៀង TPP ដែលដឹកនាំដោយសហរដ្ឋអាមេរិកនោះទេ។
ទោះជាយ៉ាងណាក៏ដោយ ក៏អ្នកវិភាគផ្សេងទៀតយល់ថា នេះក៏អាចជារឿងមិនល្អសម្រាប់ឥណ្ឌាដែរ ដោយសារតែឥណ្ឌាត្រូវបើកទីផ្សាររបស់ខ្លួនឲ្យប្រទេសចិន។
ឥទ្ធិពលរបស់ចិន
លោក Dhar និយាយថា «ទោះជាមិនមានការអនុគ្រោះពិសេសក៏ដោយ ក៏ចិនអាចបោះជំហាននៅក្នុងសេដ្ឋកិច្ចឥណ្ឌាបានយ៉ាងច្រើន។ ដូច្នេះការព្រួយបារម្ភរបស់អ្នកជំនួញឥណ្ឌាគឺថា ប្រសិនបើចិនទទួលបានការអនុគ្រោះពិសេសផ្នែកទីផ្សារនោះ ជំនួញរបស់ឥណ្ឌានឹងមានបញ្ហាជាក់ជាមិនខាន»។
ប្រទេសឥណ្ឌា ដែលត្រូវបានគេស្គាល់ជាយូរមកហើយថាមានបរិយាកាសធ្វើជំនួញម៉ឺងម៉ាត់បទបញ្ញត្តិស្មុគស្មាញដែលបង្អាក់វិនិយោគទុន ការបង់ពន្ធខ្ពស់និងច្បាប់ការងារដ៏តឹងរ៉ឹង មិនទទួលបានអត្ថប្រយោជន៍ពីការរីកចម្រើនសង្វាក់ផលិតកម្មដែលបានកែប្រែសេដ្ឋកិច្ចរបស់ប្រទេសនៅអាស៊ីជាច្រើនក្នុងរយៈពេលប៉ុន្មានទសវត្សរ៍ចុងក្រោយនេះទេ។
កិច្ចខិតខំប្រឹងប្រែងដើម្បីលើកកម្ពស់ផលិតកម្មនៅក្រោមកម្មវិធីដ៏សំខាន់មួយរបស់លោកនាយករដ្ឋមន្រ្តី Narendra Modi ដែលត្រូវបានគេហៅថា «ផលិតនៅឥណ្ឌា» មិនទាន់ទទួលបានលទ្ធផលដុំកំភួននៅឡើយទេ។
អនាគតសេដ្ឋកិច្ចមិនប្រាកដប្រជា
អ្នកជំនាញផ្នែកពាណិជ្ជកម្មព្រមានថា ការបោះបង់ចោលកិច្ចព្រមព្រៀង TPP និងកិច្ចចរចាបន្ថែមទៀតលើការគាំពារទំនិញក្នុងស្រុករបស់សហរដ្ឋអាមេរិកនឹងធ្វើឲ្យអនាគតពាណិជ្ជកម្មសាកលលោកមានភាពមិនប្រាកដប្រជា។ លោកស្រី Arpita Mukherjee ដែលជាសាស្រ្តាចារ្យនៃក្រុមបឹក្សាឥណ្ឌាសម្រាប់ការស្រាវជ្រាវលើទំនាក់ទំនងសេដ្ឋកិច្ចអន្តរជាតិនិយាយថា «ខ្ញុំគិតថា យើងមិនគួរសាទរចំពោះរឿងនេះទេ។ លោកត្រាំក៏និយាយថា «ផលិតនៅសហរដ្ឋអាមេរិក» ដែរ។ វាជាស្ថានភាពមិនច្បាស់លាស់ ដូច្នេះយើងគួរតែព្រួយបារម្ភ»។
អ្នកជំនាញនានាអំពាវនាវឲ្យឥណ្ឌាធ្វើកំណែទម្រង់ដើម្បីធ្វើឲ្យវិស័យឧស្សាហកម្មរបស់ខ្លួនអាចប្រកួតប្រជែងជាសាកលបាន។ លោកស្រី Arpita Mukherjee និយាយថា «យើងត្រូវតែផ្តល់ភាពងាយស្រួលក្នុងការធ្វើជំនួញ ហើយនៅពេលយើងអាចធ្វើបាន យើងនឹងទទួលបានផលប្រយោជន៍តាមរយៈកិច្ចព្រមព្រៀងពាណិជ្ជកម្មនានា»។
ទោះជាយ៉ាងណា ការផុសឡើងនៃការគំរាមកំហែងពីកិច្ចព្រមព្រៀង TPP មិនស្ថិតនៅក្នុងចិត្តរបស់លោក Dhingra នោះទេ ហើយលោកនៅតែមានសុទិដ្ឋិនិយម។ លោក និងអ្នកផ្សេងទៀតយល់ថា ការណ៍នេះនឹងផ្តល់ឱកាសឲ្យឥណ្ឌារីកចម្រើន ខណៈដែលរដ្ឋាភិបាលបន្តធ្វើកំណែទម្រង់ដែលលោកនាយករដ្ឋមន្រ្តី Modi បានសន្យានោះ។
លោក Dhingra និយាយថា កាលពីពេលមុន រដ្ឋផ្សេងគ្នានៅក្នុងប្រទេសឥណ្ឌាបានសន្យាជាមួយនឹងអ្នកធ្វើជំនួញមួយចំនួនដូចជាជំនួញរបស់លោកថា នឹងផ្តល់ប្រាក់ជួយឧបត្ថម្ភនិងគ្រឿងលើកទឹកចិត្តផ្សេងទៀត ដែលអាចជួយលោកឲ្យប្រកួតប្រជែងនៅក្នុងទីផ្សារកាន់តែខ្លាំង។ លោកនិយាយថា «មិនដែលមានសប្តាហ៍ណាដែលខ្ញុំមិនបានទទួលទូរស័ព្ទពីរដ្ឋាភិបាលថ្នាក់រដ្ឋ ឬអ្នកផ្សេងទៀតដែលចង់ឲ្យក្រុមហ៊ុន Orient Craft បង្កើតរោងចក្រនៅទីនោះទេ។ ពួកគេមានឆន្ទៈនឹងផ្តល់គាំទ្រនិងផ្តល់ប្រាកជួយឧបត្ថម្ភ។ នេះជាអ្វីដែលខ្ញុំមិនដែលបានឃើញនៅក្នុងរយៈពេល៤០ឆ្នាំចុងក្រោយនេះ៕

លោករដ្ឋមន្រ្តីការបរទេសអាមេរិក Tillerson ទទួលស្គាល់ពីការខ្វែងគំនិតគ្នាជាមួយប្រទេសម៉ិកស៊ិក

លោក John Kelly រដ្ឋមន្រ្តីក្រសួងសន្តិសុខមាតុភូមិធ្វើសេចក្តីថ្លែងការណ៍នៅក្រសួងការបរទេសក្នុងក្រុង Mexico City កាលពីថ្ងៃទី២៣ ខែកុម្ភៈ ឆ្នាំ២០១៧។

លោករដ្ឋមន្រ្តីការបរទេសសហរដ្ឋអាមេរិក Rex Tillerson មានប្រសាសន៍ថា សហរដ្ឋអាមេរិក និងប្រទេសម៉ិកស៊ិកជាប្រទេស២ដ៏ខ្លាំងដែលនឹងមានការខ្វែងគំនិតគ្នាពី ពេលមួយទៅពេលមួយ‍។ ក៏ប៉ុន្តែលោករដ្ឋមន្រ្តីការបរទេសអាមេរិកាំងមានប្រសាសន៍ទៀតថា ការចរចារបស់លោកជាមួយពួកមន្រ្តីក្នុងទីក្រុង Mexico City ប្រកបដោយលទ្ធផល និងមានដំណើរការទៅមុខ។
លោករដ្ឋមន្រ្តីការបរទេសអាមេរិក Tillerson បានប្រាប់ពួកអ្នកយកព័ត៌មានដែលឈរនៅជិតលោក Luis Videgaray រដ្ឋមន្រ្តីការបរទេសម៉ិកស៊ិកថា ប្រទេសទាំង២មានការខ្វែងគំនិតគ្នាយ៉ាងខ្លាំងដែលអាចដោះស្រាយតាមរយៈការសន្ទនាគ្នា។ លោករដ្ឋមន្រ្តីការបរទេសអាមេរិកាំងបានចូលរួមដោយលោក John Kelly រដ្ឋមន្រ្តីសន្តិសុខមាតុភូមិសហរដ្ឋអាមេរិកនៅក្នុងដំណើរទស្សនកិច្ចទៅកាន់ប្រទេសម៉ិកស៊ិកដែលមានគោលបំណងបន្ធូរបន្ថយការព្រួយកង្វល់ និងការខឹងសម្បាអំពីគោលនយោបាយរបស់រដ្ឋ បាលថ្មីសហរដ្ឋអាមេរិកចំពោះប្រទេសម៉ិកស៊ិក។
លោករដ្ឋមន្រ្តីការបរទេសអាមេរិក Tillerson បាននិយាយទៀតថា «យើងបានពិភាក្សាពីបញ្ហាលំបាក និងឱកាសនៅក្នុងទំនាក់ទំនងទ្វេភាគី‍»។
លោកប្រធានាធិបតីសហរដ្ឋអាមេរិក ដូណាល់ ត្រាំ បានធ្វើសុន្ទរកថាអំពីចំណងទាក់ ទងរវាងប្រទេសទាំង២កាលពីដំបូងនៅសេតវិមាន។ លោកប្រធានាធិបតីត្រាំបាននិយាយមួយថ្ងៃបន្ទាប់ពីលោក Sean Spicer អ្នកនាំពាក្យសេតវិមានបាននិយាយសំដៅដល់ចំណងទាក់ទងទ្វេភាគីថា មានភាពខ្លាំងក្លា។ លោកប្រធានាធិបតីមានប្រសាសន៍ថា «យើងនឹងមានទំនាក់ទំនងដ៏ល្អជាមួយម៉ិកស៊ិក ហើយប្រសិនបើ យើងមិនមានក៏មិនមានទៅ‍»។
ដំណើរទស្សនកិច្ចនេះកើតមានឡើងទៅតាមអ្វីដែលត្រូវបានគេមើលឃើញថាជាចំណុចដ៏ទាបបំផុតនៅក្នុងទំនាក់ទំនងរវាងប្រទេសទាំង២ដែលមានសន្តិភាពនៅតាមបណ្តោយព្រំដែនរួមរបស់ខ្លួនប្រវែង៣ពាន់១រយគីឡូម៉ែត្រចាប់តាំងពីសង្គ្រាមរវាងម៉ិកស៊ិក និងអាមេរិកនៅចុងទសវត្សរ៍១៨៤០មក៕

សហរដ្ឋអាមេរិកអំពាវនាវដល់ប្រទេសចិនឲ្យធ្វើការផ្លាស់ប្តូរវិធីដោះស្រាយរបស់ខ្លួនចំពោះបញ្ហាសមុទ្រចិនខាងត្បូង

កប៉ាល់របស់ចិនត្រូវបានគេប្រទះឃើញនៅក្នុងផ្ទៃទឹកនៅក្បែរកោះ Mischief Reef នៅ ក្នុងប្រជុំកោះ Spratly Islands ដែលមានជម្លោះក្នុងសមុទ្រចិនខាងត្បូង កាលពីថ្ងៃទី២១ ខែឧសភា ឆ្នាំ២០១៥។

ក្រសួងការបរទេសសហរដ្ឋអាមេរិកកំពុងអំពាវនាវដល់ប្រទេសចិនឲ្យផ្លាស់ប្តូរវិធី ដោះស្រាយរបស់ខ្លួនចំពោះសមុទ្រចិនខាងត្បូង ដែលជាផ្លូវដឹកជញ្ជូនយុទ្ធសាស្រ្តដ៏សំខាន់និងសម្បូរទៅដោយប្រភពធនធានដែលបានទាមទារដោយប្រទេសជាច្រើន។
លោកស្រី Anna Richey-Allen អ្នកនាំពាក្យក្រសួងការបរទេសសហរដ្ឋអាមេរិក បានមានប្រសាសន៍ថា «យើងអំពាវនាវដល់ចិន និងប្រទេសទាមទារផ្សេងទៀតឲ្យទប់កុំចាត់វិធានការឆ្ពោះទៅកាន់ការស្ថាបនាកន្លែងយោធាថ្មី ធ្វើឲ្យក្លាយទៅជាជម្លោះខាងយោធា ហើយនិងបង្កើនការទាមទារទឹកដីនៅក្នុងសមុទ្រចិនខាងត្បូង ហើយត្រូវតាំងចិត្តដើម្បីដោះស្រាយដោយសន្តិវិធីជាមួយប្រទេសទាមទារផ្សេងទៀត‍»។‍
សេចក្តីថ្លែងការណ៍នោះកើតមានឡើងនៅពេលដែលចិនជិតបញ្ចប់ការស្ថាបនាការសាងសង់កន្លែងយោធានៅលើកោះសិប្បនិមិត្តរបស់ខ្លួនក្នុងសមុទ្រចិនខាងត្បូង នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ពួកមន្រ្តីមិនបញ្ចេញឈ្មោះរបស់សហរដ្ឋអាមេរិក បានប្រាប់ទីភ្នាក់ងារព័ត៌មាននោះថា ការស្ថាបនាទីកន្លែងរាប់សិបដែលមានដំបូលអាចបិទបើកបាន និងរចនាឡើងជាកន្លែងសម្រាប់ផ្ទុកកាំជ្រួចមីស៊ីលសម្រាប់បាញ់ពីដីទៅអាកាសនៅលើប្រជុំកោះ Spratly នោះជិតចប់ហើយ។
លោកស្រី Richey-Allen អ្នកនាំពាក្យក្រសួងការបរទេសអាមេរិកបានមានប្រសាសន៍ទៀតថា «ប៉ុស្តិ៍យោធាបានបង្កើតការតានតឹង ហើយសេចក្តីរាយការណ៍ទាំងនេះធ្វើឲ្យមានការព្រួយកង្វល់ក្នុងចំណោមប្រទេសនានានៅក្នុងតំបន់‍»។
ក្នុងព្រឹត្តិការណ៍មួយ ដែលអាចត្រូវបានគេចាត់ទុកជាការពង្រីកខាងយោធាដោយប្រទេសចិន ពួកអ្នកជំនាញជាច្រើនបានប្រាប់ VOA ថា ការណ៍នេះ អាចចាត់ទុកជាការសាកល្បងដំបូងមួយសម្រាប់ប្រធានាធិបតីអាមេរិក ដូណាល់ ត្រាំដែលបានប្រកាន់ជំហរតឹងតែងប្រឆាំងនឹងប្រទេសចិនក្នុងអំឡុងយុទ្ធនាការឃោសនាបោះឆ្នោតរបស់លោក៕

តំណាងរាស្រ្តបក្សប្រឆាំង ៧រូប ទំនងមានវាសនាមិនល្អក្រោមឥទ្ធិពលច្បាប់បក្សនយោបាយថ្មី

ក្រុមបាតុករគណបក្សសង្គ្រោះជាតិនៅទីលានប្រជាធិបតេយ្យនាពេលកន្លងមក (Siv Channa/RFI)

យប់មិញលោក មាជ សុវណ្ណារ៉ា ដែលកំពុងជាប់ទោសព្រោះសំណុំរឿងហិង្សានៅក្បែរទីលានប្រជាធិបតេយ្យកាលពីឆ្នាំ ២០១៤នោះ បានលាលែងពីសមាជិកភាពគណៈកម្មាធិការនាយកបក្សសង្រ្គោះជាតិ ដែលបើតាមការបញ្ជាក់របស់លោក គឺព្រោះតែមិនចង់ឲ្យប៉ះពាល់បក្សដោយសារវិសាលភាពច្បាប់គណបក្សនយោបាយថ្មី។ ចេញពីករណីនេះ ធ្វើឲ្យគេនឹកឃើញដល់អ្នកតំណាងរាស្រ្តបក្សប្រឆាំង ៧នាក់ទៀតដែលពាក់ព័ន្ធក្នុងករណីហិង្សានោះដែរ។ នេះ អាចឲ្យគេសន្និដ្ឋានជាបឋមថា វាសនារបស់ពួកគេទំនងជាមិនខុសគ្នានឹងលោកមាជ សុវណ្ណារ៉ាទេ បើសិនតុលាការងាកមកបន្តចាត់ការពួកគេក្នុងសំណុំរឿងនេះ។ ចាត់ការឬមិនចាត់ការយ៉ាងណានោះ វាជារឿងរបស់តុលាការ តែពេលនេះ វណ្ណ សុគន្ធា សូមរំលឹកដំណើររឿងក្តីក្តាំងរបស់ពួកគេជូនលោកអ្នកស្ដាប់តទៅ៖

កាលពីថ្ងៃទី ១៥ ខែកក្កដា ឆ្នាំ ២០១៤ មានការប៉ះទង្គិចគ្នាដ៏ហិង្សាមួយរវាងអ្នកគាំទ្រគណបក្សសង្រ្គោះជាតិ និងក្រុមសន្តិសុខខណ្ឌដូនពេញនៅក្បែរទីលានប្រជាធិបតេយ្យ ដែលពេលនោះ គេក៏ឃើញមានវត្តមានតំណាងរាស្រ្ត និងសកម្មជនគណបក្សសង្រ្គោះជាតិនៅទីនោះផងដែរ។ ការប៉ះទង្គិចគ្នានោះ គឺដោយសារតែក្រុមអ្នកគាំទ្រគណបក្សសង្រ្គោះជាតិ បានប្រមូលផ្តុំគ្នាដង្ហែទៅរំដោះទីលានប្រជាធិបតេយ្យដែលអាជ្ញាធរហ៊ុមព័ន្ធដោយបន្លាលួស។ សន្តិសុខមួយចំនួន បានរបួសនៅក្នុងអំពើហិង្សានាពេលនោះ។
បន្ទាប់ពីរឿងរ៉ាវប៉ះទង្គិចគ្នានេះ តំណាងរាស្រ្តគណបក្សសង្រ្គោះជាតិ ៥នាក់ត្រូវបានអាជ្ញាធរឃាត់ខ្លួនទាំងមានអភ័យឯកសិទ្ធិនៅនឹងខ្លួន ហើយពីរនាក់ក៏បានជាប់ចោទក្នុងអំពើហិង្សានេះដែរ។ អ្នកតំណាងរាស្រ្តគណបក្សសង្រ្គោះជាតិចំនួន ៧នាក់ ត្រូវបានតុលាការចោទពីបទដឹកនាំបាតុកម្មខុសច្បាប់ ដែលបានបង្កអំពើហិង្សាដាក់លើសមត្ថកិច្ច នៅឯទីលានប្រជាធិបតេយ្យ ។
ក្រោយពីការចរចានយោបាយរវាងគណបក្សសង្រ្គោះជាតិ និងគណបក្សប្រជាជនកម្ពុជានៅពេលបន្ទាប់មក ចំណាត់ការរបស់តុលាការមិនមានសកម្មភាពណាមួយទៅលើក្រុមតំណាងរាស្រ្តគណបក្សប្រឆាំងឡើយរហូតមកដល់ពេលនេះ។ គឺមានតែទៅលើសកម្មជនគណបក្សសង្រ្គោះជាតិ ដែលពេលនេះកំពុងជាប់នៅក្នុងពន្ធនាគារព្រៃស។ យ៉ាងណាក៏ដោយ សំណុំរឿងរបស់អ្នកតំណាងរាស្រ្តទាំង ៧នាក់កំពុងស្ថិតនៅក្នុងដៃតុលាការនៅឡើយ។ លោកសុក សំអឿន ប្រធានក្រុមអ្នកច្បាប់ការពារសិទ្ធិកម្ពុជា បានលើកឡើងថា តុលាការអាចបើកកកាយសំណុំរឿងណាមួយឡើងវិញនៅពេលណាក៏បាន បើសិនសំណុំរឿងនោះមិនទាន់បិទ។
ប្រសិនបើតុលាការងាកមកចាត់ការលើសំណុំរឿងនេះ និងផ្តន្ទាទោសលើអ្នកតំណាងរាស្រ្តគណបក្សសង្រ្គោះជាតិទាំង ៧នាក់នោះ វាសនារបស់ពួកគេទំនងមិនខុសគ្នានឹងលោកមាជ សុវណ្ណារ៉ាឡើយ។ លោកមាជ សុវណ្ណារ៉ា ដែលសុំលាលែងមុនត្រូវអស់តំណែងដោយសារតែវិសាលភាពនៃច្បាប់ស្តីពីគណបក្សនយោបាយថ្មី។ សម្រាប់លោកស្រីមួរ សុងហួរ លោកស្រី ប្រាប់ថា មិនព្រួយបារម្ភទេចំពោះបញ្ហាទាំងអស់នេះ។ ប៉ុន្តែអ្វីដែលលោកស្រីព្រួយបារម្ភ និងចង់បាននោះ គឺធ្វើយ៉ាងណាឲ្យដំណើរការបោះឆ្នោតនាពេលខាងមុខប្រព្រឹត្តទៅដោយរលូន៕

លោក កឹម សុខា៖ បើគំរាមកាន់តែខ្លាំង នោះសង្គ្រោះជាតិកាន់តែកើនអ្នកគាំទ្រ

ប្រធានស្តីទីគណបក្សសង្គ្រោះជាតិលោក កឹម សុខា (ហ្វេសប៊ុកលោក កឹម សុខា)

ប្រធានស្តីទីគណបក្សសង្គ្រោះជាតិថ្លែងថា បើគេកៀបនិងគំរាមគណបក្សលោកកាន់តែខ្លាំង លោកថាបក្សប្រឆាំងនឹងមានអ្នកគាំទ្រកាន់តែកើនឡើងច្រើនជាងមុន។ នេះបើតាមហ្វេសប៊ុករបស់លោក កឹម សុខា។
ថ្លែងទៅកាន់ថ្នាក់ដឹកនាំក៏ដូចជាសកម្មជនមូលដ្ឋានរបស់ខ្លួនខេត្តរតនគិរីនៅថ្ងៃសុក្រនេះ ប្រធានស្តីទីគណបក្សសង្គ្រោះជាតិលោក កឹម សុខា លើកឡើងថា ការយាយីនិងការធ្វើទុកបុកម្និញមកគណបក្សប្រឆាំងកន្លងមក លោកថា វានឹងធ្វើឲ្យបក្សនេះកាន់តែកើនការគាំទ្រពីប្រជាពលរដ្ឋកាន់តែខ្លាំង។
លោកថា «ខ្ញុំយល់ថា បើគេកៀប គេកេង និងគេគំរាមយើងកាន់តែខ្លាំង បក្សប្រឆាំងកាន់តែកើនការគាំទ្រច្រើន។ដូច្នេះខ្ញុំសូមឲ្យបងប្អូនបន្ដការតស៊ូដោយអត់ធ្មត់ ដោយអហិង្សាតទៅទៀត ដើម្បីសម្រេចនូវគោលដៅរបស់យើង ដែលប្រជាពលរដ្ឋខ្មែរបានផ្ដល់សេចក្ដីសង្ឃឹមនោះ»។
ការលើកឡើងនេះទំនងជាធ្វើឡើងបន្ទាប់ពីរដ្ឋសភាកម្ពុជាបានអនុម័តច្បាប់ស្តីពីគណបក្សនយោបាយទាំងចម្រូងចម្រាស ដោយគ្មានវត្តមានបក្សប្រឆាំង។ បើតាមមន្ត្រីបក្សប្រឆាំងលើកឡើងថា ការមិនចូលរួមអនុម័តច្បាប់នេះ ដោយសារគណបក្សសង្គ្រោះជាតិបានចាត់ទុកថាច្បាប់នេះនឹងបង្កឲ្យមានការបែកបាក់ឯកភាពជាតិ ផ្ទុយពីគោលការណ៍នៃលិទ្ធិប្រជាធិបតេយ្យ សេរីពហុបក្ស ខុសពីឆន្ទះរាស្ត្រនិងក្នុងគោលបំណងបំផ្លាញគណបក្សគូប្រជែងជាមួយបក្សកាន់អំណាច៕

សរសេរមកកាន់ កញ្ញា ខាន់ លក្ខិណា តាមរយៈ leakhena@vodhotnews.com

ការសិក្សាមួយចាត់ទុកកម្ពុជាថាគ្រប់គ្រងតាមបែបផ្តាច់ការ

លោកនាយករដ្ឋមន្ត្រី ហ៊ុន សែន ចូលរួមកម្មវិធីមួយនៅកោះពេជ្រកាលពីឆ្នាំ ២០១៥។ ហុង មិនា

ភ្នំពេញៈ តាមការសិក្សាស្រាវជ្រាវថ្មីមួយបានចាត់ទុកកម្ពុជាជាប្រទេសដែលគ្រប់គ្រងតាមបែបផ្តាច់ការដោយឯកបក្ស ដែលស្ថិតនៅក្រោមឥទ្ធិពលរបស់លោកនាយករដ្ឋមន្រ្តី ហ៊ុន សែន។
ចេញផ្សាយកាលពីថ្ងៃអង្គារ និងនិពន្ធដោយអ្នកសិក្សាស្រាវជ្រាវជនជាតិអូស្រ្តាលីម្នាក់ឈ្មោះ Lee Morgenbesser របាយការណ៍នេះបាននិយាយថាមិនមែនគណបក្សប្រជាជនទេដែលផ្តាច់ការ នោះគឺលោក ហ៊ុន សែន ដែល «មានអំណាចផ្តាច់មុខ និងគ្មានដែនកំណត់» ទៅលើ «មន្រ្តីគោលនយោបាយ និងការបែងចែករង្វាន់»។
លោក Lee Morgenbesser បានសរសេរថា៖ «លោក ហ៊ុន សែន ធ្វើដូចនេះតាមរយៈការគ្រប់គ្រងការតែងតាំងចំពោះតំណែងខ្ពស់ៗ ការតែងតាំងសាច់ញាតិរបស់លោកឲ្យកាន់តំណែងខ្ពស់ក្នុងយោធាបង្កើតអំណាចយោធាសេចក្តីសម្រេចផ្តាច់មុខនៅក្នុងការដឹកនាំបក្ស និងគ្រប់គ្រងអ្នកដែលជាផ្នែកនៃការដឹកនាំ»។ របាយការណ៍បន្តថា៖ «ជនផ្តាច់ការដូចជាលោក ហ៊ុន សែន អាចទំនងនឹងត្រូវបញ្ចប់ដោយការសម្លាប់ការដាក់ពន្ធនាគារ ឬនិរទេសច្រើនជាងមេដឹកនាំយោធា ឬមេដឹកនាំផ្សេងៗទៀតក្នុងគណបក្សមិនថាការផ្លាស់ប្តូររបបកើតឡើងឬអត់នោះទេ»។
លោក Morgenbesser បានថ្លែងតាមអ៊ីមែលកាលពីម្សិលមិញថា៖ «នេះពិតណាស់ដាក់គាត់នៅក្នុងចំណោមជនផ្តាច់ការល្បីៗជុំវិញពិភពលោក»។ «ឧទាហរណ៍ច្បាស់មួយគឺការអះអាង [របស់គណបក្សសង្គ្រោះជាតិ] ដែលថាការធ្វើវិសោធនកម្មច្បាប់ស្តីពីគណបក្សនយោបាយ គំរាមកំហែងប្រជាធិបតេយ្យរបស់កម្ពុជា។ តើកម្ពុជាអាចជាប្រទេសមានប្រជាធិបតេយ្យយ៉ាងម៉េចទៅ ប្រសិនបើលោក ហ៊ុន សែន អនុវត្តអំណាចខ្លាំងបែបនេះ?»។
ប៉ុន្តែអ្នកនាំពាក្យរដ្ឋាភិបាលលោក ផៃ ស៊ីផាន បានរិះគន់ការវាយតម្លៃរបស់លោក Morgenbesser។ «ខ្ញុំពិតជាមិនចូលចិត្តនៅពេលពួកគេនិយាយថានាយករដ្ឋមន្រ្តីរបស់ខ្ញុំជាជនផ្តាច់ការ។ គាត់ជាវីរបុរសរបស់កម្ពុជា»។ លោក ស៊ីផាន បន្ថែមថាបើទោះបីជាគាត់ជាប្រធានគណបក្សកាន់អំណាច «លោកនាយករដ្ឋមន្រ្តី ហ៊ុន សែន មិនអាចធ្វើអ្វីដោយខ្លួនឯងទេ គាត់ត្រូវតែកោះប្រជុំគណបក្ស»។
របាយការណ៍នេះបានធ្វើឡើងនៅក្នុងសប្តាហ៍ដែលរដ្ឋសភាបានអនុម័តការធ្វើវិសោធនកម្មច្បាប់ដែលគំរាមរំលាយគណបក្សប្រឆាំងដែលជាគូប្រកួតប្រជែងរបស់លោក ហ៊ុន សែន ហើយដែលទង្វើនេះត្រូវបានអ្នកតាមដាននយោបាយរិះគន់ថាជា «ជ័យជម្នះនៃភាពផ្តាច់ការ»៕PS